1 Timautes 6:1-2
Nqe cim:
“Cov uas ua tubqhe nyias yuav tsum hwm nyias tus tswv thiaj tsis muaj leejtwg thuam Vajtswv lub npe thiab thuam tej lus uas peb qhia” (1 Timautes 6:1)
Lus nug xav:
– Timthawj Paulus qhia tus qhev uas ntseeg Vajtswv yuav tsum muaj tus cwjpwm li cas rau nws tus Tswv? Vim li cas?
– Cov tub ua zog ntseeg Vajtswv niaj hnub nimno yuav tsum muaj tus cwjpwm thiab lub siab ua haujlwm li cas?
Hauv lub tebchaws Loos tiam Vajluskub tshiab, cov neeg ua qhev coob heev. Tej lus qhia txog kev cawmdim, thiab kev cawmdim ntawm Txojmoo Zoo rub tau lawv heev, coob tus neeg ua qhev tau los ntseeg Tswv Yexus. Tiamsis qhov teebmeem rau lawv tomqab ntseeg Tswv Yexus lawd yog: lawv puavleej muaj nqis sib txig sib luag nrog rau yus cov kwvtij ntseeg, lawv nrog lawv tus tswv uas ntseeg Vajtswv koom pehawm ib lub Pawg ntseeg, yog li ntawd lawv yuav tsum muaj tus cwjpwm twg rau tus tswv ntawd?
Timthawj Paulus qhia, txawm tus tswv ntseeg Vajtswv thiab tsis ntseeg los cov qhev yuav tsum “hwm” lawv. Ntawm tus tswv uas tsis tau ntseeg Vajtswv, cov qhev haj yam yuav tsum “hwm yus tus tswv txhua fab” (nqe 1-2). Yooj yim heev rau ib tug qhev uas twb ntseeg Vajtswv lawd hnov txaus siab vim xav tias nws twb xaiv tau qhov zoo dua rau nws txojsia nyob mus ib txhis lawm. Qhov no ua rau nws muab hlob, saib tsis taus nws tus tswv, ntawd yuav ua rau Vajtswv lub npe thiab Nws tej lus qhia raug luag thuam (nqe 1). Thaum peb ntseeg Vajtswv, peb paub hais tias peb muaj nqis sib txig sib luag nrog lwm tus; peb yeej tsis qis dua peb tus tswv lossis cov neeg muaj meejmom siab hauv lub ntiajteb no. Yog li ntawd, peb tsis tas yuav tsum txo peb tus kheej kom qis heev, lossis peb kuj tsis txhob tsa peb tus kheej siab dua lwm tus, tiamsis cia li ua neej raws li qhov tseeb uas ib tug neeg tau txhiv los lawd. Txawm li ntawd los, peb lub luag haujlwm hauv lub ntiajteb no yeej tsis hloov; peb yeej tseem yog ib tug neeg ua haujlwm rau yus tus tswv. Qhov uas cheem tsum hloov yog peb tus cwjpwm, thaum ua haujlwm ntawm feem xyuam ib tug qhev, vim tamsim no peb yog cov uas sawv cev rau Vajtswv lub npe thiab Nws tej lus qhia (nqe 1) tabmeeg ntawm cov neeg uas tsis tau ntseeg qhovmuag.
Yog hais tias tus tswv yog tus ntseeg Vajtswv, ntau tus qhev yuav raug ntxias siv qhov kev sib raug zoo ua kwv tij hauv kev ntseeg taij kom tus tswv ua yoojyim, ua siab ntev thiab muaj txoj kev hlub tshua tshwjxeeb rau yus, thaum ntawd lawv yuav tsis mob siab ua haujlwm. Kev ntseeg tsis yog vimchiv rau kev tub nkeeg lossis tsis tas hwm leejtwg, tiamsis ntawd yog lub zog txhawb kom peb ua neej ua qauv zoo. Vim li ntawd, ntawm tus tswv uas ntseeg Vajtswv, tus qhev tsis yog hwm nws xwb tiamsis tseem “yuavtsum ua cov tswv ntawd li haujlwm kom hajyam zoo dua qub” (nqe 2 MWW2022).
Niaj hnub nim no, tej zaum peb yog cov tub qhe ua zog rau tus tswv uas tsis ntseeg Vajtswv lossis tus tswv uas yog tus ntseeg. Txawm yog ua zog rau leejtwg los xij, yuav tsum nco ntsoov hwm yus tus tswv thiab ua haujlwm kawg siab ntsws “Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg” (Kaulauxais 3:23). Vim li ntawd, Vajtswv lub npe yuav tau qhuas yog dhau los ntawd peb nplooj siab thiab tus cwjpwm ua haujlwm.
Thov Vajtswv,
Vajtswv, nyuam yaus ua Koj tsaug uas Koj pub nyuam yaus muaj zoo haujlwm ua. Thov pab nyuam yaus paub hwm nyuam yaus tus tswv los ntawm nyuam yaus tej lus hais, tus cwjpwm thiab tes haujlwm kom Koj lub npe raug qhuas. Nyuam yaus tuav Tswv Yexus Khetos lub npe thov, Amees.
Peb pom peb cheem tsum hloov tus cwjpwm li cas rau yus tus Tswv?
Nyeem Vajluskub hauv peb lub xyoos: Tshwmsim 13
Kênh Youtube BHKTHN:
