Titus 3:3-5
Nqe cim:
“Cov uas muaj lub siab hlub lwm tus, cov ntawd tau koob hmoov; Vajtswv yuav hlub lawv!” (Mathais 5:7)
Lus nug xav:
– Vajtswv qhia tshwm txojkev sib txuas twg hauv lub siab hlub tshua thiab zam txim?
– Lub siab hlub tshua thiab zam txim pab tau peb li cas thaum ntsib rau cov neeg ua txhaum lossis ua rau peb tu siab?
Thaum muab txojkev hlub tshua thiab zam txim sib piv, peb zeem pom muaj txojkev sib txuas zus ntawm ob yam no, vim yog lub siab hlub tshua ua rau muaj kev zam txim. Ntu Vajluskub hnub no qhia paub peb tej kev txhaum tau zam txim, yog nyob ntawm Vajtswv txojkev hlub. Tiamsis saib rau ib seem twg, txojkev hlub tshua no tseem loj dua kev zam txim thiab. Vim lub siab hlub tshua Vajtswv thiaj zam txim rau peb thaum peb ua txhaum, Nws yeej niaj hnub hlub peb, thaum peb lees txim, thov Nws pab Nws yeej zoo siab hlo zam txim rau peb (Phau Ntawv Nkauj 103:13-14; Henplais 4:15-16).
Qhov no kuj yog rau peb kev ua neej nrog tej neeg nyob ibncig, vim thaum peb muaj lub siab hlub tshua ces peb yoojyim zam txim rau tej uas lwm tus ua tsis haum peb. Tus neeg muaj kev hlub tshua yog tus uas muab nws tso rau lwm tus qhov chaw nyob kom totaub thiab ua tau siab ntev rau lawv, yog peb muaj lub siab hlub tshua ces thaum peb ntsib raug cov neeg uas ua txhaum, peb thiaj paub lawv, totaub vim li cas lawv ua li ntawd, thiab yog vim qhov ntawd peb yoojyim zam txim dua.
Lub siab hlub tsis yog qhia tshwm los ntawm kev ua haujlwm xwb tiamsis kuj yuav tsum qhia tshwm los ntawm peb tus cwjpwm thiab. Lub siab hlub tshua tsis ua yeebncuab, tsis cim ntsoov luag tej kev txhaum, tsis hais luag thaum ua tau zoo lossis tsis tau, kuj tsis qhia lwm tus tej kev txhaum rau sawvdaws thuam.
Qhov tseemceeb cheemtsum nco ntsoov yog lub siab hlub tshua yuav tsum zam txim tiamsis lub siab hlub tsis lam tso qhov phem dhau yoojyim, tsis lam ua tus tsis paub thaum lwm tus ua txhaum. Hlub tshua es tsis hais kev txhaum ces yog hlub yuam kev, ib yam li Vajntxwv Xau-les zam tsis tua Vajntxwv Ankas, lossis Vajntxwv Daviv tsis hais Axaloos qhov txhaum. Tus neeg muaj lub siab hlub lwm tus ces tsis tso tej kev txhaum uas lawv ua dhau mus, vim nws paub tias txojkev txhaum lub zog rhuav muaj zog heev li. Vajtswv yog tus muaj kev hlub tiamsis Nws kuj yog tus uas ncaj ncees thiab dawbhuv, yog li Nws tsis zam kev txhaum li. Vajtswv paub kev txhaum tabtom rhuav tibneeg zoo li cas, thiab vim lub siab hlub yog li Nws thiaj txib Tswv Yexus los hauv ntiajteb no tuag txhiv cov neeg txhaum.
Dua li ntawd, peb cheemtsum cais tau qhov kev zam txim thiab rau txim. Rau txim yog tsis muaj kev zam txim ces yog ua phem, tsis zoo, siv hwjchim yuam, tiamsis qhov kev rau txim uas muaj kev zam txim tom qab yog kev qhia kom ua zoo. Thov Vaj Ntsujplig pub rau peb muaj tswvyim thiab kev hlub los cais tau qhov muaj nqis uas cheemtsum pab cov neeg ua txhaum.
Thov Vajtswv,
Vajtswv, ua Koj tsaum vim Koj hlub thiab zam txim rau nyuam yaus. Thov pub rau nyuam yaus paub Koj Txojlus meej kom paub hlub thiab zam txim rau lwm tus raws li qhov tseeb Koj qhia. Nyuam yaus tuav Tswv Yexus lub npe thov, Amees.
Peb kawm tau zaj no rau peb kev ua neej zoo li cas?
Kênh Youtube BHKTHN:
