Klei Aê Diê Blŭ: Klei Kbiă 13:11-14
Êlan kliăng: “Mpŭ kơ Yêhôwa hŏng mnơ̆ng mơ̆ng klei mdrŏng ih, leh anăn hŏng boh hlâo hlang mơ̆ng bruă ih. ” (Klei Bi Hriêng 3:9)
Klei êmuh ksiêm mĭn: Ya klei Aê Diê mtô Y‑Môis atăt gai phung ƀuôn sang Israel brei ngă hlăk mŭt hlăm Čar Aê Diê Ƀuăn? Ya klei kñăm čiăng mdưm kơ klei bhiăn anei? Si drei mă yua kơ klei myơr mnơ̆ng êlâo hĭn leh anăn jăk hĭn kơ Khua Yang?
Y‑Môis iêô mthưr phung ƀuôn sang Israel brei ngă klei myơr anak khua tơdah diñu mŭt leh hlăm čar Kanaan jing Čar Aê Diê Ƀuăn kyuadah anak êkei khua leh anăn êđai khua knô hlô mnơ̆ng rông jih jang jing dŏ Khua Yang sơăi (êlan 12). Ñu atăt gai diñu hdră klei bhiăn bi tui êđai khua knô aseh dliê hŏng klei myơr êđai biăp amâodah bê knô, leh anăn hdră klei bhiăn bi tui anak êkei khua (êlan 13). Klei ngă hdră klei bhiăn čiăng mñă kơ phung ƀuôn sang Israel brei hdơr kơ Aê Diê yơh Pô bi mtlaih anak êkei khua diñu hlăk dĭng buăk jăk bi mdjiê jih jang phung anak êkei khua phung Êjip. Kyuanăn, anak êkei khua jing dŏ Khua Yang, ƀiădah lĕ, diñu dưi bi tui tơdah myơr mnơ̆ng ngă yang bi hrô. Y‑Môis ăt mblang mơh kơ bruă ngă anei čiăng mñă kơ phung anak čô Israel hdơr wĭt kơ klei pap Aê Diê bi mtlaih pioh brei kơ diñu (êlan 14). Hŏng Aê Diê leh anăn phung Israel, anak êkei khua jing yuôm snăk. Hdră klei bhiăn bi tui anak êkei khua hŏng klei myơr mnơ̆ng ngă yang hrô brei ăt jing rup kơ klei Khua Yang Yêsu Krist săn asei mlei bi tui brei klei soh kơ jih jang mnuih mơh.
Êlan hdră myơr anak êkei khua amâodah boh hlâo hlang mkŏ mjing leh kơ phung ƀuôn sang Israel mơ̆ng hlăk diñu mprăp mŭt hlăm Čar Aê Diê Ƀuăn (Klei Yap 18:14-19; Klei Mtô Mñă Klei Bhiăn 26:9-11). Klei bhiăn anei bi hriăm kơ phung ƀuôn sang Aê Diê brei thâo myơr mnơ̆ng jăk hĭn mơ̆ng boh hlâo hlang diñu pô kơ Aê Diê êlâo hĭn. Brei dưm Aê Diê jing tal êlâo hĭn hlăm klei hdĭp drei. Êlâo kơ dưn yua boh mnga drei, brei drei myơr kơ Khua Yang kdrêč jăk hĭn čiăng bi êdah klei drei hdơr knga leh anăn klei drei đăo knang kơ Ñu. Anăn yơh jing klei mblang kơ klei myơr boh hlâo hlang leh anăn anak êkei khua kơ Aê Diê.
Lu phung anak Aê Diê hruê anei knŏng myơr kơ Aê Diê ya dŏ êbeh mơ̆ng ngăn drăp pô mâo amâodah knŏng myơr tơdah ƀuh mprăp djăp leh kơ pô ya mnơ̆ng kƀah. Mphŭn dô, anak khua leh anăn boh hlâo hlang jing dŏ Aê Diê leh anăn phung anak ƀuôn sang Aê Diê brei myơr wĭt kơ Ñu. Hruê anei, brei drei thâo săng jih jang boh mnga drei mâo jing mơ̆ng Aê Diê brei sơăi, kyuanăn jih jang jing dŏ Aê Diê sơăi. Drei myơr mnơ̆ng êlâo hĭn leh anăn jăk hĭn kơ Khua Yang, leh anăn kdrêč adôk, Khua Yang brei drei yua tui si klei Ñu atăt gai. Phung Sang Aê Diê khăng mmuñ Klei Mmuñ “Myơr bĕ kơ Ñu jih mnơ̆ng yuôm hĭn…” ƀiădah lu phung đăo ƀăng kƀông mmuñ ƀiădah ăt ka ngă ôh tui si klei pô mmuñ. Myơr klei jăk hĭn kơ Khua Yang brei jing klei bhiăn kơ klei hdĭp mngăt myang grăp čô phung đăo, brei drei ngă čiăng dưi jing knhuah hdĭp hlăm knhuang klei đăo drei.
Si ngă drei hmiêt mkăp myơr klei êlâo hĭn leh anăn jăk hĭn kơ Aê Diê leh mơ̆?
Wah lač: Ơ Khua Yang, pap brei kơ kâo tơdah kâo ka bi mjuăt kâo pô hlăm klei myơr mnơ̆ng jăk hĭn kơ Khua Yang. Akâo Khua Yang đru kâo hdơr mĭn kơ Khua Yang êlâo hĭn leh anăn myơr mnơ̆ng jăk hĭn mơ̆ng boh mnga kâo mâo.
Dlăng Klei Aê Diê Blŭ hlăm tlâo thŭn: Y‑Yêrêmi 22:24–23:17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
