Klei Aê Diê Blŭ: Y‑Luk 8:40-56
Êlan kliăng: “Đăm huĭ ôh, knŏng đăo, leh anăn gơ̆ srăng hlao.” (Y‑Luk 8:50b).
Klei êmuh ksiêm mĭn: Si klei truh kơ anak mniê Y‑Jairus? Si klei mdê phung mâo klei đăo hŏng phung amâo mâo klei đăo dlăng kơ klei truh kơ anak Y‑Jairus? Ya klei mñă kơ drei tơdah tlă anăp hŏng klei truh kơ mnuih hlăm găp djuê amâo lŏ mâo klei čăng hmăng ôh?
Tơdah Y‑Jairus hriê kơ Khua Yang Yêsu, anak mniê ñu mâo knŏng sa čô pluh dua thŭn “giăm djiê” (êlan 42). Leh anăn êjai Khua Yang Yêsu dôk blŭ hrăm hŏng sa čô mniê kluh êrah, snăn hđeh anăn “djiê leh” (êlan 49). Kyuanăn, pô mơ̆ng sang Y‑Jairus lač “đăm lŏ bi dleh Nai ôh”. Tơdah Khua Yang truh ti sang ñu, “jih jang hia leh anăn čŏk ênguôt kơ hđeh anăn”. Arăng amâo lŏ mâo klei čang hmăng kơ hđeh anăn ôh, kyuanăn jŭm dar knŏng klei ênguôt hnĭng, čŏk hia. Tơl kơ, tơdah Khua Yang Yêsu lač kơ diñu đăm čŏk hia ôh, kyuadah gơ̆ amâo djiê ôh, phung anăn “tlao mưč kơ Ñu”.
Jing amĭ ama, boh nik jing amĭ ama kơ phung anak dôk hlăm gưl thŭn hlăk krah msĕ si anak mniê Y‑Jairus, êlưih snăk drei mâo klei mĭn msĕ si phung hlăm sang ñu. Êlưih snăk drei knŏng hia leh anăn čŏk ênguôt kyuadah amâo lŏ ƀuh klei čang hmăng kơ anak drei ôh. Êlưih snăk drei brei klei mĭn leh anăn klei blŭ bi êdu ai mơ̆ng phung ti êngao ngă kơ drei luč klei čang hmăng hlăm Khua Yang. Hŏng ală dlăng amâo mâo Aê Diê, djŏ yơh anak mniê Y‑Jairus djiê sĭt leh, ƀiădah ală dlăng hŏng klei đăo lač snei “gơ̆ knŏng dôk pĭt”. Lač jăk kơ Khua Yang, Y‑Jairus djă păn kơ ală dlăng hŏng klei đăo, snăn yơh jih sang ñu dưi bi knal klei myang yuôm bhăn. Mơ̆ng mphŭn, ñu ruah klăm ti jơ̆ng Khua Yang kwưh akâo brei kơ anak ñu leh. Êdei tinăn, ñu ruah amâo wir kơ tluôn ôh tơdah Khua Yang ngă msĕ si amâo hmư̆, amâo mđing kơ klei ñu kwưh akâo. Tơdah mnuih mơ̆ng sang lač đăm lŏ bi dleh Nai ôh, tơdah phung hlăm sang čŏk hia, ñu ăt kăn lui klei čang hmăng rei ƀiădah atăt Khua Yang mŭt hlăm sang ñu, tui hlue Khua Yang mŭt hlăm adŭ čiăng ƀuh klei ñu kwưh akâo dưi bi sĭt, ƀuh klă sĭt Khua Yang ngă bruă mĭndah amâo dưi ngă ôh.
Hlăm Knăm Mpŭ Kơ Amĭ Ama, drei dlăng wĭt phă gŏ sang drei čiăng ksiêm mĭn. Tơdah dôk ti anăp phung drei khăp hơiêng amâo lŏ ƀuh klei čang hmăng ôh kyua klei ruă duam amâodah kyua klei hdĭp jhat ƀai tă tăn, drei mâo dua mta klei ruah: Čŏk hia msĕ si phung hlăm sang Y‑Jairus, amâodah đăo kơ klei Khua Yang lač “Đăm huĭ ôh, knŏng đăo” (êlan 50b). Tăp năng Khua Yang msĕ si amâo hmư̆, amâo mđing kơ klei drei kwưh akâo. Ƀiădah lĕ, Khua Yang Yêsu, Pô msĕ si amâo mđing kơ klei Y‑Jairus kwưh akâo jêč ruăt, jing hĕ čŏng čiăng bi kjăp ai tiê klei mĭn ñu. Leh anăn Khua Yang Pô yơh mŭt hlăm sang ñu tui si klei ñu kwưh akâo, leh anăn iêô anak điêt ñu “djiê leh”, mdrao jih klei leh, jih klei čang hmăng leh, kgŭ lŏ hdĭp. Pô mbruê, hruê anei kơ ênuk hlŏng lar amâo tuôm mlih ôh ăt srăng ngă klei anăn kơ gŏ sang găp djuê drei msĕ mơh, “Đăm huĭ ôh, knŏng đăo”.
Hlăm Knăm Mpŭ Kơ Amĭ Ama, ya klei drei bi mni lač jăk kơ Khua Yang kơ phung drei khăp hơiêng?
Wah lač: Ơ Khua Yang, klei hdĭp gŏ sang kâo ti lăn ala anei amâo kƀah klei truh ôh, akâo Khua Yang brei kâo ăt đăo kjăp kơ Ih, amâo lui klei čang hmăng ôh ƀiădah dôk gĭr wah lač brei kơ phung kâo khăp hơiêng.
Dlăng Klei Aê Diê Blŭ hlăm tlâo thŭn: Klei Mmuñ Hđăp 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
