Klei Aê Diê Blŭ: Klei Bi Hriêng 12 :4
Êlan kliăng: “Sa mô̆ jăk jing msĕ si đuôn mtao kơ ung ñu, ƀiădah sa mô̆ bi hêñ gơ̆ jing msĕ si iêng ƀơ̆ng klang” (Klei Bi Hriêng 12:4)
Klei êmuh ksiêm mĭn: Si ngă klei bi kpleh plah wah sa čô mô̆ jăk leh anăn sa čô mô̆ amâo jăk? Si ngă Klei Bi Hriêng bi hriăm kơ klei hdĭp plah wah ung hŏng mô̆? Si ngă drei hdĭp čiăng jing sa čô mô̆ mâo knuih jăk leh anăn sa čô ung thâo mĭn?
Mtao Y-Salômôn brei anak ƀuh klei bi kpleh wah sa čô mô̆ mâo knuih jăk leh anăn sa čô mô̆ mluk mgu. Sa čô mô̆ thâo mĭn dưi dlăng jing sa čô mô̆ “mâo knuih jăk” sĭt suôr, kreh kriăng hlăm bruă knuă, thâo gĭt gai phung hlăm sang, mâo ai tiê thâo khăp đru kơ mnuih ƀun, thâo bi hriăm anak čô, leh anăn hĭn mơh ñu lŏ thâo đru ung čiăng mâo klei mni jăk leh anăn mâo kơhưm yuôm bhăn hlăm ala ƀuôn (Klei Bi Hriêng 31:10-31). Êlan“Sa mô̆ jăk jing msĕ si đuôn mtao kơ ung ñu” jing klei yuôm bhăn, jing klei mô̆ mpŭ kơ ung ba klei hưn ktưn, yuôm bhăn kơ ung pô. Mklăk hŏng, mô̆ mâo knuih jăk jing mô̆ mluk mgu, anăn jing mô̆ bi ênguôt, bi hêñ ung pô. Mniê mluk mgu bi rai kơhưm ung pô kyua amâo sĭt suôr, bi mlih ai tiê klei mĭn, lui klei ƀuăn rơ̆ng leh hŏng Aê Diê (Klei Bi Hriêng 2:17); jing mô̆ kreh bi mneh msao (Klei Bi Hriêng 19:13; 21:9,19); jing pô bi luč liê kơ ung pô, bruă mă, klei blŭ amâo mâo klei thâo mĭn. Boh blŭ “iêng ƀơ̆ng klang” jing sa čô mô̆ amâo jăk ngă kơ ung toh hroh mơ̆ng kđeh asăr truh kơ mngăt ai tiê. Klang kleh krơ̆ng asei mlei, iêng ƀơ̆ng klang snăn asei mlei ăt rai mơh. Boh blŭ “iêng ƀơ̆ng” lač kơ klei bi rai hlăm lam leh anăn jhat rai hluê hruê mmông. Mniê mluk mgu ăt ngă kơ asei mlei wăt hŏng mngăt ai tiê ung toh hroh hlăm grăp hruê, ngă truh kơ klei hêñ hlăm gŏ sang ăt msĕ mơh hlăm ala ƀuôn.
Klei bi dôk ung mô̆ hlăm Krist mâo nanao klei ƀuăn rơ̆ng ti anăp Aê Diê leh anăn Sang Aê Diê, kyua anăn, phung đaŏ kơ Krist brei răng hĭn hlăm klei hdĭp gŏ sang, kyua mơ̆ng klei hdĭp mbĭt, phung đaŏ kơ Krist bi êdah klei gưt asăp Aê Diê, klei đaŏ leh anăn knuih hdĭp ti krah êpul êya. Klei Aê Diê Blŭ bi hriăm: “Ơ phung mniê mâo ung, brei diih gưt kơ ung diih, msĕ si kơ Khua Yang” (Êphêsô 5:22). Klei mpŭ mơ̆ng sa čô mô̆ amâo djŏ ôh jing “ung khua, mô̆ hlŭn” amâo dah lač kơ klei êduh kƀah mơ̆ng sa čô mô̆, ƀiădah lač kơ bruă klam sa čô mô̆ hlăm gŏ sang. Ung ăt brei hluê ngă êlan klei Aê Diê Blŭ mtă “Ơ phung êkei mâo mô̆, brei diih khăp kơ mô̆ diih, msĕ si Krist khăp leh kơ Phung Sang Aê Diê leh anăn săn asei mlei Ñu pô kyua gơ̆” (Êphêsô 5:25). Brei ung hdĭp năng djŏ hŏng bruă klam Aê Diê jao jing pô gĭt gai gŏ sang. Akâo kơ Aê Diê brei kơ phung mniê hlăm Krist jing phung mniê mâo knuih jăk, leh anăn phung ung hlăm Krist thâo mpŭ kơ mô̆ pô ciăng mâo gŏ sang jăk mơak, leh anăn bi guh kơang Anăn Aê Diê.
Ya klei brei drei bi mlih čiăng jing sa čô mô̆ mâo knuih jăk? Ya klei brei drei bi mlih čiăng jing sa čô ung dưi mâo klei mpŭ hlăm ala ƀuôn leh anăn bi guh kơang Anăn Aê Diê?
Ơ Khua Yang, kâo bi mni lač jăk kơ Ih bi hriăm leh kâo hdĭp čiăng jing mô̆, ung mâo klei thâo mĭn. Akâo kơ Ih đru kâo hdĭp tui si Klei Aê Diê Blŭ mtô, hriăm mbŏ klei hdĭp huĭ mpŭ hlăm gŏ sang, hdĭp bi mơak kơ Aê Diê leh anăn bi guh kơang Anăn Ih hlăm êpul êya.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 4:1-5:
Kênh Youtube BHKTHN:
