Klei Aê Diê Blŭ: Hêbrơ 3:7-19
Êlan kliăng: “Ơ phung ayŏng adei, răng bĕ, huĭdah sa čô hlăm phung diih mâo ai tiê jhat amâo đăo ôh, atăt diih lui wir Aê Diê hdĭp.” (Hêbrơ 3:12)
Klei êmuh ksiêm mĭn: Si phung Israel khăng ai tiê amâo čiăng đăo leh anăn ya boh diñu mă tŭ? Ya klei hriăm hƀuê ênuk phung Israel hưn êlâo brei phung đăo răng kơ ya mta klei? Ya klei hriăm kơ drei tơdah ƀuh phung Israel amâo dưi mŭt hlăm anôk mdei?
Phung ƀuôn sang Israel dôk hdĭp êbeh kơ 400 thŭn knap mñai jing hlŭn ti Êjip leh anăn amâo mdei ôh ur krao hŏng Khua Yang. Khua Yang mđing uêñ kơ boh klei diñu dôk găn, kyuanăn yua Y‑Môis bi mtlaih leh anăn atăt diñu nao kơ čar Kanaan “anôk bŏ hŏng êa ksâo leh anăn êa hnuê” čiăng brei diñu dưi mdei. Hlăm knhuang anăn, diñu ƀuh ti anăp lu klei yuôm bhăn Aê Diê ngă, dơ̆ng mơ̆ng bruă Ñu mtrŭn 10 mta klei knap mñai huĭ hyưt ti čar Êjip, ngă kơ Êa Ksĭ Hrah bi mbha dua nah, dôk mbĭt hŏng diñu hlăm kmeh knam leh anăn kmeh pui… ƀiădah hlăk truh ti knông lăn Čar Aê Diê Ƀuăn, 10 čô hlăm 12 čô nao ksiêm dlăng čar lŏ wĭt, lač snei, “Drei amâo dưi đĭ ngă kơ phung ƀuôn sang anăn ôh; kyuadah diñu jing ktang hĭn kơ drei” (Klei Yap 13:31). Diñu rah klei đing ngă kơ phung ƀuôn sang bi khăng ai tiê amâo đăo ôh, bi kdơ̆ng hŏng Y‑Môis leh anăn čiăng mdơ̆ng khua kiă kriê mkăn čiăng lŏ plăk wĭt kơ Êjip. Boh jing, hrô kơ klei dưi mŭt hlăm Čar Aê Diê Ƀuăn, diñu hiu rưng hlăm kdrăn tač tơl 40 thŭn, leh anăn jih gưl ênuk kbiă mơ̆ng Êjip, êngao kơ Y‑Yôsuê leh anăn Y‑Kalep, amâo mâo pô dưi mŭt mdei hlăm Čar Aê Diê Ƀuăn ôh.
Lŏ mñă kơ hƀuê ênuk phung Israel, pô čih hră Hêbrơ hưn êlâo brei phung đăo răng: “Ơ phung ayŏng adei răng bĕ huĭdah sa čô hlăm phung diih mâo ai tiê jhat amâo đăo ôh, atăt diih lui wir Aê Diê hdĭp” (êlan 12). Ai tiê amâo đăo srăng ngă kơ drei amâo dưi mŭt hlăm anôk mdei ôh (êlan 18-19). Mâo đa pô mblang anôk mdei hlăm čar Kanaan bi hmô kơ Ƀuôn Jăk. Ƀiădah, wăt dưi mŭt hlăm ƀuôn Kanaan leh dưn snăn phung ƀuôn sang Aê Diê ăt dôk bi blah nanao mơh, snăn tơdah anôk anăn jing rup bi hmô kơ Ƀuôn Jăk jing ka djŏ ôh. Khua pô mtô Warren Wiersbe mblang klei mdei hlăm čar Kanaan bi hmô kơ klei mdei hlăm klei jăk mơak myang ƀuăn brei kơ hlei pô đăo kơ Khua Yang Yêsu, bi hlei pô đing kơ Klei Aê Diê Blŭ leh anăn hdĭp hlăm klei amâo đăo ôh snăn “kbiă leh dưn mơ̆ng čar Êjip ƀiădah ăt ka dưi mŭt hlăm čar Kanaan mơh”.
Lu phung đăo wăt tơdah dưm klei đăo kơ Khua Yang Yêsu, mâo klei bi mtlaih kbiă mơ̆ng klei bi kmhal kơ klei soh, mă tŭ klei ƀuăn kơ klei hdĭp hlŏng lar, ƀiădah ăt dôk hdĭp rŭng răng suăi êmăn grăp hruê, ka mâo klei mdei sĭt hlăm klei jăk mơak myang ôh kyuadah adôk brei “ai tiê khăng kyua klei soh mplư” (êlan 13). Kyuanăn, grăp čô brei răng kơ klei hdĭp drei pô leh anăn đru bi mtô lač hdơ̆ng găp kăp dôk răng, hmăr pral ti anăp klei Khua Yang mñă, kăp kmhal klei soh mtam čiăng kơ klei hdĭp tui hlue Khua Yang mâo klei jăk mơak sĭt êbeh dlai.
Si ngă mâo mơ̆ ya mta klei soh dôk bi kgăn drei bi knal klei mdei hlăm klei jăk mơak myang Khua Yang?
Wah lač: Ơ Khua Yang, tơdah kâo ngă soh, akâo Yang Mngăt Jăk ƀuah ai tiê kâo leh anăn đru kâo dưi êdu êun, thâo kmhal leh anăn tui duah klei pap brei klei soh mơ̆ng Ih, čiăng kơ klei hdĭp kâo bŏ dlai klei jăk mơak leh anăn mdei hlăm klei khăp Ama.
Dlăng Klei Aê Diê Blŭ hlăm tlâo thŭn: Y‑Yêrêmi 1:1–2:3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
