Loos 15:13
Nqi cim:
Thov Vajtswv tus uas nej cia siab rau, pub nej muaj kev zoo siab thiab nyob kaj siab lug, Vaj Ntsujplig tus Dawbhuv lub hwjchim yuav pab kom nej muaj kev cia siab rau Vajtswv heev zuj zus.!
Lus nug rau sawvdaws xav:
- Timthawj Paulus thov kom Vajtswv cov menyuam ua neej nyob nrog txojkev cia siab licas?
- Vajtswv yuav pub yam dabtsi rau tus neeg uas cia siab khov kho rau ntawm Nws?
- Los ntawm yam dabtsi ua rau peb puv npo kev cia siab rau lub xyoo tshiab 2022?
Vajtswv cov menyuam tabtom nrog tibneeg thoob qab ntuj zoo siab txais yuav lub xyoo tshiab 2022. Txawm hais tias kab mob tseem kis, kev tsov rog tseem muaj nyob ntau qhov, kev lag luam thoob ntiajteb tseem tsis tau mus zoo,… los lub sijhawm yeej dhau mus ntsiag twb to thiab ib lub xyoos tshiab tsis ntev xwb twb rov los txog lawm. Raws li niaj xyoo ua dhau los, leej twg los kuj xav kom ib lub xyoos tshiab yuav muaj ntau yam tshiab dua, zoo dua, thiab sawvdaws sib qhia tshwm kev zoo siab rau lwm tus los ntawm tej lo lus foom nyob zoo xyoo tshiab puv npo txojkev cia siab.
Tom qab uas Timthawj Paulus qhuab ntuas Vajtswv cov menyuam nyob hauv lub nroog Loos uas sau tseg nyob hauv tshooj 14, 15, nws tau sau lus xaus thiab kuj yog nws cov lus txhawb zog pub rau Pawg Ntseeg hauv nroog Loos, nyob hauv Loos 15:13 hais tias: “Thov Vajtswv tus uas nej cia siab rau, pub nej muaj kev zoo siab thiab nyob kaj siab lug, Vaj Ntsujplig tus Dawbhuv lub hwjchim yuav pab kom nej muaj kev cia siab rau Vajtswv heev zuj zus.” Paulus thov kom cov ntseeg tau nyob hauv txojkev cia siab, tsis yog kev cia siab cuav tiamsis yog kev cia siab ruaj khov vim Vajtswv yog lub hauvpaus ntawm txojkev cia siab. Neeg ntiajteb ib tug hais lus nyob zoo xyoo tshiab rau ib tug, lawv tsis quav ntsej txog qhov uas puas yuav muaj tiav raws li lawv tej lus, tiamsis Timthawj Paulus hais khov kho hais tias peb tus Vajtswv yog tus uas ua rau peb muaj puv npo kev zoo siab thiab kev kaj siab, tsis yog los ntawm tej lus hais nyob zoo xyoo tshiab uas ib tug ibtxwm hais rau ib tug tiamsis yog los ntawm peb txojkev ntseeg Vajtswv tus uas yog lub hauvpaus kev cia siab. Thaum kawg, los ntawm Vaj Ntsujplig lub hwjchim, yuav ua rau peb yim hnub yim puv npo txojkev cia siab.
Hla mus rau lub xyoo 2022, muaj coob leej ntau tug tseem muaj ntau yam kev txhawj xeeb hauv lubneej, ntau tug tseem ntsib tej teebmeem tsis zoo vim kab mob kis cuam tshuam rau lawv lubneej, kev ua haujlwm, thiab lub dag lub zog. Txawm li cas los xij, thov tus Tswv pub rau peb muaj kev ntseeg tuag nthi rau ntawm Vajtswv tus uas yog lub hauvpaus kev cia siab, Nws tabtom npaj ib qhov chaw ruaj khov ibtxhis rau peb, qhov chaw ntawd tsis muaj kab mob kis, tsis muaj kev txhawj ntshai, tsis muaj kev ploj kev tuag kom xwv peb tau nrog tus Tswv nyob mus ibtxhis (Yauhas 14:1-3). Peb hla mus rau lub xyoo tshiab muaj kev zoo siab thiab kaj siab lug tsis yog vim lubneej twb zoo lawm tiamsis yog vim peb cia siab khov kho rau ntawm Vajtswv. Nyob hauv Vaj Ntsujplig lub hwjchim, peb muaj puv npo kev cia siab thiab niaj hnub zoo siab, kaj siab txawm yog peb tabtom ua neej nyob hauv lub ntiajteb uas tsis ruaj khov, vim peb muaj Vajtswv tus uas muaj hwjchim ci ntsa iab nyob nrog.
Peb puas hnov puv npo kev cia siab thaum txais lub xyoo tshiab 2022?
Thov Vajtswv:
Tus Tswv, txawm tias lubneej tseem ntsib ntau yam kev txomnyem los nyuam yaus thov ua Koj tsaug. Koj yog lub hauvpaus ntawm kev cia siab, nyuam yaus ntseeg hais tias Koj yuav pub rau nyuam yaus puv npo kev zoo siab, kev kaj siab. Thov pub rau nyuam yaus txais yuav lub xyoo tshiab puv npo kev cia siab rau ntawm Koj. Amees.
Nyeem Vajluskub hauv peb lub xyoo: I.Xwmtxheej Vajntxwv 2:42-3:16
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
