Tshwmsim 2:1-7
Nqe cim zaj kawm:
“Tiamsis tshuav ib qho uas kuv tsis qhuas nej: Yav tas los nej yeej hlub kuv, tiamsis nimno nej tsis hlub kuv lawm” (Tshwmsim 2:4)
Lus nug xav:
– Pawg Ntseeg Efexus tau txais kev qhuas thiab raug qhuab ntuas txog yam twg?
– Tus Tswv nqua hu kom Pawg Ntseeg tig rov qab los dhau ntawm peb kauj ruam twg?
– Tej lus no tseem muaj nqis rau Pawg Ntseeg niaj hnub nimno li cas?
Efexus yog ib lub nroog loj thiab muaj kev vam meej txog kev ua lag luam, nyob ntawm ntug hiavtxwv Meditelanes, qhov uas Timthawj Paulus tau ua haujlwm kwv yees li peb xyoos thiab tau txais ntau yam txiaj ntsig zoo. Nyob hauv Tshwmsim 2:1-7, tej duab pivtxwv pab peb to taub tus Tswv tej lus: Tswv Yexus yog tus xa tsab ntawv; “timtswv” yog tus coj Pawg Ntseeg; “ncej kub txawb teeb” yog pivtxwv rau Pawg Ntseeg kev ci kaj rau hauv ntiajteb. Qhov uas tus Tswv tuav rawv xya lub hnub qub thiab mus mus los los hauv nruab nrab xya tus ncej kub txawb teeb qhia hais tias Nws yog tus Tswv Tswj Kav, Nws ibtxwm nyob nrog nraim thiab paub txhua yam haujlwm uas Pawg Ntseeg ua.
Qhov xubthawj, Tswv Yexus qhuas Pawg Ntseeg Efexus vim lawv txojkev ntseeg ruaj khov. Lawv rau siab ua haujlwm khwv khwv, ua siab ntev, ua tsis taus siab ntev rau cov neeg uas ua phem, thiab paub feebmeej qhov tseeb qhov cuav. Lawv tuav ruaj tej kevcai ntseeg tseeb, ua neej hauv txojkev dawb huv, thiab ua siab tawv tawm tsam tej uas tsis yog. Tej no yog cwjpwm tseem ceeb ntawm ib Pawg Ntseeg uas ncaj ncees rau tus Tswv. Kev ncaj ncees, qhov tseeb thiab kev ua siab ntev yog tej yam uas tus Tswv txaus siab. Txawm li ntawd los, tus Tswv kuj qhuab ntuas lawv txog ib yam uas tseem ceeb heev: Lawv tau tso lawv txojkev hlub thaum chiv thawj tseg lawm. Txawm lawv tseem tuav ruaj qhov tseeb thiab kev ncaj ncees, los lawv tsis muaj yam tseem ceeb tshaj plaws, uas yog txojkev hlub: kev hlub tus Tswv thiab kev hlub lwm tus. Lawv txojkev ntseeg qaug zuj zus mus rau kev ua raws feemxyuam heev dua kev fij tus kheej rau tus Tswv; qaug mus rau kev saib qhov tseeb qhov yog heev dua li kev sib hlub. Qhov no ceeb toom rau peb hais tias kev ncaj ncees uas tsis muaj kev hlub yuav ua rau txias zuj zus, thiab qhov tseeb uas tsis muaj kev hlub yuav dhau los ua kev coj nruj.
Tus Tswv nqua hu Pawg Ntseeg tig rov qab los dhau ntawm peb kauj ruam tseeb meej hais tias: yuav tsum rov nco txog, hloov siab lees txim, thiab rov ua tej haujlwm thaum chiv thawj dua (nqe 5). Lawv yuav tsum nco txog txojkev hlub thiab txojkev kub siab thaum chiv thawj, hloov siab lees txim txog tej uas lawv ua yuamkev sab ntsujplig, thiab tig rov qab los ua tej haujlwm uas tawm hauv txojkev hlub tiag tiag los. Qhov no tsis yog hloov tej haujlwm sab nraud xwb, tiamsis yog hloov dua siab tshiab. Tej lus qhia xaus nrog ib lo lus ceeb toom thiab ib lo lus cog tseg. Yog lawv tsis hloov siab tso kev txhaum tseg, Pawg Ntseeg yuav plam lub hwjchim ua timkhawv thiab lub zog hloov pauv tau lwm tus. Tiamsis tus uas kov yeej yuav tau txais txojsia ib txhis nyob ntawm Vajtswv lub xubntiag (nqe 7). Ntawm no yog ib lo lus hu kom nyob ruaj khov tsis yog hauv qhov tseeb xwb, tiamsis tseem nyob ruaj hauv txojkev hlub thiab.
Tej lus qhia no tseem muaj nqis rau Pawg Ntseeg niaj hnub nimno. Tej zaum peb yuav rau siab ntso ua Vajtswv tes haujlwm, ncaj ncees rau tej kevcai ntseeg, thiab nrhiav kev ua neej ncaj ncees, tiamsis peb muaj cuabkav plam txojkev hlub. Lub neej ntseeg Yexus tsis yog tsuas ua qhov yog xwb, tiamsis yuav tsum ua nrog lub siab hlub tus Tswv. Txojkev hlub yuav tsum yog lub hauvpaus txhawb zog rau txhua yam haujlwm. Yog tsis muaj txojkev hlub, ces txhua yam kev siv zog yuav tsis muaj qabhau dabtsi (I Kauleethaus 13:1-3).
Thov Vajtswv,
Tus Tswv, thov Koj zam txim rau nyuam yaus thaum nyuam yaus ua Koj tes haujlwm tiamsis tsis muaj txojkev hlub. Thov qhia nyuam yaus ua neej ncaj ncees nrog txojkev hlub tshua, tuav ruaj qhov tseeb nrog koob hmoov hlub, thiab hlub Koj kawg siab kawg ntsws, hlub lwm tus ib yam li hlub nyuam yaus tus kheej. Nyuam yaus tuav Tswv Yexus Khetos lub npe thov, Amees.
Peb yuav tsum hloov thiab pab lwm tus hloov dabtsi kom Pawg Ntseeg huamvam ntxiv?
Nyeem Vajluskub hauv peb lub xyoos: Yauj 2
Kênh Youtube BHKTHN:
