Yôhan 13:34-35
“Na dang ei Inh wă pơkă ăn kơ iĕm tơdrong ‘nao âu: Inh wă kơ iĕm băt ‘mêm mơnat dih băl. Iĕm athei băt ‘mêm mơnat dih băl kư̆m thoi Inh ‘mêm mơnat kơ iĕm. 35 Dah iĕm đei đon ‘mêm mơnat dih băl, lei đĭ đăng bơngai băt kơ iĕm lui kơ Inh.” (Yôhan 13:34-35)
Nơ̆r jet tơchĕng pơwao:
– Khôi juăt ‘nao Kră Yang Yêsu ăn đei tơdrong kiơ ‘nao?
– Tơdrong ‘lơ̆ng ‘mêm mơnat lăm khôi juăt ‘nao Kră Yang ăn noh kiơ?
– Bơngai lui arih tŏk bŏk tơdrong tơpăt păng ‘mêm mơnat gô pơchrang tơdrong ‘mêm Kră Yang lăm teh đak âu thoi yơ?
Khôi juăt ‘mêm mơnat đơ̆ng Kră Yang ‘Bok Kei-Dei đei bơtho ăn lăm Pah so (LĐ Êyiptơ 19:18) na lăm Sơ̆p Hla bơar Tơdrong ‘Nao ‘Lơ̆ng kiơ̆ kơ Yôhan 13:34-35, Kră Yang Yêsu bơtho khôi juăt ‘nao: “Inh wă kơ iĕm băt ‘mêm mơnat dih băl. Iĕm athei băt ‘mêm mơnat dih băl kư̆m thoi Inh ‘mêm mơnat kơ iĕm.” Noh bơih tơdrong hơgăt lăm tơdrong ‘mêm, tơdrong ‘mêm băt pŭ iŏk, adrin bơ̆jang păng dan tơdrong wă đe adrol kơ tơdrong bơ̆n wă. Kră Yang kư̆m khan tơdrong ‘mêm noh tơdra băt kơnăl minh ‘nu bơngai lui tơpă. Ưh kơ trŏ tơ’bôh hăm nơ̆r pơma đĕch ôh, tơdrong jang dah hlôh wao, mălei đơ̆ng tơdrong arih băt ‘mêm mơnat na đe gô ‘bôh bơ̆n gah Kră Yang. Kơlih kơ thoi noh, tơdrong juăt Kră Yang ăn wă pơma hơđăl chăl arih lui kiơ̆ Kră Yang athei pơm tơ’bôh mă rơđah hăm tơdrong ‘mêm pơm tơ’bôh, pơchrang jơhngơ̆m lăm ‘Bok Krist.
Hloh kơ noh dơ̆ng, Kră Yang Yêsu ăn kơ lu bơngai lui tơdrong ‘lơ̆ng lăm ‘mêm mơnat lăm khôi juăt ‘nao: ‘Noh ưh kơ trŏ lăp ‘mêm mơnat dih băl đĕch ôh, mălei athei ‘mêm thoi Kră Yang ‘mêm kơ bơ̆n. ‘Nâu bơih tơdrong ‘mêm pŭ iŏk, iŏk đon ala păng tơpă thoi kơmĭl Kră Yang đei pơm tơ’bôh ôp jơ̆ng lu bơngai pơhrăm păng Sư. Kơlih kơ thoi noh, chăl arih tơpăt ưh kơ trŏ khan arih trŏ kiơ̆ tơdrong hơgăt, mălei athei arih tơ’bôh tơdrong ‘mêm ‘Bok Krist hăm bơngai nai. Khôi juăt ‘nao tơguăt tơdrong tơ’bưh “đơ̆ng kơpal” hăm Kră Yang păng tơdrong tơ’bưh “tơduă” kon bơngai bơ̆n.
Khôi juăt ‘nao Kră Yang ăn kư̆m đei tơ’bôh tơdrong ‘mêm noh băt tơdra rơđah hơđăl kơ minh ‘nu bơngai lui. Đei bơngai ưh kơ ‘bôh đĭ đon lui gah lăm kơ minh ‘nu bơngai lui, mălei đe gô ‘bôh đơ̆ng tơdrong bơ̆n ‘mêm dih băl. Ramsey Michaels pơma khan arih ‘mêm mơnat jơ̆ “tơguăt hiơ̆k bơngơ̆t đơ̆ng tơduă kon Kră Yang păng lu sư hiơ̆k dih băl hăm lu bơngai tơ ala teh hloi mơ̆n yua kơ lu sư bơih bơngai ră roi tơdrong Kră Yang Yêsu. Kơplah bơngai lui arih lăm tơdrong ‘mêm tơpă, băt mơnat, băt awih awăn păng gơh tơiung dih băl, lei na Khul Bơngai Lui jing pơm kơdranh kơ lăm teh đak âu. Thoi noh, Bơngai Lui đei krao arih lăm tơdrong tơpăt păng tơdrong ‘mêm. Tơpăt bơwei bơ̆n lăm tơdrong ‘lơ̆ng na tơdrong ‘mêm tơ’bôh tơdrong ‘lơ̆ng trŏ noh ‘bĕnh tơdrong ‘mêm mơnat ăn đĕch. Kơplah rim bơngai lui rok kiơ̆ kơmĭl Kră Yang Yêsu, arih ‘mêm mơnat hăm tơdrong tơ’bôh rơđah hơđăl rim năr, lei na Bơngai Lui gô pơchrang tơdrong ‘mêm Kră Yang, păng bơngai ala teh gô băt kơnăl lu bơ̆n bơngai lui tơpă.
Ơ Kră Yang, inh bơnê kơ Ih đei ăn khôi juăt ‘nao kơ kon pơlei Ih, apinh Ih tơgŭm inh arih tŏk bŏk lăm tơdrong tơpăt păng tơdrong ‘mêm lăm bơngai lui hăm tơdrong pơm tơ’bôh rơđah hơđăl wă kơ đơ̆ng inh, tơdrong ‘mêm Kră Yang pơchrang kơ lơ bơngai nai, krao khan yua anăn Kră Yang Yêsu Krist, Amen.
Tơdrong kiơ tơ’bôh kơ bơ̆n arih tơpăt păng ‘mêm mơnat hăm ‘nhŏng oh bơ̆n lăm Khul Bơngai Lui?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 134-135
Kênh Youtube BHKTHN:
