Klei Aê Diê Blŭ: Y-Mathiơ 11:7-11
Êlan kliăng: “Sĭt nik kâo lač kơ diih, đơ phung mnuih mniê kkiêng leh, amâo mâo pô prŏng hĭn kơ Y-Yôhan Pô Ngă Ƀaptem ôh; ƀiădah pô điêt hĭn hlăm ƀuôn ala mtao adiê jing prŏng hĭn kơ ñu.” (Y‑Mathiơ 11:11).
Klei êmuh ksiêm mĭn: Ya rup Khua Yang Yêsu yua čiăng lač kơ klei hdĭp Y-Yôhan pô ngă ƀaptem? Si Khua Yang klah čŭn kơ klei hdĭp ñu? Si Khua Yang lač kơ anôk phung dôk hlăm ƀuôn ala mtao? Ya klei hriăm mñă kơ drei mơ̆ng klei yăl dliê anei?
Leh phung ƀĭng kna Y-Yôhan wĭt, Khua Yang Yêsu mphŭn lač hŏng phung ƀuôn sang riêng gah Khua Yang kơ klei hdĭp Y-Yôhan. Tal sa, Khua Yang yua rup angĭn thut êyuh ana mbô bi êdah klei kjăp hlăm klei đăo Y-Yôhan, msĕ si mbô hdĭp hlăm kdrăn tač, wăt tơdah angĭn thut êyuh ƀiădah ñu ăt kgŭ, amâo joh êbuh ôh. Tal dua, Khua Yang ruah rup bi mklă hŏng rup phung hơô ao jăk siam čiăng lač kơ klei Y-Yôhan săn asei leh ngă bruă dưi jao (Y‑Markôs 1:6), ñu ruah klei hdĭp bi luă gŭ, amâo guôn mâo ƀơ̆ng mnơ̆ng jăk hơô ao siam ôh, ăt kăn čiăng dôk ti anôk mdrŏng sah msĕ si sang mtao rei, kyua ñu čiăng ngă mnuih mprăp ai tiê kơ phung ƀuôn sang Aê Diê. Tal tlâo, Khua Yang yua rup sa čô khua pô hưn êlâo. Ñu bi msĕ bruă klam yuôm bhăn Y-Yôhan hĭn kơ sa čô khua pô hưn êlâo wăt tơdah phung ƀuôn sang dlăng ñu msĕ si sa čô khua pô hưn êlâo (Y‑Mathiơ 14:5; 21:26), “hĭn” kyua Y-Yôhan amâo djŏ knŏng jing pô hưn êlâo hưn kơ Yang Mêsi đuč ôh ƀiădah lŏ ƀuh ti ală mta leh anăn ngă ƀaptem kơ Yang Mêsi, anăn jing klei pap prŏng prĭn Khua Yang brei kơ ñu.
Leh Khua Yang Yêsu klah čŭn bruă klam Y-Yôhan jing bruă dưi mpŭ lu hĭn kơ lu mnuih, kyua ñu mâo lu klei pap mơ̆ng Aê Diê. Amâo mâo ôh hlei khua pô hưn êlâo amâodah anak mnuih ti anăp Y-Yôhan dưi mâo klei pap msĕ si ñu, leh anăn Khua Yang lŏ lač: “ƀiădah pô điêt hĭn hlăm ƀuôn ala mtao adiê jing prŏng hĭn kơ ñu.” Khua Yang Yêsu čiăng bi msĕ klei pap plah wah mnuih hlăm klei bi mguôp hđăp leh anăn klei bi mguôp mrâo. Jing khua pô hưn êlâo knhal tuč mơ̆ng Klei bi mguôp hđăp, Y-Yôhan dưi dlăng jing pô dưi mâo klei pap lu hĭn hlăm klei bi mguôp hđăp, ƀiădah grăp čô “hlăm ƀuôn ala mtao adiê” dưi thâo lu klei pap hĭn kơ Y-Yôhan, anăn jing thâo klei khăp kluôm ênŭm mơ̆ng Khua Yang Yêsu ti kyâo bi kal, thâo klei Ñu lŏ hdĭp, dưi rơ̆ng kơ klei hdĭp lă lar hlăm hruê knhal tuč… Anăn jing mta phŭn Khua Yang Yêsu lač kơ phung điêt hĭn hlăm ƀuôn ala mrâo adiê jing prŏng hĭn kơ Y-Yôhan.
Phung đăo kơ Krist jing phung tŭ mă leh klei pap Aê Diê brei hlăm klei Khua Yang Yêsu djiê hrô klei soh ti kyâo bi kal, grăp čô brei thâo klei pap sĭt dưi dôk hlăm Khua Yang čiăng mơ̆ng bruă ngă leh anăn klei blŭ drei mpŭ mni
Klei hdĭp drei dôk mpŭ mni Anăn Aê Diê mơ̆?
Wah lač: Ơ Khua Yang, kâo bi mni lač jăk kơ Ih kyua Ih bi mtlaih leh kâo, akâo kơ Ih đru kâo hdĭp nanao hlăm klei đăo kjăp kơ Khua Yang, leh anăn jing dĭng ktang hiu hưn Ƀuôn ala mtao adiê grăp hruê kơ lu phung riêng gah kâo.
Dlăng Klei Aê Diê Blŭ hlăm tlâo thŭn: Y‑ Êsai 12:1 – 13:22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
