Klei Aê Diê Blŭ: Rôm 12:1
Êlan kliăng: “Ơ phung ayŏng adei, kâo kwưh kơ diih kyua klei Aê Diê pap, myơr bĕ asei mlei diih jing mnơ̆ng ngă yang hdĭp, doh jăk, bi mơak kơ Aê Diê. Klei anăn jing klei kkuh mpŭ djŏ kơ Aê Diê.” (Rôm 12:1).
Klei êmuh ksiêm mĭn: Ya klei khua ƀĭng kna Y‑Pôl mtă mtăn kơ phung đăo ti čar Rôm? Si mblang kơ klei mtă mtăn anei? Si drei mă yua klei mtă mtăn anei kơ hruê anei?
Leh kbiă mơ̆ng čar Êjip, Aê Diê brei kơ phung ƀuôn sang Israel Klei Bhiăn Knhuah Kpă mâo Pluh Mta Klei Bhiăn, Hdră Bhiăn mâo klei bhiăn, leh anăn Klei Bhiăn Kkuh Mpŭ, hlăm anăn kdrêč yuôm hĭn jing klei bhiăn myơr mnơ̆ng ngă yang, mnơ̆ng ngă yang, leh anăn klei bhiăn hdră kkuh mpŭ. Dơ̆ng mơ̆ng anăn, phung Israel huĭ mpŭ ruah mnơ̆ng jăk hĭn hlăm mnơ̆ng diñu rông ba kơ khua ngă yang dôk ti anăp knưl kkuh mpŭ kơ Aê Diê. Mâo lu klei mblang kơ klei mtă mtrŭn myơr mnơ̆ng ngă yang: Tal sa, mnơ̆ng ngă yang dlăng jing klei bi hmô kơ klei soh leh anăn boh ñu tŭ; tal dua, mnơ̆ng ngă yang myơr kơ Aê Diê dlăng msĕ si klei hdơr knga bi mni leh anăn thâo kơ jih jang klei jăk jĭn kbiă hriê mơ̆ng Aê Diê sơăi; tal tlâo, mnơ̆ng myơr kơ Aê Diê jing mnơ̆ng myơr kbiă hriê mơ̆ng ai tiê khăp leh anăn bruă ngă huĭ mpŭ, kkuh mpŭ kơ Ñu. Khădah snăn, thâodah ya mta phŭn knhal dưn, phŭn kơ klei myơr mnơ̆ng ngă yang jing Aê Diê nanao, kyuadah mnuih amâo tuôm dưi mjing biăp amâodah bê ngă mnơ̆ng myơr ôh.
Bruă myơr mnơ̆ng ngă yang ăt jing sa mta klei mñă bi hdơr kơ boh kbưi plah wah Pô Hrih Mjing hŏng mnơ̆ng hrih mjing. Ƀiădah kyua klei khăp leh anăn klei pap, Aê Diê lăm lui jih boh kbưi anăn hlăk Ñu tiŏ nao Anak Ñu mâo knŏng sa čô hriê ti lăn ala, myơr klei hdĭp msĕ si Mnơ̆ng Ngă Yang sa blư̆ djăp leh čiăng bi tui klei soh mnuih (Hêbrơ 9:12). Êjai mmông anăn mtam, čhiăm păng hlăm Sang Kkuh Mpŭ kơhiêk mdua (Y‑Mathiơ 27:51), kluôm jih êlan bhiăn ngă yang Klei Bi Mguôp Hđăp jing amâo lŏ yuôm ôh.
Hruê anei, drei mâo klei bi grăng hŏng Aê Diê hŏng klei Khua Yang Yêsu djiê kyuanăn amâo lŏ guôn myơr ya mta mnơ̆ng ngă yang ti knưl kkuh mpŭ ôh, kyuadah Khua Yang Yêsu djiê hrô brei kơ drei leh, brei drei dưi jing anak Aê Diê leh anăn jing mnuih kkuh mpŭ kơ Ñu. Klei hdĭp drei amâo lŏ jing dŏ drei pô ôh, ƀiădah jing dŏ kơ Pô djiê hrô brei leh kơ drei (Galati 2:20), leh anăn klei Aê Diê čoh čuăn kơ drei brei myơr klei hdĭp drei pô jing mnơ̆ng ngă yang, amâo djŏ mnơ̆ng ngă yang djiê ôh, ƀiădah jing mnơ̆ng ngă yang hdĭp leh anăn doh jăk. Klei kkuh mpŭ kơ Aê Diê sĭt jing čuăn đup gưt kơ Aê Diê kluôm dhuôm, bi êdah hŏng ai tiê êpa mhao čiăng thâo kral Khua Yang leh anăn jing msĕ si Khua Yang hĭn hŏng klei lui hĕ drei pô, čiăng kơ Khua Yang jing Khua hlăm djăp kdrêč êlan klei hdĭp, hŏng klei gưt asăp Khua Yang leh anăn Klei Ñu Blŭ, hŏng knhuah hdĭp thâo khăp, doh jăk, kpă ênô čiăng jing hra kơ lăn leh anăn klei mngač kơ lăn ala, leh anăn hŏng klei hiu hưn Klei Mrâo Mrang Jăk. Anăn yơh jing klei kkuh mpŭ bi mơak kơ Aê Diê.
Si ngă mnơ̆ng myơr drei myơr kơ Khua Yang jing mnơ̆ng myơr hdĭp leh anăn doh jăk mơ̆?
Wah lač: Ơ Khua Yang, bi mni kơ Ih săn asei mlei djiê hrô brei leh kơ klei soh kâo. Mmông anei klei hdĭp kâo myơr kơ Khua Yang čiăng kơ Ih yua kâo kluôm dhuôm tui si klei čiăng jăk Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 6:16-53
Kênh Youtube BHKTHN:
