Klei Aê Diê Blŭ: II Klei Yăl Dliê 5:1-14
Êlan kliăng: “Brei jih jang mnơ̆ng thâo bi êwa bi mni kơ Yêhôwa.Bi mni bĕ kơ Yêhôwa! (Klei Mmuiñ Hđăp 150:6).
Klei êmuh ksiêm mĭn: Ya ngă Mtao Y-Salômôn bi kƀĭn phung khua gĭt gai? Leh kkung Hip klei bi mguôp hlăm Anôk doh jăk, ya klei mâo? Ya ngă Sang Yêhôwa bŏ hŏng knam? Ya ngă brei mâo klei bi mni kơ Aê Diê? Si ngă ai tiê drei bi mni kơ Aê Diê?
Hlăm knăm myơr Sang Yêhôwa, leh myơr mnơ̆ng ngă yang, kkung ba Hip klei bi mguôp hlăm Anôk doh jăk, êpul mmuñ leh anăn phung Lêwi mmuñ bi mni kơ Aê Diê: “Kyuadah ñu jing jăk, kyuadah klei ñu khăp sĭt suôr dôk nanao hlŏng lar” (êlan 13c; Klei Mmuñ Hđăp 118:1; 136:1). Leh anăn mtam, “Sang Yêhôwa bŏ hŏng knam…kyuadah klei guh kơang Yêhôwa bi bŏ leh sang Aê Diê” (êlan 13-14). Anei jing klei bi knăl mâo Aê Diê tinăn, Ñu tŭ ư klei myơr Sang Aê Diê leh anăn klei phung ƀuôn sang Israel kkuh mpŭ, bi mni. Aê Diê mơak hŏng klei diñu mmuñ bi mni kyua dŭm mta phŭn ti tluôn anei:
Tal sa, phung hlăm êpul tông ayŭ leh anăn êpul mmuñ jing phung Lêwi sơaĭ (êlan 12). Diñu jing phung Aê Diê ruah mơ̆ng phung Lêwi čiăng mă bruă hlăm Sang Yang (I Klei Yăl Dliê 15:2). Diñu mă bruă kơ Aê Diê hŏng klei mmuñ leh anăn bruă diñu ngă jing “bi mni leh anăn mpŭ mni Yêhôwa…” (I Klei Yăl Dliê 16:4). Tal dua, klei yuôm bhăn jing diñu bi mni kơ Aê Diê hŏng jih ai tiê kyua Aê Diê jing jăk êdimima. Klei Ñu khăp dôk lă lar! Diñu mâo truh 120 čô ayŭ ky hŏng phung yua kdrăp tông ayŭ mkăn leh anăn lu phung mmuñ. Tal tlâo, wăt phung hđeh điêt ăt dưi bi mni kơ Aê Diê. Mơ̆ng ƀăng êgei phung hđeh, Aê Diê mprăp leh klei mmuñ bi mni kơ Ñu (Y-Mathiơ 21:15-16). Sĭt phung Pharisi čiăng phung ƀĭng kna Aê Diê đăm bi mni ôh kơ Aê Diê, Ñu lač; “Kâo lač kơ diih, tơdah phung anei dôk ñăt, boh tâo yơh srăng ur.” (Y-Luk 19:37-40). Klă sĭt Aê Diê hrih mjing leh leh pă mta mnơ̆ng hdĭp knŏng pioh bi mni kơ Ñu jih hruê mlam (Klei Bi Êdah 4:8). Klei sĭt nik klă mngač: Aê Diê khăp hmư̆ drei amâodah djăp mta mnơ̆ng mmuñ bi mni kơ Ñu! Wăt phung bum ală, kngăl, ăt mmuñ bi mni kơ Ñu! Klă sĭt drei mâo lu mta phŭn hĭn kơ phung anăn čiăng mmuñ bi mni kơ Aê Diê! Tal pă, diñu “bi mguôp hlăm klei hơêč hmưi” (êlan 13). Êpul tông ayŭ leh anăn êpul mmuñ hlăk anăn mă bruă thâo mbruă (I Klei Yăl Dliê 9:33; 16:4), hriăm bi nik (I Klei Yăl Dliê 25:5-7). Kyua anăn jih jang êpul mmuñ bi mguôp msĕ sa čô! Klei djŏ hdră, jih ai tiê bi mni kơ Aê Diê jing čiăng snăk kyua klei anăn bi mơak kơ Aê Diê.
Phung đaŏ kơ Krist ăt brei dưi ruah čiăng bi mni kơ Aê Diê (Kôlôs 3:12-17). Brei drei thâo săng bi mni kơ Aê Diê jing bruă kkuh mpŭ, jing klei mă bruă kơ Aê Diê mơ̆ng drei pô amâo djŏ sa kdrêč čiăng mâo hlăm mmông kkuh mpŭ ôh! Aê Diê čiăng hmư̆ klei mmuñ bi mni kbiă mơ̆ng ai tiê drei. Aê Diê čiăng drei mâo klei mprăp bi jăk sĭt mmuñ bi mni kơ Aê Diê.
Klei drei bi mni kơ Aê Diê jing hjăn amâodah hlăm êpul mmuñ Sang Aê Diê djŏ mơ̆ jing klei bi mơak kơ Aê Diê?
Ơ Khua Yang, akâo kơ Ih đru kâo mmuñ bi mni kơ Ih nanao, bi mni kơ Ih hŏng jih ai tiê, jing mngăt, jih klei thâo kkuh mpŭ kơ Ih ăt msĕ mơh hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 11:12-40
Kênh Youtube BHKTHN:
