Klei Aê Diê Blŭ: Bruă Phung Khua Ƀĭng Kna 16:16-34
Êlan kliăng: “Bi mni bĕ kơ Aê Diê hlăm jih jang klei truh; kyuadah klei anăn jing klei Aê Diê čiăng diih ngă hlăm Krist Yêsu” (I Têsalônik 5:18)
Klei êmuh ksiêm mĭn: Ya klei truh kơ êpul hiu hưn klei mrâo mrang jăk khua ƀĭng kna Y‑Pôl ti ƀuôn Philip? Ya klei Y‑Pôl leh anăn Y‑Silas ngă êjai arăng krư̆ bi hnuh digơ̆ hlăm war mnă? Ya klei truh hlăm war mnă leh anăn kơ phung hlăm sang khua mnă? Si êlan čiăng kơ drei dưi mmuñ bi mni kơ Khua Yang nanao?
Êpul hiu hưn klei mrâo mrang jăk khua ƀĭng kna Y‑Pôl dôk mtô mblang kơ Khua Yang ti ƀuôn Philip hlăm gưl hiu hưn Klei Mrâo Mrang Jăk tal dua. Tinăn mâo sa čô dĭng buăl mniê mâo yang jhat thâo hưn êlâo klei srăng truh ngă, hŏng klei ñu blŭ klei mdian, ñu bi mdrŏng kơ phung khua ñu. Khua ƀĭng kna Y‑Pôl suôt yang jhat kbiă đuĕ mơ̆ng mniê anăn hlăm Anăn Khua Yang Yêsu Krist. Phung khua mniê anăn ƀuh luč leh klei dưi ƀơ̆ng lu prăk snăn diñu mă čăp khua ƀĭng kna Y‑Pôl leh anăn Y‑Silas đoh ba digơ̆ ti anôk sang bruă knŭk kna, mčeh luar kơ digơ̆ bi rŭng hlăm ƀuôn. Phung khua phat kđi ka phat kđi ôh ƀiădah ruăt mtă brei arăng čăm digơ̆ hŏng giê, krư̆ digơ̆ hlăm war mmăt ti lam leh anăn bi hnuh jơ̆ng digơ̆.
Tŭ klei arăng mčeh luar, asei mlei ruă kyua arăng čăm, jơ̆ng arăng bi hnuh, hrô kơ klei ur krao, krah mlam mmăt dua čô hiu hưn Klei Mrâo Mrang Jăk anei lŏ wah lač leh anăn mmuñ kraih ktang mpŭ mni kơ Khua Yang hĭn êjai tơl jih jang phung mnă dôk mđing hmư̆! Asăp diñu mmuñ êjai krah mlam jing msĕ si mnơ̆ng ngă yang mnâo ƀâo mngưi mđung tơl truh ti jhưng mtao adiê! Khua Yang wĭt ngă hŏng klei bi yơ̆ng lăn ala prŏng snăk. Anei jing klei myang kyuadah jih jang ƀăng bhă war mnă pŏk sơăi leh anăn klei săng đai phung mnă tlaih jih. Khua mnă čiăng bi mdjiê asei ñu pô kyua ñu mĭndah phung mnă đuĕ leh. Ƀiădah khua ƀĭng kna Y‑Pôl ghă ñu, bi hơĭt ai tiê ñu hưn jih jang phung mnă ăt dôk tinei sơăi. Khua mnă bi mlih knhuah, buôn ti jơ̆ng digơ̆ dua leh anăn êmuh ya ñu srăng ngă čiăng mâo klei bi mtlaih? Leh hmư̆ mblang kơ klei đăo klei bi mtlaih, jih jang phung hlăm sang ñu hơ̆k mơak jum Khua Yang leh anăn tŭ klei ngă baptem mlam anăn mtam.
Bi mni leh anăn mmuñ mpŭ mni kơ Khua Yang êjai mâo klei găl jing klei êlưih thâo săng; ƀiădah mmuñ mpŭ mni hŏng ai tiê sĭt hlăm klei truh mmăt tĭt sĭt yơh amâo djŏ jing klei êlưih ôh. Ƀiădah Khua Yang čiăng kơ drei bi mni kơ Ñu hlăm jih jang klei truh (I Têsalônik 5:18). Khua pô hưn êlâo Y‑Haƀakuk hưn klă: “wăt tơdah ana boh hra amâo bi mnga ôh, kăn mâo boh rei ti phŭn boh kriăk ƀâo… Ăt kâo srăng hơ̆k hlăm Yêhôwa, kâo srăng mơak hlăm Aê Diê Pô bi mtlaih” (Y‑Haƀakuk 3:17a-18).
Klei blŭ sa klei mmuñ: “yang hruê ăt mtrang mngač, ti tluôn tal knam mmăt, … wăt tơdah tĭng nah adih êyui ƀơƀhĭl, kngan Ñu ăt atăt êlan.” Êlan čiăng dưi bi mni kơ Khua Yang hlăm jih jang klei truh jing “… kyuadah klei anăn jing klei Aê Diê čiăng diih ngă hlăm Krist Yêsu” (I Têsalônik 5:18b). Thâodah klei jhat amâodah klei jăk, klei ênguôt amâodah klei mơak truh kơ drei, ti tluôn klei anăn mâo nanao klei Aê Diê kiă kriê (msĕ si klei truh kơ Y‑Yôp). Bi mni bĕ kơ Khua Yang nanao kyuadah đăo sĭt boh tŭ ti knhal tuč Aê Diê brei jing klei jăk hĭn nanao.
Si ngă drei bi mni kơ Khua Yang hlăm jih jang klei truh mơ̆?
Wah lač: Ơ Khua Yang, tơdah klei truh jŭm dar kâo jing mmăt tĭt, akâo Ih mñă brei kâo angưr dlăng čiăng ƀuh Ama kâo, Aê Diê Pô mâo jih klei myang leh anăn klei kpă ênô ăt dôk ti jhưng mtao ti dlông kiă kriê jih jang klei truh čiăng kơ kâo mmuñ bi mni kơ Khua Yang nanao amâo mâo mdei.
Dlăng Klei Aê Diê Blŭ hlăm tlâo thŭn: Y‑Êsai 57
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
