Yelemis 39:1-8
Nqe cim:
“Nenpukajnexales muab Xedekiyas cov tub tua tabmeeg Xedekiyas hauv lub nroog Lilas, thiab nws kom luag muab cov Yudais tej nomtswv tua huv tibsi. Tom qab ntawd nws muab Xedekiyas ob lub qhovmuag kaus povtseg thiab muab saw hlau khi Xedekiyas cab mus rau tebchaws Npanpiloos lawm” (Yelemis 39:6-7).
Lus nug rau sawvdaws xav:
- Vajntxwv nrog rau tej nomtswv thiab tus ntsa yeej lub nroog Yeluxalees raug puastsuaj zoo li cas?
- Vajntxwv Nenpukajnexales rau txim li cas rau Xedekiyas?
- Thaum tau Vajtswv ntuas tsimnyog peb yuav tsum ua li cas?
Npanpiloos cov tub rog tuaj vij lub nroog Yeluxalees muaj li ib xyoo ntau, thaum kawg nroog Yeluxalees “raug tawg ntsa yeej pob tas”. Tas nrho Npanpiloos tej nomtswv qib siab “los teeb chaw ua haujlwm rau ntawm lub roojvag nruab nrab” (nqe 3) qhia tau hais tias nroog Yeluxalees poob rau Nenpukajnexales txhais tes lawm tiag. Thaum vajntxwv Xedekiyas pom li ntawm nws thiaj khiav tawm hauv nroog thaum ib tag hmo “…hla vajntxwv lub vaj mus rau ntawm lub roojvag uas nyob kem nruab nrab ntawm ob txheej ntsayeej mus rau tom lub hav Yauladees” (nqe 4). Tiamsis thaum ntawd tsis muaj sijhawm rau vajntxwv Xedekiyas lawm, nws thiaj raug cov tub rog ntes tau thiab cab nws los rau vajntxwv Nenpukajnexales ntawm lub nroog Lilas uas nyob cheebtsam Hamas. Thaum ntawd Xedekiyas tsuas pom tej xwm txaus ntshai uas yog luag muab nws tej tub, cov Yudais tej nomtswv tua tabmeeg rau nws ntsia ntsoov. Tom qab ntawd, vajntxwv Nenpukajnexales tso cai “muab Xedekiyas ob lub qhovmuag kaus thiab muab saw hlau khi nws cab mus tim Npanpiloos lawm” Npanpiloos cov tub rog tso taws hlawv Xedekiyas tej vajtse kub hnyiab tas thiab tsoo lub nroog Yeluxalees tej ntsayeej pob piam tas (nqe 7-8).
Qhov uas Vajtswv ua siab ntev tsis yog zam cia ua kev txhaum, tiamsis thaum Vajtswv ua siab ntev txaus lawm ces Nws yeej yuav rau txim xwb xwb. Thaum raug Vajtswv rau txim, lub nroog Yeluxalees tsis muaj tshwjchim lawm, raug poob mus rau lwm haiv neeg txhais teg thiab tus vajntxwv kav lub nroog tsis muaj sijhawm khiav dim li. Yog vajntxwv Xedekiyas paub mloog lus ntuas, ua raws li tus cev Vajtswv lus Yelemis hais ces tej xwm txaus ntshai yeej tsis muaj tshwm los (Yelemis 38:20). Thaum vajntxwv ob lub qhovmuag tseem ntsia pom ces vajntxwv tsis xam pom kev mloog Vajtswv lus. Thaum kawg ces vajntxwv yuav tsum raug Vajtswv rau txim raws li Vajtswv twb xub hais ua ntej lawm. Thaum raug rau txim, vajntxwv tsis ntsia pom ib yam dabtsi, tsuas nyob tsaus ntuj nti thiab tsis muaj sijhawm tig rov kho ntxiv li lawm.
Peb txhua tus tibneeg tau Vajtswv tus uas tsim txhua yam pub muaj ob lub qhovmuag saib pom txhua yam thiab tshwjxeeb yog cia los saib Vajtswv tej haujlwm los ntawm Nws lub fwjchim. Yog ob lub qhov muag nqaij tawv pom kev tiamsis ob lub qhov muag sab ntsujplig plag ntsia tsis pom tus Tswv thiab tsis paub mloog tus Tswv tej lus ntuas, ces muaj ib hnub twg yuav tsis muaj sijhawm rau yus. Vajtswv txojlus hais tias: “Tus uas ntseeg leej Tub yuav tau txojsia ntev dhawv mus ibtxhis, tiamsis tus uas tsis mloog leej Tub tej lus yuav tsis tau txojsia; Vajtswv yuav rau txim rau tus ntawd” (Yauhas 3:36). Vaj Ntsujplig niaj hnub qhia hauv txhua tus tibneeg lub siab. Vim yog kev hlub, Vajtswv thiaj ua siab ntev rau peb sawvdaws kom nyias muab nyias tej kev txhaum pov tseg (II Petus 3:9). Thaum txog tus Tswv hnub lawd, txawm peb yuav lees txim thiab tso kev txhaum tseg los tsis muaj sijhawm li lawm, peb tsuas raug Vajtswv rau txim thiab poob mus rau qhov tsaus ntuj lawm xwb ntag.
Thov Vajtswv,
Vajtswv tus uas muaj lub siab hlub! Thov Koj pub kom nyuam yaus muaj tswvyim, txawj siv txhua lub sijhawm uas Koj pub kom muaj nqis, tsis tawv ncauj, tsis ua siab qeeb rau Koj tej lus ntuas thiab ua raws li koj qhia txhua hnub. Amees.
Peb kev ua raws li Vajtswv tej lus ntuas zoo li cas?
Nyeem Vajluskub hauv peb lub xyoo: Yelemis 8
Kênh Youtube BHKTHN:
