II Kauleethaus 5:1-10
Nqe cim:
“Txawm yog li cas los peb yeej yuav ua raws li Vajtswv lub siab nyiam, tsis hais peb tseem nyob hauv no lossis mus nyob saum ntuj los peb yeej zoo siab” (II Kauleethaus 5:9).
Lus nug rau sawvdaws xav:
- Timthawj Paulus siv daim duab hais txog “lub tsev pheebsuab” thiab “lub tsev saum ntuj” los hais txog yam dabtsi?
- Vim licas cov uas yog tus Tswv tug xav tso lub cev hauv ntiajteb tseg?
- Yam uas tus ntseeg yuav tsum ntshaw thaum ua neej nyob lossis thaum tuag yog dabtsi?
Timthawj Paulus siv daim duab hais txog “lub tsev pheebsuab” thiab “lub tsev saum ntuj” los piv txog lubcev nimno thiab lubcev uas tus Tswv cov menyuam yuav tau txais yav tomntej. “Lub tsev pheebsuab” yog chaw tsis ruaj tsis khov, vim peb tsuas yog “cov neeg uas taug kev tuaj ua qhua xwb” (I Petus 2:11); tiamsis “lub tsev saum ntuj” yog Vajtswv ua tus tsim, tsis yog tibneeg txhais tes tsim los (nqe 1). Paulus hais txog kev ntshaw ntawm cov uas yog tus Tswv tug, ntawd yog ntxov tso “lub tsev pheebsuab” tseg mus nyob lossis mus hnav “lub tsev saum ntuj”. Nqe lus hais txog “lub cev puastsuaj lawm…thiaj yuav muaj tsev nyob”, lwm phau txhais hais tias “thaum hnav lawm peb yuav tsis liab qab” yog Timthawj Paulus muab los piv txog tus ntsujplig uas nyob hauv lubcev. Kev tuag sab nqaij tawv ua rau tus ntsujplig tsis muaj lubcev, zoo ib yam li tus neeg raug hle liab qab, tsis muaj ris tsho hnav. Tiamsis niaj hnub nimno, Vajtswv pub Vaj Ntsujplig ntaus cim ua puav pheej rau peb hais tias, thaum txog hnub kawg peb yuav tau txais lubcev sawv rov los ci ntsa iab (nqe 5), kom peb ua siab ntev ua neej nrog lubcev txawj puastsuaj tos txog hnub tau txais lubcev tshiab.
Timthawj Paulus kuj piav qhia meej ntxiv txog lubcev tshiab hauv tsab ntawv I Kauleethaus 15:46-58. Lubcev ntiajteb raug kaw hauv “lub tsev pheebsuab” ua rau peb tsis tau ntsib tus Tswv tim ntsej tim muag, peb tsuas nrog Nws mus dhau ntawm kev ntseeg xwb; yog li ntawd timthawj Paulus thiaj hais tias, nws tos nrhw tso lubcev no tseg mus txais lubcev tshiab uas zoo dua. Txawm li ntawd, los nws xam pom hais tias, ua neej kom txaus Vajtswv siab yog yam tseemceeb heev dua peb txojkev ntshaw; yog li ntawd Timthawj Paulus thiaj qhia kom ua haum Vajtswv siab txawm yog peb tseem nyob hauv lubcev no lossis tawm mus lawm (nqe 9).
Nyob hauv Loos 14:7-8, Timthawj Paulus kuj qhia hais tias: “Peb muaj sia nyob tsis yog peb muaj rau peb, thiab peb tuag, tsis yog peb tuag rau peb xwb. Yog peb muaj sia nyob, peb muaj sia nyob rau tus Tswv, thiab yog peb tuag, peb tuag rau ntawm tus Tswv; txawm yog peb muaj sia nyob lossis peb tuag, peb yeej yog tus Tswv neeg.” Yog li ntawd, peb yuav tsum muaj kev ntseeg hais tias, txawm ciaj thiab tuag los peb tsuas muaj tib txoj kev ntshaw xwb, ntawd yog “ua raws li Vajtswv lub siab nyiam” vim lubcev txawj puastsuaj hauv “lub tsev pheebsuab” no yuav rov qab mus ua av, qhov tseemceeb yog tus ntsujplig uas nyob hauv “lub tsev saum ntuj” yuav sawv ntawm tus Tswv xubntiag txais nqi zog raws li tej haujlwm nyias tau ua los lawm (nqe 10).
Kev mob kev nkeeg lossis tej yam tsis zoo ntawm peb lubcev puas ua rau peb qaug zog tsis qhia tus Tswv lub tshwjchim rau cov neeg ibncig peb?
Vajtswv tus uas nyuam yaus hlub tshua! Nyuam yaus tos nrhw hnub sawv rov los txais lubcev tshiab li Koj tej lus cogtseg, thov pab nyuam yaus “mus raws kev ntseeg, txhob mus raws qhov muag pom” kom nyuam yaus tsis txhawj rau “lub tsev pheebsuab”, tiamsis txhawj ua haum Koj siab. Amees.
Nyeem Vajluskub hauv peb lub xyoos: Phau Ntawv Nkauj 146:1-147:20
Kênh Youtube BHKTHN:
