Henplais 2:1-4
Nqe cim:
“…tus Tswv yog tus uas xub qhia txojkev dim txim ntawd ntag. Cov neeg uas hnov Nws qhia, lawv qhia tseeb rau peb hais tias muaj li ntawd tiag” (Henplais 2:3b).
Lus nug rau sawvdaws xav: Tus uas sau tsab ntawv Henplais hais li cas txog qhov uas saib tsis taus txojkev dim txim? Vim li cas txojkev dim txim “tseemceeb”? Vim li cas muaj ibtxhia tsis pom txojkev dim txim tseemceeb? Peb yuav ua li cas kom peb qhia tshwm lub siab paub ua tus Tswv tsaug thaum tau txais txojkev dim txim?
Thaum ntuas kom cov ntseeg ua tib zoo ceevfaj tsam lub neej sab ntsujplig yuam kev, tus uas sau tsab ntawv Henplais hais txog nqi zog rau tus uas saib timtswv ceebtsheej tej lus thiab txojkev dim txim tsis tseemceeb (nqe 2-3). “Tej lus uas cov timtswv ceebtsheej qhia” yog txoj kevcai (Kalatias 3:19), thiab tus uas ua txhaum txoj kevcai yuav raug txim, tus uas saib txojkev dim txim tsis tseemceeb haj yam yuav raug txim hnyav heev.
Tus uas sau tsab ntawv Henplaus hais tias txojkev dim txim ntawm tus uas ntseeg yog “txojkev dim txim tseemceeb”. Txhais tau hais tias yog qhov no tseemceeb kawg nkaus li. Yog tias txoj kevcai yog cov timtswv ceebtsheej qhia, ces txojkev dim txim yog tus uas muaj hwjchim loj dua cov timtswv uas yog Tswv Yexus coj los pub rau neeg. Nws tsis yog los qhia txojkev dim txim tiamsis Nws los tuag saum tus ntoo khaublig ua txojkev cawm dim rau neeg ntiajteb kom lawv dim txim thaum lawv los ntseeg Nws: “Thaum peb tseem ua neeg txhaum Yexus Khetos tuag txhiv peb” (Loos 5:8b).
Tswv Yexus twb qhia txojkev dim txim no ua ntej rau cov neeg uas nyob rau tiam Yexus los yug lawm. Tiam neeg ntawd lawv los ntseeg thiab ua timkhwv qhia rau tiam txuas ntxiv. Tsis yog li ntawd xwb, “Vajtswv tseem ua tej txujci loj thiab tseemceeb thiab ua tej uas qhia Nws lub hwjchim rau sawvdaws pom hais tias yeej muaj li lawv hais tiag. Thiab Vajtswv pub Vaj Ntsujplig tus dawbhuv rau sawvdaws raws li Vajtswv pom zoo pub” (nqe 4).
Muaj ibtxhia pheej saib txojkev dim txim tsis tseemceeb vim saib qhov ntawd tsis muaj nqis. Tej zaug lawv xav hais tias dim txim kuj zoo ib yam li ib feem ntxiv rau lub neej kom puv ntoob, yog muaj no kuj zoo, tiamsis tsis muaj los tsis ua cas. Muaj ibtxhia saib txojkev dim txim tsis tseemceeb, rau qhov lawv xav hais tias “yeej tsimnyog tau”, lawv hais tias “txojkev cawm dim yog tus Tswv feem xyuam yeej yuav ua rau sawvdaws”, yog li lawv tsis quavntsej. Tiamsis peb yog cov ntseeg Yexus, peb yuav tsum totaub hais tias yog tsis muaj Yexus Khetos ces yus yeej ua tsis tau ib dabtsi li, peb tus yamntxwv yim hnub yim ua phem zuj zus hauv qhov tsaus ntuj xwb. Tau nqi zog thaum tseem ua neej nyob, thiab ib hnub yuav raug txim. Yog li ntawd, tsis txhob saib tsis taus txojkev dim txim. Txojkev dim txim yog Vajtswv pub rau Nws cov menyuam dhau los ntawm Yexus txojkev tuag txhiv. Cia li ua neej kom tsimnyog txojkev dim txim los ntawm lub siab paub ua tsaug, pehawm Vajtswv thiab rau siab ntso ua tus Tswv haujlwm.
Thov Vajtswv,
Nyuam yaus ua Tswv Yexus tsaug, vim Koj hlub thiab tuag txhiv nyuam yaus, pub txojkev dim txim tseemceeb rau nyuam yaus. Thov Koj pab kom nyuam yaus paub ua neej kom tsimnyog txojkev cawm dim Koj pub. Amees.
Puas yog peb twb tau txais thiab tabtom ua neej nyob hauv tus Tswv txojkev dim txim uas loj kawg nkaus?
Nyeem Vajluskub hauv peb lub xyoos: Yaxayas 5:8-30
Kênh Youtube BHKTHN:
