Klei Aê Diê Blŭ: Y-Yêrêmi 36: 1-10.
Êlan kliăng: “Mă bĕ sa pŏk hdruôm hră klĭt leh anăn čih tinăn jih jang klei Kâo blŭ leh kơ ih bi kdơ̆ng hŏng phung Israel leh anăn phung Yuđa leh anăn hŏng jih jang găp djuê mnuih, mơ̆ng hruê Kâo blŭ leh kơ ih hlăm ênuk Y-Jôsia truh kơ hruê anei. Năng ai sang Israel srăng hmư̆ jih jang klei jhat Kâo mĭn leh čiăng ngă kơ diñu, snăn grăp čô dưi wir đuĕ mơ̆ng êlan jhat ñu, snăn Kâo dưi pap brei klei wê leh anăn klei soh diñu” (Y-Yêrêmi 36:2-3).
Klei êmuh ksiêm mĭn: Ya klei Yêhôwa Aê Diê mtă kơ Khua pô hưn êlâo Y-Yêrêmi ngă? Ya jing boh phŭn mơ̆ng hdruôm hră leh anăn hdră kñăm Aê Diê mtă brei čih? Ya klei mñă kơ drei mơ̆ng klei hriăm hruê anei?
Hlăm thŭn tal pă ênuk Mtao Y-Jêhôyakim kiă kriê, Khua pô hưn êlâo Y-Yêrêmi hmư̆ asăp Yêhôwa mtă brei lŏ čih ““Mă bĕ sa pŏk hdruôm hră klĭt leh anăn čih tinăn jih jang klei Kâo blŭ leh kơ ih bi kdơ̆ng hŏng phung Israel leh anăn phung Yuđa leh anăn hŏng jih jang găp djuê mnuih, mơ̆ng hruê Kâo blŭ leh kơ ih hlăm ênuk Y-Jôsia truh kơ hruê anei” (êlan 2). Khua pô hưn êlâo Y-Yêrêmi gưt asăp Aê Diê ngă mtam klei Aê Diê mtă, leh anăn mâo klei mguôp mơ̆ng Y-Baruk anak êkei Y-Nêria hlăm bruă lŏ čih djăp klei Yêhôwa Aê Diê blŭ hlue si asăp Y-Yêrêmi răk. Khădah snăn kyua Khua pô hưn êlâo Y-Yêrêmi arăng kăm amâo brei mŭt hlăm Sang Yêhôwa anăn Y-Baruk lŏ klam bruă răng ya klei čih leh hlăm hdruôm hră kơ phung ƀuôn sang Aê Diê hmư̆ hlăm gưl diñu bi kƀĭn hlăm gưl kăm ƀơ̆ng huă sĭt lăn čar lĕ hlăm klei rŭng răng (êlan 5-6), hŏng hdră kñăm jih jang mnuih ƀuôn sang srăng hmư̆ leh anăn thâo ya klei pô ngă soh leh čiăng “…dưi wir đuĕ mơ̆ng êlan jhat ñu, snăn Kâo dưi pap brei klei wê leh anăn klei soh diñu” (êlan 3b).
Čih djăp klei Yêhôwa Aê Diê mơ̆ng hruê Ñu mphŭn lač kơ Khua pô hưn êlâo Y-Yêrêmi hlăm ênuk mtao Y-Yôsia (thŭn 621 êlâo kơ klei kkiêng kơ Khua Yang Yêsu), truh wưng thŭn tal pă ênuk Mtao Y-Jêhôyakim (hlăm brô thŭn 605 êlâo kơ klei kkiêng kơ Khua Yang Yêsu), jing êbeh pluh êma thŭn jing amâo djŏ klei ênưih ôh. Ƀiădah leh Aê Diê jao bruă klam snăn Ñu ăt brei thiăm klei thâo kơ phung gưt asăp Ñu čiăng bi leh. Drei ăt thâo hlăm ênuk anăn ênoh mnuih thâo răk leh anăn čih raih amâo lu ôh, kyua anăn čiăng snăk phung msĕ si Y-Baruk srăng mă bruă amâo huĭ kơ klei huĭ hyưt amâodah luč liê klei dưi kơ pô čiăng bi leh bruă Aê Diê jao. Mâo Aê Diê yua msĕ si Y-Baruk jing sa klei ktưn hưn leh anăn jăk mơak snăk. Hruê anei, hlei pô hlăm phung drei čiăng dưi mâo Aê Diê yua msĕ si Y-Baruk? Brei drei mprăp hriăm Klei Aê Diê Blŭ leh anăn klei thâo čiăng êdi čiăng sĭt Aê Diê mơak yua snăn drei srăng nao.
Sĭt Aê Diê mtă čih hdruôm hră anei, drei ƀuh klei khăp Aê Diê prŏng êlam snăk kơ phung ƀuôn sang Ñu. Aê Diê amâo čiăng ôh hlei pô kyua amâo thâo hmư̆ klei Aê Diê hưn brei răng djiê hĕ hlăm klei phat kđi, ƀiădah Aê Diê čiăng nanao grăp čô dưi hmư̆ Klei Aê Diê Blŭ leh anăn hmao kmhal klei soh čiăng dưi mâo klei bi mtlaih. Hruê anei Aê Diê ăt yua Sang Aê Diê Ñu leh anăn grăp čô drei hiu hưn klei Aê Diê khăp truh kơ lu mnuih ka thâo kral Ñu. Brei drei yua mông găl čiăng hiu hưn klei khăp Aê Diê kơ lu mnuih.
Si drei ngă tơdah thâo leh klei khăp prŏng prĭn Aê Diê brei kơ pô?
Wah lač: Ơ Khua Yang Klei Khăp! Kâo mơak kyua dưi mâo klei khăp prŏng prĭn Aê Diê brei kơ kâo, akâo kơ Ih đru kâo mđing hmư̆ nanao Klei Aê Diê Blŭ leh anăn yua jih mông găl čiăng hiu hưn klei Aê Diê khăp kơ lu mnuih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 139:1-24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
