Pajlug 31:8-9
Nqe cim:
“Pab txheem cov pluag thiab cov txomnyem txoj cai, pab lawv hais thiab txiav txim kom ncaj ncees.” (Pajlug 31:9)
Lus nug xav:
– Vajntxwv Lemuyees niam ntuas nws li cas?
– Cov lus ntuas ntawd hais txog yam dabtsi uas tus thawjcoj yuav tsum muaj?
– Peb yuav coj tej lus qhia no los siv rau peb lub neej li cas?
Pajlug tshooj 31 yog Vajntxwv Lemuyees niam tej lus ntuas rau nws. Vajluskub tsis qhia meej txog Vajntxwv Lemuyees yog leejtwg. Hauv ob lub tebchaws sab qab teb thiab qaum teb yeej tsis muaj ib tug vajntxwv twg hu ua Lemuyees, thiab lub npe no kuj tsis yog npe Henplais. Hauv nqe 3-7, Vajntxwv Lemuyees niam ntuas nws txog tej yam uas: Tsis txhob ua! Tiamsis hauv nqe 8-9, nws qhia txog tej yam uas: yuav tsum ua!.
Cia li pab “cov neeg uas lawv tsis muaj cuabkav hais lawv zaj” thiab “cov tsis muaj txhaum uas tsis muaj chaw vamkhom.” “Cov neeg uas lawv tsis muaj cuabkav hais lawv zaj” tsis yog cov neeg ruam hais tsis tau lus, tiamsis yog cov uas tsis muaj suab lus hauv zejzog lossis tsis muaj peevxwm hais daws lawv tus kheej hauv tsev hais plaub. Lawv tej zaum yog cov tsis paub ntawv, lossis tsis muaj peevxwm los hais qhia lawv qhov tseeb, lossis pluag dhau tsis muaj txaus povthawj, lossis raug luag saib tsis taus (Ntawv Nkauj 72:12-14). “Cov tsis muaj txhaum uas tsis muaj chaw vamkhom” tej zaum yog cov uas raug txiav txim tuag, lossis cov neeg txomnyem thiab raug ntsib kev nyuaj siab.
Tus tswjkav tebchaws tau Vajtswv tsa los saib xyuas ua kom muaj kev ncaj ncees rau sawvdaws, tsis hais cov uas yooj yim raug luag tso tseg, raug muab thawb rau ib sab lossis raug tsis quavntsej. Vim li ntawd, thaum ib tug vajntxwv txiav txim ncaj ncees, ces tsis tsuas yog tivthaiv cov uas tsis muaj peevxwm tivthaiv lawv tus kheej xwb, tiamsis tseem yog rov tivthais nws lub zwmtxwv vajntxwv kom nyob ruaj khov ntag, rau qhov Vajtswv pub nqi zog rau cov uas sawv tivthaiv cov neeg pluag (Pajlug 20:28). Qhov uas tsis hwm txoj kevcai thiab tsis tivthaiv cov neeg tsis muaj chaw vam tsis yog teebmeem sab nomtswv lossis sab kev coj ua xwb, tiamsis tseem yog kev ua saib tsis taus Vajtswv tus uas Tsim Txhua Yam (Pajlug 14:31; 17:5).
Txawm li ntawd los, peb yuav tsum paub cais qhov txawv ntawm kev tivthaiv kev ncaj ncees rau cov neeg raug tsimtxom thiab kev txiav txim xaiv ntsej xaiv muag. Vajntxwv Lemuyees niam tsis qhia kom nws txiav txim tsuas pab cov neeg pluag xwb, tiamsis qhia nws “txiav txim kom ncaj ncees” thiab tsis txhob cia cov muaj hwjchim los ntxias lossis quab yuam thaum txiav txim (nqe 9). Txoj kevcai siv ib yam nkaus rau sawvdaws. Yog cov neeg pluag ua txhaum, lawv kuj yuav tsum raug txim raws txoj kevcai thiab. Qhov tseemceeb yog txiav txim kom yog neeg, yog txim thiab tsis xaiv ntsej muag vim tus neeg ntawd muaj lub meejmom lossis tsis muaj.
Tus thawjcoj yuav tsum nco ntsoov hais tias lub hwjchim yeej mus nrog lub luag haujlwm ua ke. Coob leej xav tau lub hwjchim, meejmom thiab txojcai, tiamsis tsis kam ris lub luag haujlwm uas koom nrog lub hwjchim ntawd (Lukas 12:48). Vajntxwv Lemuyees niam thiaj ntuas nws kom ceevfaj thaum siv lub hwjchim, yuav tsum paub tswj tus kheej, tsis txhob siv txoj haujlwm los ua kom txaus siab rau tus kheej txojkev ntshaw (nqe 3-8), tiamsis yuav tsum ua nws tes haujlwm ncaj ncees thiab raws li Vajtswv lub siab nyiam.
Thov Vajtswv,
Tus Tswv, thov Koj pab kom nyuam yaus ua neej ncaj ncees txhua hnub, kom xwv nyuam yaus thiaj ua tiav tes haujlwm thiab lub hwjchim uas Koj muab pub hauv tsevneeg, hauv pawg ntseeg thiab hauv zejzos raws li Koj Txojlus qhia. Nyuam yaus tuav Tswv Yexus Khetos lub npe thov, Amees.
Peb tabtom siv lub hwjchim uas Vajtswv muab pub los ua raws kev ncaj ncees, lossis tabtom siv yuam kev kom txaus siab rau peb tus kheej?
Nyeem Vajluskub hauv peb lub xyoos Malakaus 15
Kênh Youtube BHKTHN:
