Pajlug 17:26-28
Nqe cim:
“Txawm yog tus ruam los yog nws nyob twjywm, ces luag xav hais tias nws ntse. Nws tsis hais lus luag suav hais tias nws yog tus muaj tswvyim” (Pajlug 17:28).
Lus nug rau sawvdaws xav:
- Vajntxwv Xalumoos qhia hais tias, xyaum ua twjywm muaj qab hau li cas?
- Vim li cas tus neeg ua twjywm luag suav hais tias nws muaj tswvyim?
- Peb yuav tau txuag qhov ncauj li cas kom muaj qab hau rau cov mloog thiab ua rau Vajtswv tau ntsejmuag?
Vajntxwv Xalumoos qhia nws tej me nyuam ua neej muaj tswvyim los ntawm kev paub ua zoo txhua fab. Hais txog fab uas zoo, muaj lub siab ncaj thiab paub rau txim rau cov ua txhaum yog cai. Cov neeg tsis muaj tswvyim thiab tsis ncaj ncees pheej txiav txim tsis ncaj thiab txiav txim yuam kev. Hais txog tej haujlwm tau ua, vajntxwv hais los mus rau tej lus hais. Tus neeg ruam yeej tsis paub hais tej lus txawj ntse, vim “Tus neeg uas thoob tsib to nrog tsis ntau ncauj” (nqe 7). Thiab tus neeg thoob tsib to nrog yeej tsis hais tej lus ruam. Yog ua twjywm, ces luag tsis paub peb yog tus neeg zoo li cas, tiamsis thaum tham ntau luag yuav ntau nqi yug yog neeg ruam. Tus neeg muaj tswvyim yeej ceev nws tej lus hais, mam xav mam hais. Txawm hais tias, yus tsis yog neeg muaj tswvyim, tiamsis thaum tswj tau ua twjywm ces suav hais tias yog neeg muaj tswvyim. Thaum ua twjywm, muaj sijhawm rau yus xav txhua yam mus tshab thiab qaij tau hais lus yuam kev, lus tsis muaj qab hau: “Thaum cov neeg txawj ntse hais lus, lawv hais tej lus ntse ntsuav, tiamsis cov neeg ruam hais lus tsis muaj hauvpaus hauvntsis” (Pajlug 15:2). Tswj tau kev chim, tsis hais tej lus tsis muaj qab hau yog qhia tshwm txog yog neeg muaj tswvyim.
Yog li ntawd, yam twg yus paub ces mam teb, mam tham, yam twg tsis paub ces ua twjywm mloog thiab nug kom paub. Ib yam muaj tseeb nim no hauv lub neej peb pom cov neeg muaj tswvyim ces tham tsawg, hais lus tsawg, cov neeg ruam ces tham ntau, hais ntau tiamsis tsuas hais tej lus qhuav xwb tsis muaj qab hau. Thaum lawv yim tham ntau, yim ua rau luag pom lawv kev ruam, yog zoo ces lawv txhob hais ntau yuav muaj qab hau rau lawv dua.
Yog ib tus ntseeg Yexus, peb tej lus hais yuav tsum qhia tshwm hais tias peb yog Vajtswv cov menyuam. Thaum peb yuav tham lus, lossis hais ib yam dab tsi, yuav tau ua tib zoo xav kom thoob, saib puas ncaj ncees, puas dawbhuv mam hais Tej lus peb hais yuav tsum yog chaw, yog sijhawm thiab haum lub caj nyoog. Timthawj Paulus qhia cov ntseeg hauv nroog Efexus hais tias: “Nej tsi txhob hais lus twm lwm tus, tiamsis nej yuav tsum hais tej lus zoo xwb thiaj muaj nqis rau cov uas mloog” (Efexus 4:29). Cia siab hais tias, peb txhua tus uas yog Vajtswv me nyuam yuav kawm tau xyaum ua twjywm kom xav thoob thoob txhua lo lus ua ntej yuav hais. Thaum yog sijhawm hais lus, paub hais tej lus uas muaj qab hau rau cov mloog los ntawm cov lus ncaj ncees uas haum Vajtswv siab.
Thov Vajtswv,
Vajtswv tus uas yog Leej Txiv. Ua Koj tsaug uas Koj tau qhia nyuam yaus los ntawm Koj Txojlus. Thov Koj pab kom nyuam yaus tswj tau lub siab chim, paub tswj tej lus hais, kom paub hais tej lus muaj nqis rau cov uas mloog ua rau Vajtswv tau ntsejmuag. Amees.
Peb puas paub tswj tej lus hais kom muaj qab hau rau lwm tus mloog?
Nyeem Vajluskub hauv peb lub xyoo: Tej Lus Qhia 2
