Klei Aê Diê Blŭ: II Kôrantô 9:6-11
Êlan kliăng: “Brei diih thâo klei anei: hlei pô rah ƀiă srăng wiă ƀiă, leh anăn hlei pô rah lu srăng wiă lu. ” (II Kôrantô 9:6)
Klei êmuh ksiêm mĭn: Ya klei bhiăn khua ƀĭng kna Y‑Pôl mtô kơ phung ƀuôn sang Aê Diê? Ya boh tŭ dưn klei bhiăn anei ba kơ klei hdĭp myang? Khua Yang brei kơ drei bŏ dlai ya pioh ngă? Ti anôk drei dôk rah leh anăn ya boh drei wiă?
Khua ƀĭng kna Y‑Pôl mă yua rup sa čô rah mjeh čiăng mtô kơ klei myơr kơ Khua Yang leh anăn đru pô mkăn. Ñu hưn mdah kơ klei bhiăn rah leh anăn wiă klă mngač snăk: “Hlei pô rah ƀiă srăng wiă ƀiă, leh anăn hlei pô rah lu srăng wiă lu” (êlan 6). Sa klei bhiăn mưng juăt hlăm bruă pưk hma, hlei pô rah lu mjeh srăng wiă mâo lu boh. Amâo mâo ôh pô hmăng hmưi hĕ ñu pô srăng wiă lu êbeh tơdah knŏng rah ƀiă dhit asăr mjeh.
Khua ƀĭng kna Y‑Pôl čiăng kơ phung Kôrantô mâo klei ƀuh kbưi hĭn tơdah ñu mtô kơ klei đru bi mguôp prăk ngăn diñu kơ phung đăo mkăn dôk kƀah mnơ̆ng, dưi ba kơ diñu boh tŭ dưn hlăm klei hdĭp mngăt myang. Tơdah diñu đru phung ƀun ƀin jing diñu dôk rah asăr mjeh klei khăp, diñu srăng wiă wĭt klei hơ̆k mơak leh anăn ai tiê khăp. Phung anak Aê Diê brei djă pioh kjăp klei bhiăn rah wiă anei hlăm klei myơr kơ bruă Aê Diê leh anăn đru dŏng pô mkăn. Klei myơr leh anăn klei đru jing bruă čŏng čiăng. Tui hlue si ai tiê thâo hdơr knga kơ Khua Yang leh anăn klei khăp kơ pô mkăn snăn drei myơr. Khua ƀĭng kna Y‑Pôl blŭ kñăm klă mngač snăk: “Aê Diê khăp kơ pô myơr hŏng klei hơ̆k mơak” (êlan 7). Dŭm ênoh drei myơr amâo yuôm mdrăng hŏng knuih leh anăn ai tiê myơr ôh. Ƀiădah lĕ, tơdah drei myơr hŏng ai tiê kmah leh anăn hơ̆k mơak sĭt nik srăng wiă lu klei jăk jĭn hĭn.
Aê Diê jing Pô mâo klei dưi brei kơ drei “jih klei pap êbeh dlai, čiăng kơ diih dưi mâo djăp mta mnơ̆ng nanao” leh anăn dưi brei lu êbeh kơ djăp mta bruă jăk (êlan 8). Tơdah Aê Diê brei kơ drei dưi mâo djăp mta mnơ̆ng lu êbeh, Ñu čiăng kơ drei đru mnuih ƀun ƀin hŏng klei kmah. Mơ̆ng bruă jăk drei ngă, arăng dưi thâo kral Khua Yang leh anăn bi mni kơ Ñu (êlan 11). Năng ai khua ƀĭng kna Y‑Pôl ksiêm dlăng leh klei thâo mĭn hlăm Klei Bi Hriêng 11:24-25 hlăk ñu hưn mdah klei bhiăn msĕ kơ klei rah leh anăn klei wiă. Hlei pô rah hlăm klei myơr leh anăn thiê brei srăng mâo klei mdrŏng sah mơ̆ng klei wiă lu boh tŭ dưn hŏng mnơ̆ng dhơ̆ng wăt klei khăp.
Phung anak ƀuôn sang Aê Diê brei hdơr nanao djăp mta mnơ̆ng drei mâo jing leh dŏ Aê Diê sơăi (I Klei Yăl Dliê 29:14). Drei knŏng jing pô kiă kriê ngăn drăp Aê Diê jao. Khua Yang čiăng kơ drei sĭt suôr hlăm klei myơr leh anăn đru phung ƀun ƀin, bi kdrêč adôk brei drei thâo yua hŏng klei thâo mĭn pioh duh kơ ênuk hlŏng lar. Si drei yua kdrêč asăr mjeh Aê Diê jao brei rah, drei ăt srăng wiă wĭt msĕ snăn mơh. Brei hdơr djă pioh nanao klei bhiăn: “Hlei pô rah lu srăng wiă lu” .
Si drei dôk rah asăr mjeh ngăn dŏ, klei pap leh anăn hruê mmông Aê Diê brei kơ drei?
Wah lač: Ơ Khua Yang, akâo Khua Yang đru kâo djă pioh klei bhiăn rah leh anăn wiă čiăng kơ kâo thâo rah hŏng klei kmah kơ bruă Khua Yang, myơr hŏng klei kmah leh anăn jih ai tiê đru phung ƀun ƀin Aê Diê mdưm jŭm dar kâo.
Dlăng Klei Aê Diê Blŭ hlăm tlâo thŭn: Y‑Yêrêmi 23:18–24:10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
