Klei Aê Diê Blŭ: Y-Tit 3:3-5
Êlan kliăng: “Jăk mơak yơh phung thâo pap, kyuadah Aê Diê srăng pap kơ diñu” (Y-Mathiơ 5:7).
Klei êmuh ksiêm mĭn: Aê Diê bi êdah leh si ngă klei bi djŏ klei thâo pap hŏng klei pap brei? Si klei thâo pap leh anăn klei pap brei đru drei tơdah dôk ti anăp mnuih ngă soh leh anăn bi êka kơ drei?
Tơdah bi msĕ klei thâo pap leh anăn pap brei, drei ƀuh mâo klei bi mguôp kjăp snăk plah wah dua knuih jăk anei, kyuadah mơ̆ng klei thâo pap yơh srăng mâo klei pap brei. Trăn Klei Aê Diê Blŭ anei brei ƀuh bruă klei soh drei mâo klei pap brei kbiă mơ̆ng klei pap Aê Diê kluôm dhuôm. Ƀiădah, tĭng kơ sa nah, klei pap jing prŏng hĭn kơ klei pap brei, kyua klei pap kyuanăn Aê Diê pap brei tơdah drei ngă soh, leh anăn Aê Diê ăt srăng pap kơ drei, đru drei tơdah drei mâo klei kƀah tơdah drei kmhal kơ klei soh leh anăn kwưh akâo kơ Ñu (Klei Mmuñ Hđăp 103:13-14; Hêbrơ 4:15-16).
Klei anei ăt djŏ kơ drei mơh hlăm klei dôk dơ̆ng ƀơ̆ng huă hŏng phung riêng gah, kyuadah tơdah drei mâo klei thâo pap snăn ênưih snăk drei pap brei klei soh pô mkăn. Sa čô thâo pap jing mnuih dưm ñu pô hlăm anôk pô mkăn čiăng dưi thâo săng leh anăn pap brei kơ digơ̆, kyuanăn, tơdah drei mâo klei thâo pap snăn tơdah dôk ti anăp klei soh pô mkăn, drei dưi thâo săng kơ digơ̆, thâo săng ya ngă digơ̆ ngă hĕ msĕ snăn, leh anăn kyua klei anăn mơh, ênưih hĭn kơ drei srăng pap brei.
Klei thâo pap amâo djŏ bi êdah knŏng hŏng bruă drei ngă ôh, ƀiădah bi êdah wăt hlăm knuih drei dôk dơ̆ng msĕ mơh. Klei thâo pap amâo djă pioh klei bi roh, amâo rông klei ăl, amâo bi mjhua klei lĕ amâodah klei awăt pô mkăn ôh, kăn bi êdah klei soh pô mkăn čiăng ngă klei bi hêñ rei.
Klei yuôm brei drei mđing jing klei thâo pap srăng pap brei, ƀiădah klei thâo pap amâo ngă klei ênưih, amâo yap klei soh, amâo mgưt ngă msĕ si amâo ƀuh ôh tơdah ƀuh pô mkăn dôk ngă soh. Pap ƀiădah amâo yap klei soh ôh jing klei pap čhuai, msĕ si Mtao Y-Sôl pap brei kơ Mtao Y-Agak, amâodah Mtao Đawit pap brei klei soh anak êkei ñu Y-Apsalôm. Sa čô thâo pap amâo dưi lui klei soh pô mkăn ôh kyuadah gơ̆ thâo klei bi rai mơ̆ng klei soh jing prŏng snăk. Aê Diê jing Pô thâo pap ƀiădah Ñu ăt jing Pô Kpă Ênô leh anăn Doh Jăk mơh, kyuanăn Ñu amâo lui amâo bi kmhal ôh klei soh. Aê Diê thâo si ngă klei soh dôk bi rai anak mnuih, leh anăn kyua klei pap kyuanăn Ñu tiŏ hriê leh Khua Yang Yêsu hriê ti lăn ala čiăng djiê hrô brei kơ mnuih soh.
Êgao hĭn kơnăn, brei drei thâo bi kah klei pap brei hŏng klei bi kmhal. Bi kmhal ƀiădah amâo pap brei ôh anăn jing klei măk ƀai, klei bi knap, bi mjhua klei dưi, ƀiădah tăp năng klei bi kmhal srăng tui tluôn klei pap brei čiăng bi mđĭ boh tŭ dưn mơ̆ng klei bi hriăm mjuăt. Akâo Yang Mngăt Jăk brei kơ drei klei thâo mĭn leh anăn klei khăp čiăng kơ drei thâo bi kah klă ya bruă drei srăng ngă čiăng đru pô ngă soh mâo boh tŭ dưn hĭn.
Si drei yua klei hriăm anei hlăm klei hdĭp drei?
Wah lač: Ơ Khua Yang, bi mni lač jăk kơ Ih kyuadah hŏng klei pap Ih pap brei leh jih jang klei soh kâo. Đru kâo thâo săng sĭt kơ Klei Ih Blŭ čiăng kơ kâo thâo pap leh anăn pap brei kơ pô mkăn hlăm klei sĭt nik Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 44
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
