Klei Aê Diê Blŭ: Klei Mmuñ Hđăp 89:14
Êlan kliăng: “Klei kpă ênô leh anăn klei djŏ jing atur kơ jhưng mtao Ih; klei khăp leh anăn klei sĭt suôr nao ti anăp Ih.” (Klei Mmuñ Hđăp 89:14)
Klei êmuh ksiêm mĭn: Si Klei Mmuñ Hđăp 89:14 bi êdah kơ klei kpă ênô leh anăn klei khăp Aê Diê? Si klei iêô mthưr Phung Sang Aê Diê mkŏ mdơ̆ng ti dlông atur anăn? Si klei iêô mthưr drei hdĭp bi knar plah wah klei kpă ênô leh anăn klei khăp?
Klei Mmuñ Hđăp 89:14 lač klă snei “Klei kpă ênô leh anăn klei djŏ jing atur kơ jhưng mtao Aê Diê”, mblang jing jih jang klei Aê Diê kiă kriê dưm ti dlông hnơ̆ng čuăn klei djŏ khut khat leh anăn doh jăk sơăi. Ñu amâo ngă bruă tui si klei djhưng ai tiê amâodah dlăng mdê mdê ôh, ƀiădah knŏng hŏng klei kpă ênô leh anăn klei sĭt nik. Hrăm mbĭt hŏng klei anăn, êlan Klei Aê Diê Blŭ lŏ mtô snei: “Klei khăp leh anăn klei sĭt suôr nao ti anăp Aê Diê”, brei ƀuh jih jang bruă ngă mâo klei atăt gai hŏng klei khăp leh anăn sĭt suôr čiăng dưi ba klei hdĭp kơ jih jang mnuih. Spence Jones sa čô knhâo ksiêm hriăm kơ Klei đăo mblang klă hĭn msĕ snei: “Djăp mta bruă Aê Diê ngă, Ñu ngă hŏng klei sĭt nik leh anăn kpă ênô sơăi”. Klei anei bi êdah klei Aê Diê kiă kriê amâo hjăn knŏng hŏng klei djŏ ƀiădah wăt bŏ hŏng klei pap, kñăm phă klei bi mtlaih leh anăn klei mkŏ mdơ̆ng anak mnuih nanao. Aê Diê kpă ênô phat kđi klei soh ƀiădah Pô klei khăp ăt brei mbĭt wăt klei pap čiăng bi tui phung mnuih soh thâo kmhal kơ klei soh. Kyuanăn, Aê Diê wăt jing Pô doh jăk hlăm klei kpă ênô, wăt jing Pô jĕ giăm hlăm klei khăp, jih dua mta phŭn anei amâo dưi bi ktlah ôh ƀiădah bi mguôp mbĭt kluôm dhuôm.
Phung Sang Aê Diê ăt mâo klei iêô mthưr mkŏ mdơ̆ng ti dlông atur anăn, hdĭp tui si klei sĭt nik Klei Aê Diê Blŭ leh anăn răng kriê klei hdĭp kpă ênô ti anăp Khua Yang. Tơdah grăp čô mnuih đăo hdĭp ênuah ênô hlăm klei mĭn, klei blŭ leh anăn klei ngă, Phung Sang Aê Diê srăng dôk kjăp leh anăn bi êdah klei doh jăk Aê Diê. Ƀiădah lĕ, Aê Diê amâo knŏng jing Pô kpă ênô ƀiădah wăt bŏ hŏng klei khăp leh anăn klei sĭt suôr mơh. Klei khăp ñu nao êlâo, bi êdah knuih jăk Ñu leh anăn jĕ giăm hŏng anak mnuih. Kyuanăn, Phung Sang Aê Diê amâo knŏng djă pioh klei sĭt nik ƀiădah wăt dôk hdĭp bi khăp: thâo bi pap brei, tŭ gĭr leh anăn bi đru hdơ̆ng găp. Klei khăp bi hdĭp klei sĭt nik leh anăn ba hriê klei rŭ mdơ̆ng hlăm êpul êya klei đăo.
Klei Mmuñ Hđăp 89:14 kñăm ktang kơ dua mta knuih yuôm bhăn Phung Sang Aê Diê Ñu. Tơdah klei kpă ênô leh anăn klei khăp bi mguôp mbĭt, Phung Sang Aê Diê srăng bi êdah kluôm dhuôm rup Aê Diê. Klei kpă ênô srăng ba hriê atur kjăp, krơ̆ng kơ klei khăp amâo soh wê, bi klei khăp ba hriê klei bi mguôp jing sa leh anăn mđao, krơ̆ng kơ klei kpă ênô đăm jing khăng ktang. Kyuanăn, grăp čô phung đăo mâo klei iêô mthưr brei hdĭp bi knar jih dua, čiăng kơ Phung Sang Aê Diê jing klei hưn bi sĭt hdĭp kơ klei guh kơang Aê Diê.
Si klei drei dôk hdĭp kpă ênô leh anăn thâo khăp hŏng ayŏng amai adei drei hlăm Phung Sang Aê Diê?
Wah lač: Ơ Khua Yang, akâo Khua Yang mdơ̆ng klei hdĭp kâo ti dlông klei kpă ênô Ih leh anăn bi bŏ kâo hŏng klei khăp sĭt suôr Ih. Akâo Khua Yang đru kâo hdĭp hlăm klei sĭt nik Ih, leh anăn thâo khăp kơ mnuih mkăn tui si klei kpă ênô Khua Yang čiăng kơ Phung Sang Aê Diê dưi bi êdah klei guh kơang Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 132-133
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
