Henplais 3:7-19
Nqe cim:
“Cov kwvtij, nej yuav tsum ceevfaj zoo nyob tsam nej cov muaj ib tug muaj lub siab phem thiab tsis ntseeg, nws cia li tso Vajtswv tus uas muaj sia nyob tseg” (Henplais 3:12).
Lus nug rau sawvdaws xav:
- Cov neeg Yixalayees uas ntxeev siab rau tus Tswv lawv tau txais dabtsi?
- Cov neeg Yixalayees lub neej qhia cov ntseeg tiam no txog yam dabtsi?
- Peb kawm tau yam dabtsi ntawm cov Yixalayees hauv zaj kawm hnub no?
Haiv neeg Yixalayees lub neej ua luag qhev 400 xyoo txomnyem ntsuav nyob nram teb chaws Iziv thiab lawv quaj qw taij thov Vajtswv pab tsis tseg. Vajtswv pom lawv tej kev txomnyem thiaj siv Mauxes pab lawv tawm los rau lub tebchaws Kana-as uas “zoo qoobloo” kom lawv tau zoo noj nyob. Ncua kev tawm nram Iziv tebchaws los, lawv pom Vajtswv ua ntau yam txujci, ib yam li tso 10 yam subtawg sub ntsha los raug cov neeg Iziv, ua rau hiav txwv faib rhe zoo li ntsa tsua, siv tauv fuab thiab tus nplaim taws coj lawv kev… Txawm li ntawd los, thaum los txog ntawm ciam Tebchaws Coglus Tseg, 10 tus hauv 12 tus tub mus soj tebchaws rov los txog lawv hais rau cov pejxeem sawvdaws hais tias: “peb tseem tsis tau muaj zog txaus yuav mus tua lawv; cov neeg uas nyob tid muaj zog heev” (Teev Npe 13:31). Cov neeg ntawd ua rau cov pejxeem tsis cia siab rau Vajtswv, tawm tsam Mauxes thiab nrhiav tus coj lawv rov mus rau nram Iziv tebchaws. Nuj nqis ntawm qhov uas lawv ntxeev siab rau Vajtswv yog ua rau haiv neeg Yixalayees ncig mus ncig los tom tiaj suab puam 40 xyoo, kom phaum neeg tawm nram Iziv tebchaws los tuag tas huv tibsi tsis tau txais Tebchaws Coglus Tseg, tsuas tshwj Yausuas thiab Kalej xwb.
Tus sau phau Henplias xav muab haiv neeg Yixalayees lub neej tsis mloog lus los qhia cov ntseeg Yexus txhua tiam: “yuav tsum paub ceevfaj zoo nyab tsam nej cov muaj ib tug muaj lub siab phem thiab tsis ntseeg, nws cia li tso Vajtswv tus uas muaj sia nyob tseg” (nqe 12). Cov neeg muaj lub siab tsis ntseeg yuav tsis tau mus nrog Vajtswv so ib zaug li (nqe 18-19). Muaj ib txhia txhais lo lus mus nrog Vajtswv so hauv tebchaws Kana-as yog xav hais txog kev mus nrog Vajtswv nyob saum Ntuj Ceebtsheej ntag. Tiamsis txawm los txog rau lub tebchaws Kana-as los tseem muaj kev sib ntaus sib tuas, yog li ntawd yog muab piv rau Ntuj Ceebtsheej ces tsis tshua phim. Kx. Warren Wiersbe txhais hais tias, so hauv tebchaws Kana-as yog hais txog kev tau so hauv sab ntsujplig uas Vajtswv cog lus muab pub rau cov ntseeg Yexus. Tiamsis cov tsis tso siab rau Vajtswv Txojlus, tsis muaj kev ntseeg ces zoo li cov Yixalayees uas tau tawm hauv tebchaws Iziv lawm tiamsis “tsis tau mus rau hauv tebchaws Kana-as”.
Muaj qee leej ntseeg, twb lees yuav Yexus ua tus Tswv Cawmseej, twb tau txais kev dim lawm, tiamsis tseem tsis tso siab rau Vajtswv Txojlus, ua neeg tawv ncauj thiaj tsis tau so hauv sab ntsujplig. Vajtswv Txojlus ntuas peb cov ntseeg hais tias:“Nej ib leeg yuav tsum niaj hnub pab ib leeg thaum peb tseem hu tau hais tias hnub no, yog nej ua li ntawd, kev txhaum yuav ntxias tsis tau nej ib tug twg ua neeg tawv ncauj” (nqe 13). Yog li ntawd, peb cov ntseeg txhua tus yuav tsum ceevfaj kev ua neej thiab sib qhia kom ua tau lub neej zov tos, zeem paub tus Tswv tej lus qhuab ntuas, tso kev txhaum tseg thiaj tau lub neej txais koob hmoov puv ntoob hauv tus Tswv.
Thov Vajtswv
Tus Tswv, thaum nyuam yaus yuam kev ua txhaum, thov Vaj Ntsujplig los qhia nyuam yaus paub lees kev txhaum thiab tig los nrhiav Koj kom tau txais lub neej puv ntoob, tau koob hmoov thiab tau so hauv tus Tswv Koj mus li. Amees.
Puas muaj yam kev txhaum twg tabtom tav peb kev tsis tau los so ntawm sab ntsujplig hauv tus Tswv?
Nyeem Vajluskub hauv peb lub xyoo: Yelemis 1:1-2:3
Kênh Youtube BHKTHN:
