Jôsuê 5:1-8
“Kon pơlei Isơrael hlôi yak năm wih wơ̆t lăm char glă puăn-jĭt sơnăm, ding mah truh tơ kon drŏ-nglo lôch đĭ noh lu bơngai trŏ kơ pơm linh kơplah lu sư ‘nao lĕch đơ̆ng char Êyiptơ, yua kơ ưh kơ chu kiơ̆ kơ nơ̆r Kră Yang. Yua kơ Kră Yang đei pơkă khan lu sư ưh kơ gơh ‘bôh dêh char mă Kră Yang Yêhôwa đei pơkă wă ăn kơ lu ‘bok sư păng wă ăn kơ lu sư teh, đak sut đak toh.” (Jôsuê 5:6)
Nơ̆r jet tơchĕng pơwao:
– Yua kơ kiơ Kră Yang bơtho ‘bok Jôsuê pơm giĕng kăt tơdra akar kơ kon pơlei Kră Yang?
– Hil phak kơ lu đe bu mă oei lăm kon pơlei Kră Yang ưh kơ pơm ăn giĕng kăt tơdra akar ‘noh kiơ?
– ‘Bok Pôl bơtho gah “Giĕng kăt tơdra akar gah bơhngol” thoi yơ?
Kơplah lu pơtao Amôrit păng Kanaan hli tơrơ yua kơ tŏk kơ đak krong jôrđăn Kră Yang đei pơm ăn kơ kon pơlei Isơrael na Kră Yang bơtho ‘bok Jôsuê hơmet pơm giĕng kăt tơdra akar kơ kon pơlei Kră Yang. ‘Nâu bơih jơ ‘năr trŏ lăp yua kơ kơplah kon pơlei Kră Yang oei jĭ jăn kơplah kăt tơdra akar, na lu pơtao ‘nguaih oei hli tơrơ na ưh kơ pơ̆n năm blah. Yua kơ lu bơngai drŏnglo kăt tơdra akar kơplah oei tơ dêh char Êyiptơ đei lôch pơđĭ kơplah oei tơ char glă yua kơ ưh kơ chu kiơ̆ nơ̆r Kră Yang na lu sư ưh kơ gơh ‘bôh dêh char đak sut kơdrot mă Sư đei pơkă ăn. Jơ ‘nâu, Kră Yang tơiung kon sâu lu sư. Lu bơngai âu kăl kơ đei kăt tơdra akar kiơ̆ kơ tơdrong juăt wă kơ đei nơ̆r Kră Yang pơkă ăn.
Rim ‘nu bơngai drŏnglo bơngai Juđê athei kăt tơdra akar kơplah tơhngam năr wă kơ chu kiơ̆ kơ nơ̆r pơgơ̆p Kră Yang mă đei pơkă kơ adrĕch Abraham. Lăm tơdrong pơgơ̆p noh, Kră Yang mă đei pơkă kơ adrĕch adrung sư đei bri seh teh oei (Blŭng a 17:8), ăn kơ sư pơm ‘bok kơ adrĕch adrung (Blŭng a 17:5). Adrĕch adrung sư gô kơdrơ̆m thoi sơnglŏng kơpal plĕnh, thoi chuơh lăm đak dơsĭ păng lu kon pơlei lăm teh đak yua đơ̆ng adrĕch adrung sư na đei pŭn hiôk (Blŭng a 22:17-18). Lu bơngai drŏnglo Juđê ayơ ưh kơ kăt tơdra akar gô puh tơweh đơ̆ng kon pơlei Kră Yang, lăng sư thoi blơ̆ tơdrong pơgơ̆p pơkă Kră Yang (Blŭng a 17:14).
‘Bok Pôl bơtho khan giĕng kăt tơdra akar ‘noh kăl dêh, mălei ‘noh jơ̆ tơdra gah ‘nguaih đĕch wă tơ’bôh kơ minh ‘nu bơngai oei lăm tơdrong pơgơ̆p pơkă Kră Yang, đei ‘măn ăn kơ sư, lui gơnang kơ nơ̆r Sư pơkă păng kơchăng chu nơ̆r Sư. Lu bơngai Isơrael mă đei kăt tơdra akar adrol kơ noh đei chu ‘bok Môis pơm ‘batem tơ lăm hơmơ̆l păng đak dơsĭ, mălei Kră Yang ưh kơ lăp đon na lôch pơđĭ tơ lăm char glă (I Kôrintô 10:1-2). Sư pơting tơdrong chu kăt tơdra akar gơh jing kon pơlei pơgơ̆p pơkă Kră Yang hăm pơm ‘batem jing kon pơlei Kră Yang lăm Khul Bơngai Lui. Mă khan lu bơngai Juđê âu đei pơm tơ’bôh tơdra gah ‘nguaih lăm tơdrong pơgơ̆p pơkă mălei ưh kơ tơplih lăm chăl arih “‘lơ̆ng hŭt tơdrong arih sĕch akar” (Kôlôssê 2:11). Ưh kơ chu yom nơ̆r Kră Yang na ưh kơ đei pŭn hiôk mă trŏ kơ lu sư đei, ‘noh dêh char mă Kră Yang đei pơkă ăn. Lơ bơngai lăm lu bơ̆n kư̆m đei pơm ‘batem, anăn bơngai lui mălei ưh kơ “Plôh hŭt lê̆ sĕch akar”, ưh kơ chu yom nơ̆r Kră Yang, ưh kơ chu yom Yang Bơhngol ‘Lơ̆ng, na lu bơ̆n kư̆m gô tơhiong lê̆ pŭn hiôk đơ̆ng Kră Yang ăn kơ bơ̆n.
Ơ Kră Yang, apinh Ih ăn kơ inh băt mơn minh chăl arih bơngai lui tơpă, băt chu kiơ̆ nơ̆r Yang Bơhngol ‘Lơ̆ng pơma wă kơ gơh đei pŭn hiôk đơ̆ng Ih pơkă. Krao khan yua anăn Kră Yang Yêsu Krist, Amen.
Lu bơ̆n băt tơpă đei tơdrong tơplih ayơ lăm chăl arih đơ̆ng rŏng kơ chu pơm ‘batem?
Đŏk Sơ̆p Hla bơar ‘Bok Kei-Dei lăm pêng sơnăm: Markôs 6
Kênh Youtube BHKTHN:
