Klei Aê Diê Blŭ: Rôm 15:13
Êlan kliăng: “Akâo kơ Aê Diê, Pô jing klei čang hmăng, bi bŏ diih hŏng jih klei mơak leh anăn klei êđăp ênang hlăm klei đăo, čiăng kơ hŏng klei myang Yang Mngăt Jăk diih dưi mâo klei čang hmăng êbeh dlai.” (Rôm 15:13).
Klei êmuh ksiêm mĭn: Si klei khua ƀĭng kna Y‑Pôl akâo kơ phung ƀuôn sang Aê Diê dưi hdĭp hlăm klei čang hmăng? Ya mta klei Aê Diê srăng brei kơ hlei pô đăo kjăp kơ Ñu amâo tuôm mlih ôh? Mơ̆ng ya anôk drei dưi bŏ hŏng klei čang hmăng hlăm thŭn mrâo 2022?
Phung anak ƀuôn sang Aê Diê dôk mđrăm mbĭt hŏng jih jang mnuih ti lăn ala drông thŭn mrâo 2022. Khădah klei ruă tưp ăt dôk, klei mblah ngă ăt hlăk hlê ti lu anôk, klei duah ƀơ̆ng kluôm lăn ala ka hmao lŏ wĭt… ƀiădah hruê mmông ăt yư̆ yư̆ găn gao leh anăn sa thŭn mrâo bhiâo hin truh leh yơh. Msĕ si sa klei mưng mâo leh mơ̆ng đưm, grăp čô hmăng hmưi sơăi yơh hlăm thŭn mrâo srăng mâo lu mta klei mrâo hĭn, jăk hĭn, leh anăn arăng bi kah mbha klei hơ̆k mơak hdơ̆ng găp hŏng klei blŭ hơêč hmưi thŭn mrâo bŏ hŏng klei čang hmăng.
Khua ƀĭng kna Y‑Pôl leh ñu mtô kơ phung anak ƀuôn sang Aê Diê ti ƀuôn prŏng Rôm hlăm kdrêč 14, 15, ñu čih leh klei blŭ kñăm ti knhal tuč leh anăn klei blŭ čhưn mơĭt kơ Phung Sang Aê Diê hlăm hră mơĭt Rôm 15:13 snei: “Akâo kơ Aê Diê, Pô jing klei čang hmăng, bi bŏ diih hŏng jih klei mơak leh anăn klei êđăp ênang hlăm klei đăo, čiăng kơ hŏng klei myang Yang Mngăt Jăk diih dưi mâo klei čang hmăng êbeh dlai!” Ñu akâo brei kơ phung đăo dưi dôk hdĭp hlăm klei čang hmăng, amâo djŏ klei čang hmăng hơăi mang ôh ƀiădah klei čang hmăng kluôm dhuôm kjăp mră kyuadah Aê Diê Pô yơh jing phŭn klei čang hmăng. Arăng bi hơêč hmưi hdơ̆ng găp hlăm thŭn mrâo ƀiădah amâo mâo mđing ôh klei blŭ hơêč hmưi anăn dưi jing sĭt amâodah hơăi, ƀiădah khua ƀĭng kna Y‑Pôl blŭ kñăm Aê Diê drei jing Pô brei kơ drei bŏ dlai klei hơ̆k mơak leh anăn klei êđăp ênang amâo guôn mâo klei blŭ hơêč hmưi thŭn mrâo ôh ƀiădah hŏng klei drei đăo kơ Pô jing phŭn klei čang hmăng. Boh tŭ dưn kyua mơ̆ng klei myang Yang Mngăt Jăk, drei dưi bŏ hŏng klei čang hmăng hĭn êjai.
Čhuang mŭt hlăm thŭn mrâo 2022, lu hlăm phung drei adôk tuôm hŏng lu klei rŭng răng hlăm klei hdĭp, amâo mâo ƀiă ôh mnuih dôk tlă anăp hŏng lu mta klei bi hmăi kơ klei hdĭp mda mơ̆ng klei ruă tưp: bruă mă, klei suaih asei mlei. Khă snăn dưn, akâo kơ Khua Yang brei drei mâo klei đăo knang kjăp amâo mâo mlih ôh kơ Aê Diê jing phŭn klei čang hmăng, Pô dôk mprăp brei kơ drei sa anôk jăk mơak hlŏng lar, anôk anăn amâo mâo klei ruă tưp, klei rŭng răng, klei djiê ôh čiăng kơ drei dưi dôk mbĭt hŏng Khua Yang nanao (Y‑Yôhan 14:1-3). Drei mŭt hlăm thŭn mrâo hŏng djăp mta klei jăk mơak leh anăn klei êđăp ênang amâo djŏ ôh kyua klei hdĭp mâo klei ênưih ƀiădah kyuadah drei ăt đăo knang kjăp kơ Aê Diê. Hlăm klei myang Yang Mngăt Jăk, drei bŏ hŏng klei čang hmăng leh anăn hơ̆k mơak nanao, êđăp ênang ti krah klei mtŭk mtŭl hlăm klei hdĭp kyuadah drei mâo nanao klei myang guh kơang Aê Diê dôk mbĭt.
Si ngă drei bŏ hŏng klei čang hmăng čhuang mŭt hlăm thŭn mrâo 2022 mơ̆?
Wah lač: Ơ Khua Yang, wăt tơdah adôk lu klei dleh dlan truh, ƀiădah bi mni kơ Aê Diê jing phŭn anôk kâo knang, kâo đăo kơ Ih srăng brei kâo bŏ hŏng hơ̆k mơak, êđăp ênang. Akâo kơ Khua Yang brei kâo čhuang mŭt hlăm thŭn mrâo bŏ hŏng klei čang hmăng hlăm Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 2:42 – 3:16
Kênh Youtube BHKTHN:
