Hơriso 9:15-20
“Kră Yang pơdah boih Sư kơdih; đơ̆ng sek tơlang tơpăt; lu bơngai pơm kơnê̆, ‘leh boih lăm hơnhuăl đơ̆ng ti lu sư dăng kơdih.” (Hơriso 9:16).
Nơ̆r jet tơchĕng pơwao:
– Tơdrong arih lu kon pơlei thoi yơ?
– Yua kơ kiơ lu bơngai pơm kơnê̆ păng kon pơlei hiơt kơ ‘Bok Kei-Dei na huŏng tơ pơlei lu lôch?
– Đei bơtho kơ lu bơ̆n athei arih thoi yơ ‘bơ̆t Tơ’ngla sek tơlang tơpăt?
Hơriso 9:15-17 pơma roi gah tơdrong arih kon pơlei arih ưh kơ trŏ hăm tơdrong ‘Bok Kei-Dei kơnhăm ‘lơ̆ng đei tơdă hơmet lê̆ bơih noh. Lu sư pơrăm bơngai nai mălei Kră Yang mă ‘lơ̆ng tơpăt pơm kơ lu sư huŏng lăm sơlŭng đêl lu sư sir yuă iŏk tơdrong chŭr nuih đêl lu sư rei, păng sư dŏng tơgŭm lu bơngai đe pơm kơnê̆. Bơngai mă pơm kơnê̆ noh lu bơngai yoch rơđah hơđăl dêh gah tơdrong pơm ‘lơ̆ng: Ưh kơ chu yom kơ mĕ ‘bă, pơlôch bơngai, tơtông klĕ, pơm kơdranh hơlĕnh hưp ham, pơm pơgŏ pơđep đe păng tơgar iŏk mŭk tơmam đe. Lăm noh, lu kon pơlei hiơt kơ Kră Yang, ưh kơ băt kơ Kră Yang jơ̆ Tơ’ngla pơjing pơgơ̆r lu sư na ayăt kơ Kră Yang, pơang, ưh kơkuh kơ Sư, pơm rup yang păng kơkuh kơ rup yang noh, lu sư pơjăm Anăn Kră Yang ‘Bok Kei-Dei, ưh kơ đei tơ’bưh hăm Kră Yang păng ưh kơ pơm kiơ̆ tơdrong Kră Yang pơjao kơ kon bơngai.
Hăm trŏ kơ ‘Bok Kei-Dei đei pơm dêh kơ lu sư ưh kơplah lê̆ kơ lu bơngai pơm kơnê̆ păng lu kon pơlei mă hiơt kơ ‘Bok Kei-Dei “huŏng tơ pơlei lu lôch” (trong 17). Tơdrong ‘Bok Kei-Dei sek tơlang ling lang tơpăt, ưh kơ đei bơngai bu mă ưh kơ chu Kră Yang na gơh arih ‘lơ̆ng tơpăt, hiôk hơiă hăm bơngai nai. Đơ̆ng năr kon bơngai pơ̆k huŏng đĭ đăng kon bơngai kiơ̆ tơdrong yoch ngăl. Tơdrong yoch pơm kơ kon bơngai rai pơm kơnê̆ hloh. Đĭ đăng kon bơngai trŏ kơ oei lăm măng mu. Mălei yua kơ tơdrong ‘mêm mơnat, Kră Yang ăn kơ kon bơngai gơh dŏng pơklaih đơ̆ng Kră Yang Yêsu huai iŏk tơdrong yoch bơ̆n. Đe bu mă sơng iŏk Kră Yang Yêsu gơh hiôk hơiă hăm ‘Bok Kei-Dei, iŏk tơdrong mơsêh đơ̆ng Yang Bơhngol ‘Lơ̆ng gơh tơplih wă kơ arih trŏ lăm tơdrong tơ’bưh hăm Kră Yang păng kon bơngai.
Pơtao Đawit tơ’blŏk kơ kon pơlei đơ̆ng rŏng kơ pơm yoch noh “ăn kơ kon bơngai băt, sư jing bơngai hmă đĕch” (trong 20). Tơdrong arih kon bơngai đei hơgăt, đe areh kơ bơ̆n păng arih lăm jơ năr kơ đeh đơ̆ng noh lôch wă iŏk tơdrong Kră Yang sek tơlang. Kon bơngai ưh kơ gơh băt tơdrong tơ anăp păng tơdrong arih bơ̆n thoi noh ling lang ưh kơ hơđơ̆ng. Lu sư wă wei mŭk tơmam păng tơdrong kĕ pran kơdih wă pơm anih gơmring hơđơ̆ng kơdih, mălei dôm tơdrong noh ưh kơ yua kiơ ôh. Kon bơngai gô mơ̆ng kơ Kră Yang păng ưh kơ kĕ jei đơ̆ng Kră Yang mơsêh. Kơlih kơ thoi noh, bơ̆n ‘nĕ kơ lui ngeh kơ bơngai mă wă pơrăm bơ̆n. Yua kơ lu sư gô huŏng lăm sơlŭng đơ̆ng lu sư sir. Bơ̆n lui kơ Kră Yang, đei Kră Yang jô̆ ‘lơng tơpăt, athei lui kơjăp kơ Kră Yang ‘lơ̆ng tơpăt ling lang dŏng bơ̆n lăm tơdrong đe wă pơm kơnê̆ kơ bơ̆n, păng kư̆ kơjăp arih ‘lơ̆ng tơpăt păng ‘mêm mơnat truh lôch.
Ơ Kră Yang mă ‘lơ̆ng tơpăt păng ‘mêm mơnat jơ̆ ‘Bă lu nhôn! Inh băt inh âu bơngai yoch đei Ih mơnat păng bơwei inh klaih đơ̆ng lu bơngai pơm kơnê̆. Apinh Ih ăn kơ inh arih băt lui yom, băt bơnê kơ Ih, lui gơnang kơ Ih, pơhrăm pơjuăt arih ‘lơ̆ng rơgoh păng băt ‘mêm mơnat thoi ‘Bă tơ kơpal plĕnh, krao khan yua anăn Kră Yang Yêsu Krist, Amen.
Tơdrong arih bơ̆n pơm tơ’bôh jơhngơ̆m lui gơnang kơ tơdrong Kră Yang sek tơlang tơpăt thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: II Kôrintô 13
Kênh Youtube BHKTHN:
