Klei Aê Diê Blŭ: II Klei Yăl Dliê 14:8-15
Êlan kliăng: “Ih srăng brei klei êđăp ênang kơ hlei pô bi kjăp klei mĭn ñu,kyuadah ñu knang kơ Ih.” (Y‑Êsai 26:3).
Klei êmuh ksiêm mĭn: Ya klei dleh dlan mtao Asa tuôm? Ya klei ñu ngă čiăng msir klei dleh dlan? Si boh tŭ? Sĭt tuôm hŏng dleh dlan, si hdră drei khăng msir mgaih?
Mtao Asa čar Yuđa mâo hlăm kngan êpul lĭng kahan êma êtuh êbâo kahan bi blah ƀiădah khua kahan Y‑Sêra sa čô Êthiôpi ba leh kahan lu hĭn êbeh dua blư̆ nao blah. Ti anăp klei dleh dlan anăn, mtao Asa amâo luč klei čang hmăng ôh ƀiădah ñu “ur kwưh kơ Yêhôwa Aê Diê ñu”. Hlăm klei kwưh, mtao lač Aê Diê jing “Aê Diê hmei” truh dua blư̆ (êlan 11) kyua mtao đăo Aê Diê srăng bi mtlaih phung ƀuôn sang Ñu. Mtao thâo klei myang Aê Diê leh anăn đăo sĭt êngao kơ Ñu amâo mâo ôh pô đru phung êdu awăt dưi hŏng phung ktang. Leh anăn mtao ăt đăo kyua Anăn Aê Diê anăn Ñu srăng amâo brei kơ anak mnuih dưi hĭn kơ Ñu ôh.
Mtao Asa akâo kơ Aê Diê đru kyua ai tiê ñu kluôm dhuôm “đăo knang kơ Aê Diê”. Hlăm êlan 11, mtao mñă wĭt boh blŭ “đru” truh dua blư̆, bi êdah ai tiê đăo knang kluôm ênŭm kơ Aê Diê. Hlăm klei rŭng răng mtao amâo dlăng ôh hlăm ai ktang phung roh amâodah tui duah klei anak mnuih đru ƀiădah mtao dlăng kơ Aê Diê leh anăn knang kơ Ñu kyua Ñu jing Aê Diê pô myang. Klei tŭ jing “Yêhôwa brei Y‑Asa leh anăn phung Yuđa bi blah dưi hŏng phung Êthiôpi” leh anăn “Y‑Asa…tiŏ phung Êthiôpi truh ti ƀuôn Gêrar, leh anăn phung Êthiôpi êbuh djiê tơl amâo lŏ mâo sa čô dôk hdĭp ôh”, “diñu luč leh ti anăp Yêhôwa” (êlan 12-13). Anei jing klei dưi mơ̆ng Aê Diê amâo djŏ kyua êpul lĭng kahan Mtao Asa ôh. Amâo djŏ knŏng mblah dưi ôh, diñu lŏ mâo lu mta mnơ̆ng dhơ̆ng. Ya mnơ̆ng phung kahan Yuđa mâo mă hlăm klei mblah dưi jing kyua Aê Diê brei leh anăn jing “lu snăk”, dưi mñă wĭt mñă nao truh tlâo blư̆: “Diñu plah mă mnơ̆ng hlăm jih jang ƀuôn” “kyuadah mâo mnơ̆ng lu snăk tinăn” “puh ba lu biăp bê leh anăn aseh samô” (êlan 14-15).
Wăt tơdah jing mnuih huĭ mpŭ, Mtao Asa ăt kăn ñĕ mơh mơ̆ng klei rŭng răng ƀiădah kyua klei đăo dưi mâo klei dưi. Leh mtao “ngă klei jăk leh anăn djŏ” (êlan 2) knang kơ Aê Diê, kwưh kơ Ñu, mâo sa klei hdĭp bi mơak kơ Ñu snăn klei lông dlăng ƀrư̆ prŏng ngă kơ mtao leh anăn phung ƀuôn sang thâo lu hĭn kơ klei myang Aê Diê bi mtlaih. Aê Diê brei leh kơ phung ƀuôn sang Ñu ƀuh phung roh knư̆ lu, klei dleh dlan knư̆ lu snăn diñu ƀuh phung roh “êbuh djiê” knư̆ “lu” mơh (êlan 9,13) leh anăn mnơ̆ng dhơ̆ng diñu mâo mă lu snăk. Klei êđăp ênang msĕ si dơ̆ng luč ti Yuđa dưi lŏ bi mrâo kyua klei đăo leh anăn klei mtao Asa knang kơ Aê Diê.
Phung đăo kơ Krist mâo nanao klei lông dlăng dleh dlan hlăm klei hdĭp (Y‑Yakơ 1:2). Brei msĕ si Mtao Asa jih ai tiê kwưh akâo kơ Aê Diê, đăo knang kơ klei myang Aê Diê, lŏ dơ̆ng êbat kyua klei đăo leh anăn gưt asăp, drei srăng thâo klei Aê Diê bi mtlaih leh anăn klei hdĭp mngăt hriê kơ prŏng hĭn.
Drei mđing tui duah leh anăn knang kơ Aê Diê sĭt tuôm hŏng klei dleh dlan lông dlăng mơ̆?
Wah lač: Ơ Khua Yang klei hdĭp ti lăn ala mâo lu klei dleh dlan lông dlăng ƀiădah kâo myơr kơ Ih jih klei dleh dlan lông dlăng kâo. Kâo đăo knang kơ Ih. Kâo đăo Aê Diê srăng hmư̆ klei kâo akâo hlue si hdră čiăng.
Dlăng Klei Aê Diê Blŭ hlăm tlâo thŭn: Khua Pô Mtô 1:1‑18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
