Klei Aê Diê Blŭ: Klei Bi Hriêng 11:23-26
Êlan kliăng: “Sa čô mnuih mkăn amâo brei ênŭm tui si klei djŏ ôh, ƀiădah ăt mâo klei kƀah.” (Klei Bi Hriêng 11:24b)
Klei êmuh ksiêm mĭn: Si mta knhuah mâo hŏng mnơ̆ng mnuă ƀiădah Klei Aê Diê Blŭ phat kđi? Si knhuah phung anei bi êdah hlăm klei hdĭp leh anăn ya boh klei diñu srăng tŭ? Si knhuah drei hŏng mnơ̆ng mnuă drei dôk mâo?
Bi mklăk hŏng phung kmah, thâo kah mbha ya mta mnơ̆ng ñu mâo kơ phung kƀah snăn ăt mâo mơh mnuih “amâo brei ênŭm tui si klei djŏ ôh” (êlan 24b). Pruê̆ blŭ anei đa đa mblang snei: “čuôt klih đei”, “hrui hrŏk”, “kơ̆ng pioh kơ pô mnơ̆ng năng brei kơ arăng”. Snăn, “mnuih amâo brei ênŭm tui si klei djŏ ôh” jing phung kơ̆ng pioh hĕ kơ ñu mnơ̆ng năng brei kơ arăng, amâo ngă klei djŏ năng ngă, amâo kah mbha kơ arăng mta mnơ̆ng năng kah mbha. Blŭ mdê, tơdah drei dưi đru sa čô mnuih dôk čiăng mâo klei đru ƀiădah drei lŏ kơ̆ng pioh kơ pô dê snăn drei dôk “amâo brei ênŭm tui si klei djŏ ôh”. Mnuih hdĭp msĕ snăn knŏng “mâo klei kƀah”, kyua tơdah kơ̆ng pioh hĕ mta mnơ̆ng năng djŏ brei kơ arăng, jing klei ngă soh hŏng klei bhiăn kpă ênô Aê Diê, leh anăn sĭt nik pô anăn knŏng mă tŭ klei Aê Diê ngêñ (êlan 23). Tơdah klei mnuih kpă ênô hmăng hmưi “knŏng bi truh klei jăk” kyua knuih kpă ênô ñu amâo čiăng klei ƀai ôh msĕ snăn mơh, “mnuih amâo brei ênŭm tui si klei djŏ… ăt mâo klei kƀah” jing boh ñu srăng tŭ yơh.
Sa tĭng mkăn, mnuih mâo ai tiê kmah “srăng đĭ mdrŏng hĭn”, wăt tơdah pô anei năng ai amâo mâo mnơ̆ng ƀơ̆ng jăk yâo ti jhưng huă ôh ƀiădah ăt “đĭ mdrŏng”, hrăp ai hŏng jih jang mnơ̆ng Aê Diê thiê brei. Mklăk wĭt, mnuih amâo mâo klei kmah amâo srăng tuôm “đĭ mdrŏng” ôh, kyuadah diñu ƀuh amâo tuôm djăp, tluh čiăng hrui hrŏk kơ pô lu hĭn nanao, anăn jing mnuih ƀuh kơ ñu êpa mhao, “kƀah” nanao.
Amâo mâo klei mdê ôh ti krah klei tlĕ dăp leh anăn “amâo brei ênŭm tui si klei djŏ ôh”. Mnuih tlĕ mă mnơ̆ng amâo djŏ dŏ ñu pô, bi mnuih “amâo brei ênŭm tui si klei djŏ ôh” kơ̆ng pioh mta klei năng brei kơ pô mkăn. Blŭ mdê, sa čô čuôt klih, amâo thâo kah mbha mnơ̆ng kơ arăng hŏng mnuih tlĕ boh sĭt gơ̆ ăt jing sa mơh!
Ya ngă mnuih “amâo brei ênŭm tui si klei djŏ ôh” tŭ klei phat kđi? Êlan 26 brei thâo, “Phung ƀuôn sang tăm pah kơ pô pioh mdiê ƀlê kơ ñu pô”. “Mdiê ƀlê” bi hmô kơ mta mnơ̆ng čiăng yua amâo dưi kƀah ôh kơ klei hdĭp, amâo djŏ mta mnơ̆ng yua mdrŏng sah ôh, leh anăn rup anei lač kơ klei ư̆ êpa amâodah luč liê boh mnga kyua yan adiê, ƀiădah êjai anăn mâo phung mkăm pioh mdiê ƀlê kăp bi mđĭ ênoh ti dlông čiăng ƀơ̆ng mnga (Y‑Amôs 8:4-8). Leh anăn knhuah “phung ƀai” hŏng mnơ̆ng mnuă diñu dlăng kơ mnơ̆ng mnuă jing dŏ diñu pô, yua tui si diñu pô čiăng kăp hrui boh mnga, amâo mđing uêñ si klei truh kơ pô mkăn ôh. Klei duah ƀơ̆ng hŏng bruă čhĭ mnia amâo soh hŏng klei bhiăn ôh, ƀiădah bi phung anei arăng “tăm pah” kyuadah hŏng diñu, knŏng prăk kăk yơh jing yuôm hĭn, amâo uêñ kơ klei hdĭp arăng leh anăn klei knap mñai pô mkăn ôh.
Si ngă drei ƀuh bruă klam kah mbha mnơ̆ng drei mâo kơ phung kƀah knap mơ̆?
Wah lač: Ơ Khua Yang, akâo Ih pap brei kơ kâo mâo klei mĭn knan knăk, cuôt klih, knŏng čiăng hrui hrŏk kơ pô. Akâo kơ Khua Yang brei kâo tui hlue kru jơ̆ng Ih, jing Pô lui jih djăp mta klei kyua kơ kâo, čiăng kâo mâo ai tiê kmah hŏng mnuih dôk kƀah knap.
Dlăng Klei Aê Diê Blŭ hlăm tlâo thŭn: Klei Mmuñ Hđăp 7:1-17; 8:1-9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
