Pajlug 18:23
23 Tus neeg pluag hais tej lus uas zoo xwb,
Tiamsis tus neeg npluanuj teb nyaum kawg li.
Lus nug rau sawvdaws xav:
- Vajntxwv Xalumoos hais txog tus neeg pluag thiab tus neeg npluanuj tej lus zoo licas?
- Vajtswv Txojlus qhia yuav ua licas thiaj tiv dhau kev txomnyem?
- Peb yuav tsum hloov tej kev xav thiab tes haujlwm twg thiaj tiv dhau lub neej txomnyem thiab ua rau tus Tswv tau koobmeej?
Luag pheej hais tias “npluanuj, pluagkug”. Npluanuj ntev kuj muaj koob nto npe, txomnyem ntev kuj txaj muag xiam ntsev. Pluag mus sib nrawg nrog “txomnyem”. Thaum raug pluag, txomnyem yuav tau mus qiv, txais, thov lwm tus. Thaum mus thov ces nyob ntawm tus yus mus taij thov nplooj siab. Thaum mus qiv txais, yuav tsum raug them paj lim, raug poob dag zog lossis nyob ntawm tus qiv txais hais licas ces ua li ntawd, Pajlug 22:7 qhia hais tias: “Cov neeg pluag yeej ua cov neeg npluanuj qhev. Txais luag nyiaj ces yog ua luag qhev”. Tsis yog tsuas ntsib kev txomnyem hauv lub neej xwb, cov neeg pluag tseem raug lwm tus hais lus “thuam”, lus “ntxub”. Tus neeg pluag hais tej lus zoo taij thov xwb, tiamsis tus neeg npluanuj teb nyaum kawg li (nqe 23). Tiv khwv, tiv sab tej zaum tseem yoojyim dua tiv thuam, tiv ntxub vim raug hnov tej lus nyaum lus hnyav.
Tsis txhob yws, txhob nroo, lossis qaij kom dhau, tiamsis cov ntseeg yuav tsum vamkhom Vajtswv Txojlus qhia, muaj lub siab tawv tiv dhau tej kev txomnyem vim qhov ntawd tsis yog tsuas muaj nqis rau tus kheej thiab tsevneeg xwb, tseem ua rau tus Tswv tau koobmeej thiab. Yam xubthawj, yuav tsum qhia tej uas yus cheemtsum rau tus Tswv. Thov tus Tswv pab peb dim tej kev txomnyem, qhib rau peb lwm txoj haukev, lwm lub tswvyim ua noj ua haus. Yuav tsum ntseeg hais tias tus Tswv yog tus npluanuj, Nws yuav foom koobhmoov rau peb. “Thaum cov neeg txomnyem thov nws pab, nws teb lawv tej lus thov; nws cawm lawv dim ntawm lawv tej kev ntxhov siab uas lawv raug” (Phau Ntawv Nkauj 34:6). Tim ob, txawm yuav ntsib txomnyem npaum twg, los yuav tsum ua raws li tus Tswv tej lus samhwm, ua lub neej ncaj ncees, ntseeg khov kho hais tias tus Tswv yuav tsis tso cov neeg ncajncees tseg: “Nimno kuv yog ib tug neeg laus, kuv ua neej nyob los tau ntev lawm, tiamsis kuv tsis pom tus TSWV muab ib tug neeg zoo tso povtseg rau qhov twg, lossis cia nws tej menyuam mus thov khawv noj. Nws yeej muaj pub thiab qiv tau rau luag txhua lub sijhawm, thiab nws tej menyuam puavleej yog koob hmoov” (Phau Ntawv Nkauj 37:25-26). Txhob vim ntshaw ua npluanuj sai poob mus rau tej kev dag ntxias phem, ua rau tshuav luag nqi, ua txhaum rau lwm tus, txhaum rau Vajtswv. Tim peb, yuav tsum nquag ua haujlwm. Vajtswv Txojlus ceebtoom cov neeg tub nkeeg hais tias, “Mus pw ib pliag thiab tsaug ib tsig zog tso; khawm tes so ib pliag tso, tiamsis thaum koj tseem tabtom pw tsaug zog, kev txomnyem yuav los raug koj ib yam li tubsab nqa rawv qws tuaj huab koj lub neej ntag” (Pajlug 24:33-34).
Ankus thov tus Tswv txhob cia nws pluag dhau, Nws hais tias: “yog kuv pluag dhau lawm, tej zaum kuv yuav mus ua tubsab thiab ua rau kuv tus Vajtswv txajmuag” (Pajlug 30:9b). Thov tus Tswv pab peb cia siab rau Nws, nquag ua haujlwm thiaj yuav tiv dhau tej kev txomnyem, tsis yog tsuas ua rau tsev neeg muaj noj muaj hnav, ua rau luag qhuas xwb, tseem yuav ua rau tus Tswv tau koobmeej thiab.
Thov Vajtswv,
Tus Tswv, yog Leej Txiv uas nyob saum Ntuj Ceeb Tsheej, thov ua Koj tsaug vim Koj tej lus qhuab qhia nyuam yaus ua tau lub neej muaj tswvyim tiv dhau tej kev txomnyem. Thov Koj pab nyuam yaus nco ntsoov hais tias txawm yuav npluanuj, txomnyem, los nyuam yaus yuav ua lub neej qhia tshwm Koj kev ua zoo rau lwm tus. Amees.
Peb ua dabtsi kom muaj nyiaj rau tus kheej, tsev neeg thiab pab tau lwm tus?
Nyeem Vajluskub hauv peb lub xyoos: Yelemis 16
Kênh Youtube BHKTHN:
