Ntawv Nkauj 9:15-20
Nqe cim:
“Tus TSWV qhia nws rau lawv paub ntawm txojkev txiav txim ncaj ncees, thiab cov neeg ua phem rov mag rooj ntanpuj uas lawv cuab.” (Ntawv Nkauj 9:16)
Lus nug xav:
– Lub tsamthawj ntawm tej haivneeg zoo li cas?
– Vim li cas cov neeg phem thiab txhua haivneeg uas tsis nco Vajtswv txiajntsig yuav mus rau tub tuagteb?
– Vajtswv Txojlus qhia peb yuav tsum ua neej li cas tabmeeg Tus txiav txim ncaj ncees?
Ntawv Nkauj 9:15–17 qhia txog lub tsamthawj ntawm tej haivneeg, vim lawv tau ua neej txhaum Vajtswv lub homphiaj uas Nws npaj tseg. Lawv npaj siab ua phem rau lwm tus, tiamsis Vajtswv tus uas ncaj ncees ua rau lawv poob rau hauv lub qhov uas yog lawv khawb, sau tej kev phem uas lawv tau tseb thiab Vajtswv tiv thaiv cov neeg uas raug luag tsimtxom. Cov neeg phem yog cov uas ua txhaum Vajtswv tus cai kev ua zoo, xws li lawv tsis hwm niam txiv, tua neeg, deev luag pojniam luag txiv, ua tub sab, ua timkhawv tsis tseeb, ntshaw luag tug, tsimtxom lwm tus thiab txeeb luag tug los ua lawv tug. Tej haivneeg tsis nco qab Vajtswv, tsis lees paub Vajtswv yog Tus uas Tsim ib puas tsav yam thiab muaj hwjchim kav lawv, lawv thiaj tawmtsam Vajtswv, khavtheeb, tsis pehawm Nws, lawv txua mlom thiab pe tej mlom ntawd. Lawv saib tsis taus Tus Tswv lub Npe, tsis txhim tsa kev sib raug zoo nrog Vajtswv, thiab tsis ua raws li Vajtswv tej lus samhwm rau tibneeg.
Puas yog Vajtswv rau txim hnyav dhau rau cov neeg phem thiab tej haivneeg uas tsis nco qab Vajtswv “mus rau hauv tub tuag teb” (Ntawv Nkauj 9:17)? Vajtswv txoj kev txiav txim yeej ncaj ncees tas li. Tsis muaj ib tug neeg twg ua neej tsis hwm Vajtswv ces nws txawm muaj peevxwm ua tau neej ncaj ncees thiab nyob sib haumxeeb nrog lwm tus li. Txij thaum tibneeg poob kev txhaum los, txhua tus puavleej ua txhaum lawm. Lub siab ibtxwm nyiam ua txhaum haj yam ua rau tibneeg ua phem zuj zus heev. Txhua tus tibneeg puavleej tsimnyog poob mus rau hauv ntuj tawg. Tiamsis vim Vajtswv txoj kev hlub tshua, Nws thiaj pub txoj kev cawmdim rau tibneeg dhau los ntawm tus Tswv Yexus Khetos txoj kev tuag theej tibneeg lub txhoj. Tus uas ntseeg txais yuav Tus Tswv Yexus yuav rov tau sib raug zoo nrog Vajtswv, thiab tau txais Vaj Ntsujplig lub hwjchim los hloov nws lub neej kom ua tau lub neej haum Vajtswv siab thiab haum nrog lwm tus.
Vajntxwv Daviv ntuas hais tias tom qab uas tibneeg poob kev txhaum lawm, txhua haivneeg tsuas yog “noobneej xwb” (Ntawv Nkauj 9:20), kev ua neej dhau los muaj nrim, yug los nyob hauv ntiajteb tsis ntev xwb ces yuav tuag thiab yuav raug Vajtswv txiav txim. Tibneeg tsis muaj peevxwm tuav tau yus lub neej yav tom ntej thiab txojsia, vim li ntawd niaj hnub ua neej muaj kev txhawj ntshai, tsis kaj siab. Lawv xav kom muaj nyiaj txiag thiab meejmom hwjchim los ua qhov chaw vamkhom, tiamsis txhua yam ntawd puavleej tsis muaj qabhau. Tibneeg tsuas nyob ntawm Vajtswv xwb, yeej tsis muaj leejtwg yuav tawmtsam yeej Vajtswv tus uas muaj hwjchim loj kawg nkaus. Vim li ntawd, tsis txhob cia siab rau yus tej tswv yim ua phem rau lwm tus, rau qhov yus yuav rov poob rau hauv lub qhov uas yus khawb. Peb ntseeg Tswv Yexus, Vajtswv suav peb ncaj ncees, cia li ntseeg ruaj rau Vajtswv tus uas ncaj ncees Nws yeej ib txwm tuaj peb tog pab peb dim ntawm cov neeg phem tej tswvyim ua phem, vim li ntawd peb cia li ruaj siab ua neej ncaj ncees thiab muaj kev hlub mus txog hnub kawg.
Thov Vajtswv,
Vaj Leej Txiv Tus Ncaj Ncees thiab Muaj Kev Hlub! Ua tsaug uas Koj hlub tshua nyuam yaus txawm nyuam yaus yog ib tug neeg txhaum tsis tsimnyog. Koj yog Tus ib txwm tiv thaiv nyuam yaus ntawm txhua txoj kev tsimtxom, quab yuam, caij tsuj. Thov Koj qhia nyuam yaus kom paub hwm Koj, ua Koj tsaug txhua hnub, thiab ua neej ncaj ncees muaj kev hlub zoo ib yam li Koj. Nyuam yaus tuav Tswv Yexus Khetos lub npe thov, Amees.
Peb txoj kev ua neej qhia tawm lub siab ntseeg thiab tso siab rau Vajtswv tus uas txiav txim ncaj ncees li cas?
Nyeem Vajluskub hauv peb lub xyoos: 2 Kauleethaus 13
Kênh Youtube BHKTHN:
