Klei Aê Diê Blŭ: II Kôrantô 5: 1-10
Êlan kliăng: “Snăn thâodah drei dôk hlăm asei mlei anei amâodah kbiă, drei duah čiăng snăk bi mơak kơ Ñu” (II Kôrantô 5:9).
Klei êmuh ksiêm mĭn: Khua ƀĭng kna Y-Pôl yua rup “sang čhiăm” leh anăn “sang hlăm adiê” čiăng lač kơ ya klei? Ya ngă phung jing anak Aê Diê čiăng toh hĕ asei mlei kđeh anei? Ya klei phung đăo kơ Krist čiăng mâo sĭt dôk hdĭp amâodah djiê?
Khua ƀĭng kna Y-Pôl yua rup “sang čhiăm” leh anăn “sang hlăm adiê” čiăng bi mkă hŏng asei mlei kđeh ti lăn ala ară anei leh anăn asei mlei mlih mrâo hlăm êdei anăp mơ̆ng phung ƀuôn sang Aê Diê. “Sang čhiăm” jing anôk amâo hơĭt kjăp kyua drei knŏng jing phung “tue leh anăn phung dôk ti êngao čar pô” (I Y-Pêtrôs 2:11), bi “sang hlăm adiê” kyua Aê Diê pô mkŏ mjing, amâo djŏ kngan mnuih ngă ôh (êlan 1). Ñu hưn klei čang hmăng phung jing mnuih Aê Diê jing dưi hnưm kbiă đuê̆ mơ̆ng “sang čhiăm” čiăng dưi hơô “sang hlăm adiê”. Rup mnuih“hơô sang anăn, amâo srăng dôk lưng mlŭn ôh” ăt jing klei Khua ƀĭng kna Y-Pôl bi hmô kơ mngăt ai tiê dôk hlăm asei mlei. Klei djiê hlăm kđeh asăr ngă kơ mngăt kƀah kđeh asăr msĕ si sa čô mnuih arăng lưng mlŭn, amâo hơô ao. Khădah snăn, ară anei Aê Diê brei Yang Mngăt Jăk bi mklă hlăm drei srăng dưi mâo asei mlei mrâo guh kơang hlăm hruê knhal tuč (êlan 5) čiăng kơ drei hơĭt ai tiê hdĭp hlăm asei mlei amâodah djiê dôk guôn hruê dưi bi mlih.
Khua ƀĭng kna Y-Pôl ăt mblang klă mngač hĭn kơ asei mlei guh kơang hlăm hră I Kôrantô 15:46-58. Asei mlei ti lăn ala kčah hlăm “sang čhiăm” anăn drei amâo dưi bi tuôm tlă anăp hŏng Aê Diê ôh ƀiădah knŏng êbat hlăm klei đăo, kyua anăn khua ƀĭng kna lač ñu čang hmăng toh hĕ asei mlei kđeh jing klei jăk hĭn. Wăt tơdah snăn, ñu pô ăt msĕ mơh phung ƀuôn sang Aê Diê brei thâo săng hdĭp bi mơak kơ Aê Diê jing yuôm bhăn hĭn klei pô čiăng, kyua anăn Khua ƀĭng kna Y-Pôl mñă klă bruă bi mơak Aê Diê wăt tơdah drei dôk hlăm asei mlei kđeh anei amâodah kbiă (êlan 9).
Hlăm hră Rôm 14:7-8, Khua ƀĭng kna Y-Pôl ăt mtô: “Amâo mâo sa čô ôh hlăm phung drei dôk hdĭp kơ ñu pô, amâodah djiê kơ ñu pô. 8Tơdah drei dôk hdĭp, drei hdĭp kơ Khua Yang; leh anăn tơdah drei djiê, drei djiê kơ Khua Yang mơh. Snăn thâodah drei dôk hdĭp amâodah djiê, ăt drei jing dŏ Khua Yang mơh”. Kyua anăn grăp čô drei brei bi mĭn wăt tơdah hdĭp amâodah djiê ăt knŏng mâo sa klei čang hmăng sa anăn jing “ngă jih ai tiê čiăng mơak Aê Diê,” kyua asei mlei amâodah djiê hlăm “sang čhiăm” anei srăng wĭt hlăm ƀruih lăn, klei yuôm bhăn hĭn jing mngăt hlăm “sang hlăm adiê” srăng dôk ti anăp Aê Diê čiăng mă klei pah mni hlue si bruă drei ngă leh (êlan 10).
Klei ruă amâodah klei amâo jăk hlăm asei mlei ngă kơ drei êdu ai mơh tơl amâo bi êdah klei guh kơang Aê Diê kơ phung riêng gah mơ̆?
Wah lač: Ơ Aê Diê Pô Khăp! Ai tiê kâo čang hmăng truh hruê dưi hdĭp hlăm asei mlei mlih mrâo guh kơang msĕ si Klei Aê Diê Blŭ ƀuăn leh, akâo kơ Ih đru kâo “êbat hlăm klei đăo, amâo djŏ kyua ală tluh ôh” čiăng amâo knŏng blŭ duñ duñ hlăm “sang čhiăm” ôh, ƀiădah kriăng tui duah klei bi mơak Aê Diê.
Dlăng Klei Aê Diê Blŭ hlăm tlâo thŭn: Klei Mmuñ Hđăp 146:1-10; 147:1-20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
