Mathiơ 22:34-40
“Yêsu khan kơ sư thoi âu: Bơ̆n athei ‘mêm kơ ‘Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng.” (Mathiơ 22:37)
Nơ̆r jet tơchĕng pơwao:
– Thây bơtho tơdrong juăt đe Juđê jet Kră Yang Yêsu tơdrong kiơ?
– Nơ̆r Kră Yang tơl wă khan thoi yơ gah tơdrong tơpăt păng tơdrong ‘mêm đơ̆ng Kră Yang ‘Bok Kei-Dei?
– Lu bơ̆n arih ‘lơ̆ng tơpăt đơ̆ng tơdrong ‘mêm thoi yơ?
Kơplah đe jet Kră Yang Yêsu tơdrong juăt ayơ kăl hloh, Sư ưh kơ đei khan roi tơdrong juăt ayơ mălei Sư đei pơma lăm tơdrong athei pơm kiơ̆ thoi ‘Bok Kei-Dei wă kơ lăm ‘bar tơdrong juăt kăl hloh: “Bơ̆n athei ‘mêm kơ ‘Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng” păng “Bơ̆n athei ‘mêm kơ bôl buăl thoi bơ̆n ‘mêm kơ akâu kơdih” (trong 37, 39). Kră Yang pơma hơđăl: “Bu pơm kiơ̆ ‘bar tơdrong juăt âu tơpă, bơngai noh sư huay kơ hŭt lê̆ dôm tơdrong juăt Môis păng dôm tơdrong lu bơngai pơtruh nơ̆r ‘Bok Kei-Dei chih sơ̆”. Kră Yang Yêsu tơ’bôh tơdrong tơpăt tơpă ưh kơ tơklah đơ̆ng tơdrong ‘mêm na đei pơm tơ’bôh đơ̆ng tơdrong ‘mêm ‘măn kơ Kră Yang păng bôl buăl.
Hăm lơ bơngai, arih ‘lơ̆ng tơpăt noh đĭ jơhngơ̆m wei răk dôm tơdrong juăt tơdrong lui, mălei Kră Yang iŏk tơdrong tơm kăl dan tơ dôm tơdrong arih gah lăm. ‘Mêm kơ Kră Yang ‘Bok Kei-Dei hăm đĭ jơhngơ̆m klơm klak păng đĭ dôm tơdrong đon bơ̆n tơchĕng wă khan tơdrong tơpăt pơtơm đơ̆ng tơdrong pơyơ̆r tôm tơdrong kơ ‘Bok Kei-Dei. ‘Noh ưh kơ sĭ pơm lu tơdrong trŏ đĕch na noh ‘mêm kơ Kră Yang mă trŏ. Kơplah tơdrong ‘mêm ‘măn kơ ‘Bok Kei-Dei pơgơ̆r tơdrong arih lăm jơhngơ̆m bơ̆n, tơdrong chu yom gô jing minh nơ̆r tơl chơt hiôk ưh kơ sĭ tơdrong jang trăp trĭn ôh.
Pơtrơp dơ̆ng, Kră Yang pơgơ̆p tơdrong ‘mêm kơ ‘Bok Kei-Dei păng tơdrong ‘mêm kơ bơngai nai. Tơdrong juăt mă ‘bar “kư̆m thoi tơdrong juăt mă mônh”. Yua tơm sư đơ̆ng tơdrong juăt mă mônh. Bơ̆n ưh kơ đei ‘mêm kơ ‘Bok Kei-Dei đĕch na hiơt lê̆ ưh kơ ‘mêm kơ lu bơngai mă ‘Bok Kei-Dei pơjing ‘lơ̆ng hơbŏ thoi rup Sư. Tơdrong ‘lơ̆ng tơpăt mă ‘Bok Kei-Dei lăp đon đei tơ’bôh đơ̆ng jơhngơ̆m ‘mêm, băt mơnat, tơpăt tơpă păng iŏk đon ala. Dôm tơdrong tơ’bưh lăm bơ̆n jing anih pơlong lăng đon lui bơ̆n. Lu bơ̆n pơma, băt mơnat, bơ̆jang păng tơ’bôh tơdrong kĕ chơ̆n tơ’bôh tơdrong ‘mêm bơ̆n ‘măn kơ Kră Yang hăm tơpăt tơpă dah ưh?
Bơ̆n gơh pơtŏ pơting tơdrong ‘lơ̆ng tơpăt hăm lu tơdrong gah bơhngol thoi kơkuh kơ Kră Yang, hŏk pơhrăm nơ̆r ‘Bok Kei-Dei, krao khan, bơ̆jang.v.v…, mălei Kră Yang wă kơ bơ̆n lăng ming đơ̆ng dôm tơdrong noh hăm lĕch đơ̆ng tơdrong ‘mêm kơ Kră Yang dah ưh. Tơdrong pơtrŭt đơ̆ng lăm jơhngơ̆m noh tơdrong Kră Yang hiơ̆k dêh. Tơdrong ‘mêm ưh kơ đei hŭt lê̆ tơdrong yoch dah lăp đon hăm tơdrong ‘lơ̆ng tơpăt: Mălei noh chă tơdrong ‘lơ̆ng hloh kiơ̆ thoi Kră Yang ‘Bok Kei-Dei wă. Tơdrong arih Yêsu đei ăn kơ bơ̆n kơmĭl ‘lơ̆ng dêh gah tơdrong arih ‘lơ̆ng tơpă đơ̆ng tơdrong ‘mêm. Kră Yang Sư ‘mêm păng chu yom nơ̆r ‘Bă tôm tơdrong, Sư kư̆m ‘mêm kơ kon bơngai jrŭ dêh. ‘Mêm kơ Kră Yang ‘Bok Kei-Dei hăm đĭ jơhngơ̆m klơm klak păng ‘mêm kơ bơngai nai tơpă noh minh tơdrong pơm kiơ̆ đĭ chăl arih, tơplih dôm tơdrong lăm tơdrong arih bơ̆n kơdih.
Ơ Kră Yang, apinh Ih tơgŭm inh đei tôm ‘bar tơdrong juăt gĭt kăl Kră Yang bơtho, wă kơ inh arih ‘lơ̆ng tơpăt đơ̆ng tơdrong ‘mêm Kră Yang păng kon bơngai. Krao khan yua anăn Kră Yang Yêsu Krist, Amen.
Lu bơ̆n pơtŏ pơting tơdrong arih ‘lơ̆ng tơpăt păng ‘mêm hăm tơdrong kiơ?
Đŏk Sơ̆p Hla bơar ‘Bok Kei-Dei lăm pêng sơnăm: Markôs 11
Kênh Youtube BHKTHN:
