Mathais 11:7-11
Nqe cim:
“Kuv qhia tseeb rau nej hais tias txhua tus uas yug los ntawm pojniam, tsis muaj ib tug muaj hwjchim npaum li Yauhas tus uas muab neeg ua kevcai raus dej. Tiamsis tus uas yau tshaj nyob saum ntuj Ceebtsheej, tus ntawd tseem muaj hwjchim loj dua Yauhas thiab” (Mathais 11:11).
Lus nug rau sawvdaws xav: Tswv Yexus siv cov duab twg los qhia txog Yauhas Npatitus lub neej? Nws xaus lus li cas txog Yauhas lub neej? Tus Tswv hais txog cov neeg uas tau nyob saum ntuj ceebtsheej li cas? Peb kawm tau dabtsi hauv zaj lus no?
Tom qab uas Yauhas tus uas muab neeg ua kevcai raus dej (lossis muaj dua lub npe hu Yauhas Npatitus) cov thwjtim rov mus lawm, Tswv Yexus txawm qhia rau cov neeg coob coob nyob puagncig Nws txog Yauhas Npatitus lub neej. Tim ib, tus Tswv siv tus tauj iab uas cua tshuab rawv mus rawv los qhia txog Yauhas Npatitus txojkev ntseeg sawv ruaj khov tsis qaug, zoo li tus tauj iab nyob hauv tiaj suabpuam, txawm yog cua tshuab rawv mus rawv los nws yeej sawv taus, tsis qaug li. Tim ob, tus Tswv siv tus neeg hnav tsoos tsho zoo zoo los hais txog Yauhas Npatitus lub neej fij tus kheej thaum ua tes haujlwm tus Tswv muab (Malakaus 1:6), Yauhas xaiv lub neej tsis tau hnav tej tsoos tsho zoo, kuj tsis nyob qhov chaw zoo zoo ib yam li tsev vajntxwv, vim nws xav ua tus uas kho kev tos tus Tswv. Tim peb, tus Tswv siv tus duab cevlus. Nws muab Yauhas Npatitus tes haujlwm cev Vajtswv lus saib loj dua lwm tus cevlus, rau qhov cov pejxeem saib Yauhas zoo ib yam li cov cevlus ibtxwm xwb (Mathais 14:5; 21:26), “loj dua” vim Yauhas Npatitus tsis yog ib tug tub tshajtawm txog tus Mexiyas xwb, nws tseem pom tim ntsej tim muag thiab ua kevcai raus dej rau tus Mexiyas, qhov no yog txoj koob hmoov uas tus Tswv pub rau Yauhas.
Ces Tswv Yexus xaus lus hais tias Yauhas Npatitus tes haujlwm yog tes haujlwm uas tsimnyog saib tseemceeb, vim nws tau txais ntau txoj koob hmoov ntawm Vajtswv. Tsis muaj leejtwg hauv cov cevlus lossis cov neeg nyob ua ntej Yauhas tau txais koob hmoov li nws, tus Tswv hais ntxiv: “Tiamsis tus uas yau tshaj nyob saum ntuj Ceebtsheej, tus ntawd tseem muaj hwjchim loj dua Yauhas thiab”. Tswv Yexus muab txoj koob hmoov hauv tej lus cog tseg qub piv rau txoj koob hmoov hauv tej lus cog tseg tshiab. Yog ib tug cev Vajtswv lus kawg ntawm Phau Vajluskub Qub, hais tau hais tias Yauhas Npatitus yog tus cevlus uas tau koob hmoov ntau tshaj nyob rau tiam Vajtswv tej lus cog tseg qub, tiamsis cov uas nyob “saum ntuj Ceebtsheej” puavleej yuav tau txais koob hmoov ntau dua Yauhas Npatitus, qhov no yog qhov uas tau txais txojkev hlub puv ntoob uas Tswv Yexus los tuag saum tus ntoo khaublig, tau txais lub cev tshiab uas nrog Nws sawv, tau txojsia ntev dhawv mus ibtxhis… Qhov no yog lub vimchiv Tswv Yexus hais tias cov neeg yau tshaj nyob saum ntuj Ceebtsheej tseem muaj hwjchim loj dua Yauhas.
Cov ntseeg Yexus yog cov neeg uas twb tau txais Vajtswv txoj koob hmoov los ntawm Tswv Yexus txojkev tuag txhiv saum tus ntoo khaublig, txhua tus cheemtsum zeem paub txoj koob hmoov uas nyob hauv tus Tswv kom tes haujlwm hauj thiab tej lus peb hais ua rau tus Tswv tau ntsejmuag.
Thov Vajtswv,
Tus Tswv, nyuam yaus ua Koj tsaug vim Koj cawm nyuam yaus, thov Koj pab kom nyuam yaus tuav tau kev ntseeg ruaj khov, thiab niaj hnub qhia Koj lub tebchaws rau lwm tus. Amees.
Peb lub neej puas tau ua kom tus Tswv tau ntsejmuag?
Nyeem Vajluskub hauv peb lub xyoos: Yaxayas 12:1-13:22
Kênh Youtube BHKTHN:
