Klei Aê Diê Blŭ: Y-Mika 7:18-19
Êlan kliăng: “Jăk mơak yơh phung thâo pap, kyuadah Aê Diê srăng pap kơ diñu!” (Y-Mathiơ 5:7)
Klei êmuh ksiêm mĭn: Hlei pô jing mnuih mâo ai tiê thâo pap? Si drei ngă čiăng dưi djă pioh leh anăn čiêm rông ai tiê thâo pap? Klei hriăm hrue anei brei ƀuh, ya mta klei ngă bi kgăn knuih yuôm bhăn anei đĭ hriê kơ prŏng hlăm klei hdĭp drei?
Amâo mâo ôh hlei pô ti lăn ala anei mâo ai tiê thâo pap sĭt, kyuadah klei jing anak mnuih jing čuôt klih, ră tluh čiăng, yap asei ñu pô yơh jing phŭn. Klei Aê Diê Blŭ mtô snei, ăt kăn tuôm mâo hlei khua jing msĕ si Aê Diê rei, Pô “thâo pap brei kơ klei wê, amâo yap ôh klei gao klei bhiăn, kơ phung adôk jing ngăn dưn Ñu”, Ñu ăt jing Pô “Ñu srăng lŏ pap kơ hmei, Ñu srăng juă klei wê hmei ti gŭ jơ̆ng Ñu, leh anăn dlăm hĕ jih jang klei soh hmei hlăm anôk êlam êa ksĭ” (Y-Mika 7:18-19). Knŏng hjăn Aê Diê yơh mâo ai tiê thâo pap leh anăn klei thâo pap jing knuih Ñu. Aê Diê brei klei thâo pap kơ phung mnuih đăo kơ Khua Yang Yêsu mbĭt hŏng klei lŏ bi kkiêng mrâo, kyuanăn, knŏng phung mâo klei bi knal kơ klei pap Aê Diê kơh thâo pap kơ mnuih mkăn.
Hlăm klei bi hriêng kơ Dĭng Buăl Amâo Pap Brei Ôh (Y-Mathiơ 18:23-35), dĭng buăl anei amâo bi êngiê brei nư kơ ƀĭng găp ñu ôh kyuadah ñu wơr bĭt hĕ, ñu jing sa čô pô đuôm nư prŏng prĭn leh anăn, ñu ăt wơr bĭt mơh klei pap mtao pioh brei leh kơ ñu. Mnuih mâo ai tiê thâo pap jing mnuih hdơr klei soh ñu, leh anăn klei pap Khua Yang kơ ñu, pô anăn mâo klei thâo săng, klei thâo pap leh anăn pap brei kơ mnuih mkăn msĕ mơh. Tơdah sa čô yap ñu pô jing pô đăo kơ Krist, ƀiădah hngah klei thâo pap leh anăn klei pap brei, snăn knŏng mâo sa mta phŭn yơh: pô anăn ka tuôm thâo săng ôh klei pap Yang Krist, blŭ mdê, pô anăn ăt dôk ti êngao klei pap leh anăn ka mâo klei pap brei kơ klei soh ôh.
Snăn, djŏ mơ̆ tơdah jing sa čô pô đăo kơ Krist drei srăng mâo ai tiê thâo pap leh anăn pap brei kơ mnuih mkăn? Brei drei thâo kral sa mta phŭn snei, tơdah jing sa čô pô đăo kơ Krist snăn drei MÂO ai tiê thâo pap, ƀiădah klei anăn amâo djŏ ôh GRĂP BLƯ̆ drei ăt DƯI ngă nanao klei thâo pap anăn. Leh anăn klei anăn yơh jing phŭn knhal brei drei ăt čŏk hia nanao kơ mngăt ai tiê drei, kơ klei soh drei pô, leh anăn ăt lŏ êpa mhao nanao kơ klei kpă ênô Aê Diê. Tăp năng drei dluh lĕ hlăm bruă ngă klei thâo pap leh anăn pap brei, ƀiădah đăm wơr bĭt ôh, kyua hŏng klei pap Aê Diê drei DƯI leh anăn wăt MÂO KLEI DƯI čiăng thâo pap leh anăn pap brei kơ mnuih mkăn.
Khua Yang Yêsu mtô jih knuih Ƀuôn Ala Mtao Adiê hlăm Klei Mtô Ti Dlông Čư̆ čiăng kơ drei thâo săng klă kjăp kơ dua mta klei sĭt nik: tal sa, klei klă sĭt kơ klei đăo, leh anăn tal dua, klei jing klei hdĭp myang drei. Brei drei dưm drei pô hlăm klei mngač mtrang mơ̆ng klei Jăk Mơak tal êma anei leh anăn wĭt lač kơ drei pô snei: Si ngă klei bi mtlaih kâo mâo jing sĭt klă mơ̆? Kâo mâo ai tiê thâo pap mơ̆? Kâo pap brei mơ̆? Amâodah kâo adôk djă pioh klei bi roh msĕ si sa mta ngăn drăp amâo dưi phưi ôh?
Khua Yang Yêsu mtô jih knuih ƀuôn ala mtao adiê hlăm klei mtô ti dlông cư̆ čiăng kơ drei thâo săng klă kjăp kơ dua mta klei sĭt nik: tal sa, klei klă sĭt kơ klei đăo, leh anăn tal dua, klei jing klei hdĭp myang drei. Brei drei dưm drei pô hlăm klei mngač mtrang mơ̆ng klei Jăk Mơak tal êma anei leh anăn wĭt lač kơ drei pô snei: Si ngă klei bi mtlaih kâo mâo jing sĭt klă mơ̆? Kâo mâo ai tiê thâo pap mơ̆? Kâo pap brei mơ̆? Amâodah kâo adôk djă pioh klei bi roh msĕ si sa mta ngăn drăp amâo dưi phưi ôh?
Wah lač: Ơ Khua Yang, bi mni lač jăk kơ Khua Yang kyua Ih pap leh kơ kâo wăt êjai kâo ngă klei mluk mgu bi kdơ̆ng hŏng Ih, amâo gưt asăp Ih. Brei kâo hdơr kơ klei pap Khua Yang pioh brei leh kơ kâo, leh anăn hdĭp thâo pap kơ phung riêng gah kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 42
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
