Klei Aê Diê Blŭ: I Y-Yôhan 3:14-18
Êlan kliăng: “Hŏng klei anei jih jang mnuih srăng thâo kơ diih jing phung ƀĭng kna Kâo, tơdah diih bi khăp hdơ̆ng diih pô.” (Y-Yôhan 13:35)
Klei êmuh ksiêm mĭn: Ya klei brei thâo drei thâo kral sĭt Khua Yang leh anăn jing dŏ Ñu? Ya dua klei khua ƀĭng kna Y-Yôhan mtô brei ngă čiăng bi êdah klei khăp ayŏng adei? Si jing klei khăp hŏng bruă ngă leh anăn klei sĭt nik?
Hlăm jih jang hră čih mơĭt khua ƀĭng kna Y-Yôhan, pô Khua Yang khăp, lač klă klei khăp amâo knŏng jing êlan hdră hdĭp ôh, ƀiădah jing knuih phŭn kơ klei hdĭp pô đăo kơ Krist. Tinei, ñu kñăm klei khăp hlăm Phung Sang Aê Diê jing klei bi knăl kơ klei drei thâo kral sĭt Khua Yang leh anăn jing dŏ Ñu: “Drei thâo kơ drei kbiă leh mơ̆ng klei djiê mŭt hlăm klei hdĭp, kyuadah drei khăp kơ phung ayŏng adei. Hlei pô amâo thâo khăp ôh ăt dôk hlăm klei djiê” (êlan 14). Ñu bi klă klei anei kyuadah klei khăp amâo kbiă hriê mơ̆ng mnuih ôh ƀiădah mơ̆ng knuih Khua Yang: “Hlei pô amâo khăp, amâo thâo kral Aê Diê ôh; kyuadah Aê Diê jing klei khăp.” (I Y-Yôhan 4:8). Kyuanăn, klei khăp hlăm klei hdĭp phung đăo kơ Krist amâodah hlăm Phung Sang Aê Diê jing klei tuh bi lar klei khăp Khua Yang pioh brei leh kơ drei êlâo. Drei khăng dôk hdĭp soh kyuadah drei bi khăp hdơ̆ng drei tui si klei djhưng ai, tui si klei bhiăn anak mnuih. Khua Yang Yêsu khăp kơ drei, bi hmô klei mă bruă, săn asei mlei leh anăn iêô mthưr drei bi khăp hdơ̆ng drei msĕ si Ñu khăp.
Tui čuê, khua ƀĭng kna Y-Yôhan mtô klă jih klei brei ngă čiăng bi êdah klei khăp ayŏng adei. Tal sa, amâo bi êmut kơ ayŏng adei (êlan 15). Ñu lŏ mñă wĭt klei Blŭ Khua Yang Yêsu mtô snei, hlei pô ăl kơ ayŏng adei jing ngă klei soh bi mdjiê mnuih leh (Y-Mathiơ 5:22). Klei khăp kčưm dơ̆ng mơ̆ng klei bi mlih mrâo ai tiê klei mĭn hlăk drei mâo klei hdĭp mrâo, jing klei hdĭp hlŏng lar mơ̆ng Yang Mngăt Jăk, snăn amâo mâo klei ăl nač hlăm ai tiê ôh. Tal dua, klei khăp amâo knŏng hŏng klei blŭ ti êlah kƀuê ôh, ƀiădah brei mâo bruă đru dŏng, săn asei mlei, amâo mĭn kơ klei arăng lŏ bi wĭt kơ pô ôh (êlan 16-17). Sĭt êmĭt hĭn, klei khăp ayŏng adei mtrŭt drei thâo kah mbha mnơ̆ng drei mâo kơ ayŏng adei hlăk dôk găn klei kƀah. Kah mbha ăt jing sa êlan hdră hdĭp čiăng kơ drei amâo lĕ hlăm klei lu êbeh. Sĭt yơh, brei drei akâo klei ktrâo atăt mơ̆ng Yang Mngăt Jăk čiăng kơ đăm arăng mjhua ôh.
Knhal tuč, khua ƀĭng kna Y-Yôhan lŏ mñă kơ drei brei khăp hŏng klei sĭt (êlan 18). Klei khăp amâo djŏ knŏng ti “êlah kƀông” ƀiădah brei bi êdah hŏng bruă ngă sĭt êmĭt leh anăn hlăm klei sĭt nik Khua Yang. Khăp hlăm klei sĭt nik mblang jing amâo phưi lui klei ayŏng adei ngă soh ôh, jhŏng yua Klei Aê Diê Blŭ mtô lač, mñă brei kơ ayŏng adei tơdah diñu nao êlan soh, hŏng klei kñăm čiăng đru diñu jăk hĭn. Klei mtrŭt klei khăp brei sĭt klă. Khăp kơ mnuih mkăn amâo djŏ čiăng mâo klei bi mni ôh, amâo djŏ kyua klei tŭ dưn kơ pô amâodah mă ai digơ̆, ƀiădah kyua klei huĭ mpŭ kơ Aê Diê leh anăn klei mđing uêñ sĭt kbiă hriê mơ̆ng klei hdĭp myang mâo klei bi mlih mrâo leh.
Si drei dôk hdĭp hŏng klei khăp kơ grăp čô hlăm Phung Sang Aê Diê?
Wah lač: Ơ Ama kâo khăp! Bi mni lač jăk kơ Ih êdimi kyua Khua Yang jing klei khăp. Akâo Khua Yang bi mlih klei hdĭp myang kâo kyua klei khăp săn asei mlei leh anăn klei Ih ngă bruă čiăng kơ kâo ăt khăp kơ ayŏng adei kâo msĕ si klei khăp anăn mơh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
