Mika 7:18-19
“Pŭn dêh lu bơngai mă băt mơnat kơ đe, ‘Bok Kei-Dei kư̆m mơnat kơ lu sư mơ̆n.” (Mathiơ 5:7)
Nơ̆r jet tơchĕng pơwao:
– Bu bơngai mă đei jơhngơ̆m ‘mêm mơnat?
– Pơm thoi yơ wă kơ lu bơ̆n gơh đei păng bơwei jơhngơ̆m ‘mêm mơnat
– ‘Bai pơhrăm năr ‘nâu tơ’bôh tơdrong kiơ pơgăn lăm tơdrong gĭt kăl âu wă tơiung lăm tơdrong arih lu bơ̆n?
Ưh kơ đei bu lăm teh đak ‘nâu đei jơhngơ̆m ‘mêm mơnat tơpă yua kơ lăm kon bơngai đei bơih kret tơsen, hưch ham, păng ling lang iŏk kơdih akâu noh jing pơm tơm. Sơ̆p hla bơar nơ̆r ‘Bok Kei-Dei bơtho ưh kơ đei yang ayơ thoi Kră Yang ‘Bok Kei-Dei. Tơ’ngla “huay kơ jô̆ yo kơ tơdrong kơnê̆ đe păng huay kơ ‘blŏk tơdrong glăi đơ̆ng kon pơlei mă oei oei lăm pơlei ” Sư bơih Tơ’ngla “Sư kư̆m gô oei ‘mêm mơnat kơ bơ̆n, kơtĭt lê̆ tơdrong yoch kơnê̆ lu nhôn tơ ala jơ̆ng Ih; păng klơ̆m hŭt lê̆ tơdrong yoch lu nhôn, tơ lăm đak dơsĭ jrŭ sŭng.” (Mika 7:18-19). Minh Kră Yang ‘Bok Kei-Dei đei jơhngơ̆m ‘mêm mơnat păng tơdrong ‘mêm mơnat noh đei lăm Sư, Kră Yang ‘Bok Kei-Dei ăn tơdrong ‘mêm mơnat kơ lu bơngai mă lui song iơ̆k Kră Yang Yêsu hăm tơdrong tơpŭ ming ‘nao, thoi noh bơih, dôm lu bơngai mă mơn kơdih đei tơdrong ‘mêm mơnat đơ̆ng Kră Yang ‘Bok Kei-Dei đĕch gơh ‘mêm mơnat kơ bơngai nai.
Lăm tơdrong pơtih gia kơ minh ‘nu bơngai đĭch đam ưh kơ mơnat (Mathiơ 18: 23-35), bơngai đĭch đam noh ưh kơ mơnat kơ bôl sư mă oei hre kơ sư yua kơ sư hiơt kơdih akâu kư̆m oei đei hre lơ păng kưm hiơt đơ̆ng ‘bok pơtao ‘măn kơ sư. Bơngai đei jơhngơ̆m ‘mêm mơnat noh bơih bơngai mă ‘blŏk kơ tơdrong sư kơdih păng tơdrong mơnat đơ̆ng Kră Yang ‘măn ăn kơ sư bơih, bơngai noh kư̆m đei băt mơnat păng huay jô̆ yo tơdrong kơnê̆ bơngai nai. Dah minh ‘nu khan sư kơdih Bơngai Lui mă-lei hơngah kơ tơdrong ‘mêm mơnat yua kơ minh tơdrong kiơ nai: bơngai noh tam mă hlôh tơdrong ‘Bok Krist mơnat ăn đĕch, pơma thoi âu dơ̆ng, noh bơngai mă oei tơ’nguaih kơ tơdrong ‘mêm mơnat ăn đĕch păng tam mă đei Kră Yang mơnat ăn.
Thoi noh, hăm trŏ dah khan jing Bơngai Lui bơih athei pơm kiơ̆ hloi tơdrong ‘mêm mơnat păng huay kơ jô̆ yo tơdrong glăi bơngai nai? Lu bơ̆n kăl kơnăl minh tơdrong, dah trŏ kơ Bơngai Lui bơih lei lu bơ̆n ĐEI jơhngơ̆m ‘mêm mơnat, mă-lei lăm tơdrong noh ưh kơ trŏ khan mă KƠPLAH lu bơ̆n kư̆m GƠH pơm kiơ̆ tơdrong ‘mêm mơnat ngăl, yua kơ thoi noh bơih lu bơ̆n kăl kơ đei jơhngơ̆m nhơ̆m hmoi gah bơhngol, gah tơdrong yoch lu bơ̆n kơdih, păng rơhing kơ tơdrong ‘lơ̆ng tơpăt đơ̆ng ‘Bok Kei-Dei. Lu bơ̆n kư̆m ưh kơ kĕ jing lăm tơdrong pơm kiơ̆ jơhngơ̆m ‘mêm mơnat păng huay kơ jô̆ yo, mă-lei ‘nĕ kơ hiơt yua kơ đơ̆ng ‘Bok Kei-Dei ‘mêm mơnat đĕch lu bơ̆n KƯ̆M GƠH păng KƯ̆M KĔ wă ‘mêm mơnat păng huay kơ jô̆ yo tơdrong kơnê̆ bơngai nai.
Kră Yang Yêsu bơtho lu tơdrong ‘lơ̆ng dêh char Kră Yang lăm ‘bai bơtho kơpal kông wă kơ lu bơ̆n băt tơpă gah ‘bar tơdrong: mă mônh, đei tơpă lăm đon lui, păng mă ‘bar, lăm tơdrong arih gah bơhngol lu bơ̆n. athei dan bơ̆n kơdih lăm tơdrong hơdah rang pơchrang lăm tơdrong pŭn hiôk sơnăm ‘nâu păng tơl tơwih kơdih: tơdrong dŏng pơklaih inh tam tơpă ưh? Inh tam đei lăm jơhngơ̆m ‘mêm mơnat ưh? Inh hăm mơnat ưh tơdrong kơnê̆ bơngai nai ? akâu jăn hăm oei bơwei tơdrong ơh blĕk nhen thoi tơmam ưh kơ gơh achăng?
Kơkuh kơ Ih ơ Kră Yang, inh bơnê kơ Ih Kră Yang, yua kơ Ih mơnat ăn bơih kơ inh mă kơplah inh oei tam mă hlôh pơm kơnê̆ pơm plơ̆ ayăt kơ Ih păng ưh kơ chu yom, apĭnh Ih ăn kơ inh ‘blŏk tơdrong ‘mêm mơnat Ih mă ăn bơih kơ inh păng pơm kiơ̆ tơdrong ‘mêm mơnat ăn kơ bơngai jum dăr kơ inh krao khan yua anăn Kră Yang Yêsu Krist, Amen.
Kră Yang Yêsu bơtho lu tơdrong ‘lơ̆ng dêh char Kră Yang lăm ‘bai bơtho kơpal kông wă kơ lu bơ̆n băt tơpă gah ‘bar tơdrong: mă mônh, đei tơpă lăm đon lui, păng mă ‘bar, lăm tơdrong arih gah bơhngol lu bơ̆n. athei dan bơ̆n kơdih lăm tơdrong hơdah rang pơchrang lăm tơdrong pŭn hiôk sơnăm ‘nâu păng tơl tơwih kơdih: tơdrong dŏng pơklaih inh tam tơpă ưh? Inh tam đe lăm jơhngơ̆m ‘mêm mơnat ưh? Inh hăm mơnat ưh tơdrong kơnê̆ bơngai nai ? akâu hăm oei bơwei tơdrong ơh blĕk nhen thoi tơmam ưh kơ gơh achăng?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Êsêkiên 42
Kênh Youtube BHKTHN:
