Klei Aê Diê Blŭ: Hêbrơ 2:1-4
Êlan kliăng: “…Tal êlâo Khua Yang hưn klei bi mtlaih anăn, leh anăn phung hmư̆ leh Ñu hưn bi sĭt kơ hmei” (Hêbrơ 2:3b).
Klei êmuh ksiêm mĭn: Ya klei pô čih hră Hêbrơ lač kơ klei dlăng hơăi mang kơ klei bi mtlaih? Si ngă klei bi mtlaih jing “prŏng snăn”? Si ngă mâo mnuih amâo ƀuh ôh kơ klei bi mtlaih jing “prŏng”? Ya bruă brei drei ngă čiăng bi êdah klei thâo hdơr knga kơ klei Khua Yang bi mtlaih prŏng prĭn snăn?
Êjai mñă kơ phung đăo brei thâo răng huĭdah srăng klah đuĕ mơ̆ng klei hdĭp mngăt, pô čih hră Hêbrơ bi djŏ guôp boh tŭ kŏ phung dlăng hơăi mang kơ klei blŭ dĭng buăl jăk hiu hưn leh anăn klei bi mtlaih (êlan 2‑3). “Klei phung dĭng buăl jăk hưn” jing klei bhiăn (Galati 3:19), leh anăn hlei pô gao klei bhiăn srăng tŭ boh năng mơ̆ng klei anăn, hĭn êjai pô dlăng hơăi mang klei bi mtlaih srăng tŭ klei bi kmhal kjham kjhuê̆.
Hŏng klei bi djŏ guôp anăn, pô čih hră Hêbrơ kñăm klei bi mtlaih phung đăo jing “klei bi mtlaih prŏng snăn” . Mblang kơ boh klei anei jing yuôm bhăn êdimima. Tơdah klei bhiăn mơ̆ng phung dĭng buăl jăk hưn snăn klei bi mtlaih jing mơ̆ng Pô ti dlông hĭn kơ phung dĭng buăl jăk, jing Khua Yang Yêsu pô yơh ba hriê. Ñu amâo djŏ knŏng hưn klei pap bi mtlaih ôh ƀiădah wăt tŭ klei djiê ti kyâo bi kal čiăng bi tui klei soh jih jang mnuih čiăng kơ klei bi mtlaih anăn jing klei tŭ dưn kơ hlei pô đăo kơ Ñu: “êjai drei ăt jing mnuih soh Krist djiê kyua drei” (Rôm 5:8b).
Klei bi mtlaih anăn Khua Yang Yêsu hưn êlâo hĭn kơ phung hdĭp hlăm ênuk Ñu. Ênuk tal êlâo anei tŭ jum leh anăn “hưn bi sĭt” kơ ênuk lŏ čuê tui tluôn. Amâo djŏ knŏng dŭm anăn ôh, “Aê Diê hưn bi sĭt msĕ mơ̆h hŏng klei bi knăl, bruă myang, leh anăn lu mta klei yuôm bhăn, leh anăn hŏng klei Yang Mngăt Jăk brei mdê mdê bi mbha leh tui si klei Ñu čiăng” (êlan 4).
Đa đa mnuih dlăng hơăi mang kơ klei pap klei bi mtlaih kyuadah amâo dlăng kơ klei bi mtlaih jing “prŏng”. Năng ai diñu mĭndah mâo klei bi mtlaih jing msĕ si klei lŏ thiăm hlăm klei hdĭp diñu mâo bŏ ênŭm leh, tơdah mâo jing jăk, bi tơdah amâo mâo kăn mâo klei rei. Đa pô dlăng hơăi mang kơ klei bi mtlaih kyua dlăng jing “klei bhiăn mâo”, msĕ si diñu mĭndah “klei bi mtlaih jing bruă Aê Diê klam” kyuanăn diñu amâo mâo mđing uêñ ôh. Ƀiădah phung đăo drei, jing phung hơô Anăn Yang Krist hlăm asei mlei, brei thâo săng tơdah amâo mâo Yang Krist snăn drei knŏng jing hơăi mang, “klei kâo pô jing” hlăm phung drei ăt srăng jing jhat, ngă soh leh anăn mmăt tĭt. Boh tŭ ară anei mtam drei amâo thâo săng ôh klei yuôm klei hdĭp jing, leh anăn hruê êdei anăp hlŏng lar snăn čuăn leh kơ klei bi kmhal. Kyuanăn, đăm dlăng hơăi mang ôh kơ klei bi mtlaih. Klei bi mtlaih jing mnơ̆ng brei kơ drei ƀiădah tla leh hŏng klei hdĭp Anak Aê Diê. Brei drei hdĭp bi năng hŏng klei pap klei bi mtlaih hŏng klei thâo hdơr knga, ai tiê kkuh mpŭ leh anăn hur har mă bruă kơ Khua Yang.
Djŏ mơ̆ drei mă tŭ leh leh anăn dôk hdĭp hlăm klei bi mtlaih prŏng prĭn Khua Yang brei?
Wah lač: Bi mni lač jăk kơ Khua Yang Yêsu khăp leh leh anăn tŭ klei djiê hrô brei klei soh kâo čiăng kơ kâo dưi mă tŭ klei pap klei bi mtlaih prŏng snăn. Akâo Khua Yang đru kâo hdĭp năng hŏng klei pap klei bi mtlaih kâo mă tŭ leh leh anăn lŏ hưn bi sĭt klei anăn kơ arăng.
Dlăng Klei Aê Diê Blŭ hlăm tlâo thŭn: Y‑Êsai 5:8‑30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
