Klei Aê Diê Blŭ: Y‑Malaki 3:7-12
Êlan kliăng: “Arăng tăm pah kơ diih leh hŏng sa klei tăm pah, jih găp djuê diih, kyuadah diih dôk tlĕ dŏ Kâo. ” (Y‑Malaki 3:9)
Klei êmuh ksiêm mĭn: Ya klei Aê Diê ƀuah phung ƀuôn sang Israel? Ya ngă? Ya klei Aê Diê iêu mthưr brei diñu ngă mbĭt hŏng ya klei Ñu ƀuăn? Ya klei mñă kơ drei kơ klei myơr?
Aê Diê ƀuah phung ƀuôn sang Israel “tlĕ” dŏ Aê Diê kyuadah diñu amâo djă ba ôh dŏ sa kdrêč hlăm pluh kơ Sang Ñu (êlan 8). Sa kdrêč hlăm pluh jing jia Aê Diê čuăn kơ phung ƀuôn sang Israel mơ̆ng êlâo (Bruă Lêwi 27:30; Klei Yap 18:21). Sa kdrêč hlăm pluh ăt jing kdrêč pioh mdê čiăng brei kơ phung Lêwi ngă bruă hlăm Sang Yang, kyuadah diñu amâo mâo ngăn dưn ôh (Klei Yap 18:20-24). Ƀiădah phung ƀuôn sang Israel amâo djă pioh klei bhiăn Aê Diê ôh, “tlĕ” hĕ sa kdrêč hlăm pluh anăn. Arăng tăm pah kơ diñu kyuadah jih găp djuê diñu tlĕ sơăi dŏ Aê Diê (êlan 9). Khua pô hưn êlâo Y‑Malaki iêu mthưr diñu “lŏ wĭt” kơ Aê Diê (êlan 7) leh anăn “djă ba bĕ bi ênŭm jih dŏ sa kdrêč hlăm pluh kơ sang pioh ngăn” (êlan 10). Sang pioh ngăn jing anôk mkăm pioh mnơ̆ng ƀơ̆ng huă mơ̆ng phung ƀuôn sang djă ba kơ Sang Yang, mơ̆ng anăn yơh phung khua ngă yang mâo mnơ̆ng ƀơ̆ng huă dưi hdĭp. Jing klei ênguôt êdi tơdah phung ƀuôn sang Israel amâo djă pioh ôh klei bhiăn Aê Diê leh anăn amâo djă ba ôh sa kdrêč hlăm pluh, snăn yơh ngă kơ phung Lêwi kbiă nao ngă bruă čiêm rông klei hdĭp digơ̆.
Năng ai phung ƀuôn sang Aê Diê huĭ kƀah mnơ̆ng yua snăn “tlĕ” leh sa kdrêč hlăm pluh dŏ Aê Diê, kơ̆ng pioh kơ diñu pô. Aê Diê lông dlăng phung ƀuôn sang Ñu “hŏng klei anăn brei diih lông dlăng Kâo”. Aê Diê ƀuăn srăng “pŏk ƀăng bhă điêt hlăm adiê” leh anăn “tuh kơ diih sa klei jăk jĭn êbeh dlai” (êlan 10). Tơdah phung ƀuôn sang djă pioh klei bhiăn, sĭt suôr myơr sa kdrêč hlăm pluh snăn diñu srăng bi knal klei jăk jĭn Aê Diê brei. Aê Diê ƀuăn srăng brei klei jăk jĭn kơ mnơ̆ng dhơ̆ng, ana boh kroh diñu buh pla. Mơ̆ng klei anăn, jih jang găp djuê mnuih srăng thâo kral Israel jing sa boh čar mâo klei hơêč hmưi leh anăn mâo klei jăk mơak (êlan 11-12).
Ênuk Klei Bi Mguôp Hđăp, sa kdrêč hlăm pluh jing klei bhiăn jia Aê Diê čuăn kơ phung ƀuôn sang Ñu brei djă ba. Hlăm ênuk Klei Bi Mguôp Mrâo, Khua Yang amâo čuăn ôh dŭm ênoh myơr, ƀiădah lĕ, phung anak ƀuôn sang Aê Diê thâo săng kơ klei pap Aê Diê brei kơ drei lu êbeh, tơl brei Anak Ñu mâo knŏng sa čô, snăn drei bi êdah klei thâo hdơr knga hŏng klei sĭt suôr myơr ƀiă êdi ăt sa kdrêč hlăm pluh msĕ si ênuk Klei Bi Mguôp Hđăp mơh. Ƀiădah, lu phung anak Aê Diê ăt dôk “tlĕ” dŏ Aê Diê. Lu phung đăo dlăng klei myơr jing ktrŏ. Aê Diê jing Pô mdrŏng, amâo djŏ Ñu čiăng kơ sa kdrêč mơ̆ng boh mnga drei mâo ôh, ƀiădah anei jing êlan hdră kơ phung anak ƀuôn sang Aê Diê bi êdah klei thâo hdơr knga kơ Khua Yang leh anăn uêñ mĭn kơ bruă Khua Yang. Brei drei thâo bi mni kơ Khua Yang kyuadah Ñu brei kơ drei mâo kdrêč mbĭt hlăm bruă mkŏ mdơ̆ng bi mđĭ bruă Ƀuôn Ala Mtao Aê Diê hŏng klei myơr. Leh anăn brei drei bi mni kơ Khua Yang hĭn kyuadah Klei Aê Diê Blŭ ƀuăn tơdah drei sĭt suôr myơr snăn srăng mâo klei jăk jĭn hlăm mnơ̆ng yua wăt klei hơ̆k mơak hlăm klei hdĭp. Ƀiădah tơdah drei amâo myơr amâodah myơr amâo mdrăng hŏng ênuk Klei Bi Mguôp Hđăp ôh snăn klă sĭt drei ăt dôk “tlĕ” dŏ Aê Diê yơh.
Si ngă drei dôk “tlĕ” sa kdrêč hlăm pluh amâodah ya mta mnơ̆ng myơr mkăn jing dŏ Khua Yang mơ̆? Mâo mơ̆ ya klei drei čiăng bi mlih leh hriăm klei hriăm anei?
Wah lač: Ơ Khua Yang, bi mni kơ Khua Yang bi mtlaih kâo. Akâo Khua Yang đru kâo sĭt suôr pioh mdê hjăn sa kdrêč hlăm pluh myơr kơ Sang Aê Diê, leh anăn khut khat amâo tlĕ dŏ Aê Diê ôh wăt tơdah si klei truh dưn.
Dlăng Klei Aê Diê Blŭ hlăm tlâo thŭn: Y‑Yêrêmi 25:1-31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
