II Xwmtxheej Vajntxwv 14:8-15
Nqe cim:
“Tus Tswv, koj muab txojkev kaj siab uas zoo kawg nkaus rau cov neeg uas muab siab npuab koj, vim lawv tso siab pluav rau koj.” (Yaxayas 26:3).
Lus nug rau sawvdaws xav:
- Vajntxwv Axas tab tom ntsib kev nyuaj dab tsi?
- Vajntxwv Axas ua li cas thaum ntsib nyuaj? Thaum kawg zoo li cas?
- Thaum ntsib kev nyuaj hauv lub neej, peb kheev ua li cas?
Cov Yudas tus vajntxwv Axas muaj txog tsib puas txhiab tus tubrog txawj ua rog nyob hauv nws tes, tiamsis Sudas coj tubrog tshaj ib npaug nws cov tuaj ua rog nrog rau Yudas. Thaum nyob hauv lub tsam thawj nyuaj li ntawd, vajntxwv tsis tas kev cia siab tiamsis nws “thov Vajtswv pab”. Hauv vajntxwv tej lus thov, nws hais tias; “tus Tswv uas yog peb tus Vajtswv” txog ob zaug (nqe 11) vim vajntxwv ntseeg hais tias Vajtswv yuav cawm nws cov neeg. Vajntxwv paub meej Vajtswv lub fwjchim thiab ntseeg hais tias, dhau ntawm Vajtswv lawm, yeej tsis muaj ib tug tswv twg pab tau cov tsis muaj zog yeej cov muaj zog ib zaug li. Thiab vajntxwv kuj ntseeg hais tias, tus Tswv yuav tsis cia tibneeg yeej Nws ib zaug li.
Vajntxwv thov Vajtswv hais tias “peb tso siab rau Koj”. Hauv nqe 11, vajntxwv hais tias“Koj pab peb” qhia tau hais tias nws tso siab npluav rau tus Tswv kev pab. Thaum ntsib kev nyuaj, vajntxwv tsis tig saib yeebncuab kev muaj zog lossis vamkhom tibneeg pab tiamsis nws tig mus cuag Vajtswv thiab tso siab rau Vajtswv kev pab cawm vim Vajtswv yog tus muaj fwjchim. Thaum tso siab tuag nthi rau Vajtswv kev pab lawm, “Tus Tswv ua rau cov tubrog Sudas swb” “Axas thiab nws cov tubrog caum cov Sudas tua mus ti nkaus lub nroog Nkelales. Cov tubrog Sudas tuag tas tsis seem ib tug” (nqe 12-13). Tua yeej pluav rog no yog tus Tswv, tsis yog Axas cov tub rog. Qhov uas cov Yudas tej tubrog tua yeej yeebncuab thiab txeeb tau yeebncuab tej khoom yog los ntawm tus Tswv pub, los ntawm lo lus: “ntau heev” thiab “ntau heev” (nqe 14-15).
Txawm hais tias yog ib tug neeg muaj siab npuab Vajtswv los, vajntxwv yeej dhia tsis dhau ntsib kev nyuaj, tiamsis los ntawm kev ntseeg pab tau vajntxwv muaj yeej. Thaum vajntxwv muaj lub neej ncaj ncees, tso siab rau tus Tswv thiab los thov tus Tswv pab, ces txawm yuav ntsib kev nyuaj loj npaum twg los yeej yuav pom Vajtswv lub fwjchim pab cawm loj npaum ntawd. Tus Tswv ua rau Nws haiv neeg pom lawv cov yeebncuab coob coob, kev nyuaj ntau heev, ces lawv yuav pom lawv cov yeebncuab ntog tuag yim ntau (nqe 9, 13) thiab yuav tau tej khoom uas txeeb tau los “ntau heev”. Kev thajyeeb yuav luag ploj ntawm haiv neeg Yudas mus, tiamsis lawv rov tau kev thajyeeb yog los ntawm vajntxwv Axas kev ntseeg thiab tso siab plhuav rau tus Tswv.
Cov ntseeg Yexus los ib yam nkaus li ntawd, yeej dhia tsis dhau kev nyuaj siab tuaj raug hauv lub neej (Yakaunpaus 1:2). Cia li ua li vajntxwv Axas los thov Vajtswv pab, tso siab plhuav rau tus Tswv, ntseeg thiab cia siab rau tus Tswv, peb yeej yuav pom Vajtswv lub fwjchim los ntawm Nws kev pab cawm.
Thov Vajtswv,
Tus Tswv, ua neej nyob yeej dhia tsis dhau kev nyuaj siab, tiamsis thov Koj pab kom nyuam yaus paub tso siab rau Koj, ntseeg Koj tas siab. Nyuam yaus ntseeg hais tias Koj yeej yuav pab raws li Koj lub siab nyiam. Amees.
Peb puas tso siab plhuav rau tus Tswv thaum ntsib kev nyuaj siab?
Nyeem Vajluskub hauv peb lub xyoo: Tej Lus Qhia 1
Kênh Youtube BHKTHN:
