Pajlug 11:23-26
Nqe cim
“Tus uas tsis kam pub yam uas nws pub tau, nws kuj pluag zuj zus.” (Pajlug 11:24b).
Lus nug rau sawvdaws xav:
- Vajluskub foom cem txojkev xav twg rau tej qhov txhia chaw?
- Tus neeg muaj kev xav zoo li ntawd lubneej zoo licas thiab nws yuav ntsib dabtsi?
- Peb tabtom muaj kev xav licas rau tej qhov txhia chaw uas peb muaj?
Muaj tus neeg siab zoo siab dav kam pub tej yam uas nws muaj rau cov neeg txomnyem, ces kuj muaj tus neeg “qia dub kawg” (nqe 24b). Lo lus no muaj ntsiab txhais hais tias: “cuaj khaum”, “tsis kam pub yam uas nws pub tau pub rau lwm tus”. Yog li ntawd, tus neeg “qia dub kawg” yog tus neeg uas tsis xav pub yam yog nws tug uas nws muaj peevxwm pub tau pub rau lwm tus, tsis ua tej yam tsimnyog ua, tsis pub tej yam tsimnyog pub. Muab hais ua lwm seem lus, mas thaum peb muaj peevxwm pub tau rau lwm tus yam uas tus ntawd cheemtsum tiamsis peb tsuas khaws cia rau peb tus kheej ces yog peb tabtom “qia dub kawg”. Tus neeg uas ua lubneej zoo li ntawd tsuas muaj yuav “pluag” mus xwb, vim thaum khaws tej yam uas tsimnyog pub rau lwm tus tseg ces yog ua txhaum Vajtswv txoj kevcai ua zoo, thiab tus neeg zoo li ntawd yeej yuav ntsib Vajtswv kev npau taws xwb (nqe 23). Tej uas cov neeg zoo lossis cov neeg ncajncees xav tau, yeej ibtxwm xaus rau “yam zoo” vim tus coj cwjpwm ncajncees yeej yuav tsis ntshaw yam phem, ib yam nkaus li ntawd, tus neeg “qia dub” thaum kawg tsuas yuav “pluag” mus li xwb.
Saib mus rau ib sab, tus neeg siab zoo lub neej“yuav vammeej” lossis “npluanuj zuj zus”, txawm yog qee zaug yuav tsis muaj zaub mov qab saum rooj los nws yeej tsau npo, yeej txaus siab rau tej yam uas tus Tswv pub rau nws. Tiamsis, tus neeg qia dub, siab nqaim yuav tsis muaj kev tsau npo vim lawv tsis pom hais tias lawv muaj txaus, lawv ntshaw rwg nrhiav kom muaj ntau ntxiv, ntawd yog tus neeg tshaib nqhis, tus neeg “pluag”.
Tsis muaj qhov sib txawv ntawm tus neeg ua tub sab thiab tus neeg “qia dub”. Tus ua tub sab nyiag tej uas tsis yog nws tug, tshuav tus neeg “qia dub” khaws tej uas tsimnyog yog luag tug cia. Lossis muab hais ua lwm seem lus, mas tus neeg qia dub, cuaj khaum, tsis paub pub yam nws muaj rau lwm tus thiab tus neeg ua tub sab yeej zoo tib yam nkaus!
Vim licas tus neeg “qia dub” raug foom? Nqe 26 teb hais tias, “Tej neeg tsawm foom tus uas sau qoob los tseg cia tos muag kom tau nqi ntau”. “Qoob loo” piv txog tej yam cheemtsum heev hauv lubneej, tsis yog tej yam uas kim kim, thiab ntawm no yog hais txog lub sijhawm uas muaj kev tshaib nqhis lossis sau tsis tau qoob loo thiab muaj ib txhia neeg sau qoob loo khaws tseg, tuav nqi tsis muag mus txog thaum muag tau nqi ntau (Amauj 8:4-8). Thiab “cov neeg phem” txojkev xav rau tej qhov txhia chaw yog saib tej ntawd ua nws tug, nws muaj cai siv tej ntawd raws siab nyiam kom tsam peev, tsis quav ntsej txog lwm tus. Ua tsam peev hauv kev lag luam tsis txhaum kevcai, tiamsis tus neeg nyob hauv no “raug foom” vim raws li lawv xav, nyiaj txiag yog yam tsim txiaj dua ntais, tsis quav ntsej txog lwm tus txojsia thiab lwm tus kev txomnyem.
Peb puas pom tias peb muaj feemxyuam faib tej uas peb muaj pub rau cov neeg txomnyem?
Thov Vajtswv
Tus Tswv, thov Koj zaj txim rau nyuam yaus thaum ntshaw luag tug, qia dub, xav sau txhua yam los rau tus kheej. Thov pab nyuam yaus taug Koj tus neev taw kom nyuam yaus muaj siab loj siab dav pab cov neeg txomnyem. Amees.
Nyeem Vajluskub peb lub xyoos: Ntawv Nkauj 7:1-8:9.
Tshooj Youtube BHKTHN: https://www.youtube.com/c/bhkthn
