Mikhas 7:18-19
Nqe cim:
“Cov uas muaj lub siab hlub lwm tus, cov ntawd tau koob hmoov; Vajtswv yuav hlub lawv!” (Mathais 5:7)
Lus nug xav:
– Leejtwg yog tus muaj nplooj siab hlub?
– Yuav ua li cas peb thiaj muaj thiab tu tau nplooj siab hlub kom loj hlob?
– Zaj kawm hnub no peb pom dabtsi txog yam uas thaiv tsis pub tus cwjpwm tseemceeb no loj hlob hauv peb lubneej?
Tsis muaj leejtwg hauv lub ntiajteb no muaj nplooj siab hlub tshua tseeb rau qhov tibneeg lub siab ib txwm yog qia dub, ntshaw luag tug, thiab pheej muab yus tus kheej saib tseemceeb. Vajluskub qhia hais tias tsis muaj ib tug tswv twg yuav zoo li Vajtswv, Tus uas “zam txim” rau Nws “haivneeg uas seem rov los”, thiab kuj yog Tus uas “rov hlub peb dua ib zaug ntxiv”, “muab peb tej kev txhaum tsuj ntiag rau hauv” Nws “qab xibtaws thiab muab tej kev txhaum ntawd mus pov rau puag hauv qab thu hiavtxwv” (Mikhas 7:18-19). Tsuas yog Vajtswv thiaj li muaj nplooj siab hlub tshua thiab kev hlub tshua yog Vajtswv tus mojyam. Vajtswv pub kev hlub tshua rau cov uas ntseeg Tswv Yexus nrog rau txojkev yug dua tshiab, yog li ntawd, tsuas yog cov uas tau txais Vajtswv txojkev hlub tshua tiag tiag lawm thiaj muaj peevxwm hlub tshua lwm tus xwb.
Nyob hauv zaj lus pivtxwv txog Tus Tubtxib Uas Tsis Muaj Siab Hlub (Mathais 18:23-35), tus tubtxib tsis zam nuj nqis rau nws tus phoojywg vim nws hnov qab hais tias nws ntag yog ib tug neeg uas muaj nuj nqis loj heev thiab nws kuj hnov qab tus vajntxwv txojkev hlub tshua uas pub rau nws. Tus neeg uas muaj nplooj siab hlub tshua yog tus uas nco txog nws tej kev txhaum thiab ncog txog tus Tswv txojkev hlub uas pub rau nws, tus neeg ntawd thiaj li totaub, hlub tshua thiab zam txim rau lwm tus. Yog tias ib tug neeg lees hais tias nws yog tus ntseeg tiamsis ho tsis kam hlub tshua thiab zam txim, ces tsuas muaj ib qho vimchiv xwb: tus neeg ntawd yeej tsis tau totaub txog Khetos txoj koob hmoov hlub li, lossis hais tias tus ntawd tseem nyob sab nraud txoj koob hmoov hlub thiab tsis tau txais Vajtswv txojkev zam txim.
Yog li ntawd, puas yog tias tus ntseeg lawm ces thiaj yuav hlub tshua thiab zam txim tau rau lwm tus? Peb yuav tsum paub qhov no kom meej, yog ib tug ntseeg ces peb MUAJ nplooj siab hlub tshua, tiamsis ntawd tsis tau txhais hais tias TXHUA LUB SIJHAWM peb puavleej UA TAU tshwm lub siab hlub tshua ntawd. Thiab ntawd yog vimchiv uas peb yuav tsum niaj hnub quaj ntsuag sab ntsujplig, txog peb tej kev txhaum, thiab nqhis nqhawv Vajtswv txojkev ncaj ncees ntxiv mus. Qee zaug peb yuav qaug zog hauv kev hlub tshua thiab zam txim, tiamsis txhob hnov qab hais tias los ntawm Vajtswv txoj koob hmoov hlub peb YEEJ UA TAU thiab muaj PEEVXWM hlub tshua thiab zam txim rau lwm tus.
Thov Vajtswv,
Tus Tswv, nyuam yaus ua Koj tsaug vim Koj twb hlub tshua nyuam yaus txawm yog nyuam yaus tau ntxeev siab tawmtsam Koj thiab tsis mloog Koj lus. Thov pab nyuam yaus niaj hnub nco txog Koj txojkev hlub tshua uas pub rau nyuam yaus kom qhia tshwm tau nplooj siab hlub tshua rau cov neeg nyob ibncig. Nyuam yaus tuav Tswv Yexus Khetos lub npe thov, Amees.
Tswv Yexus qhia txog tej mojyam hauv Tebchaws Ceeb Tsheej hauv Zaj Lus Qhia Saum Roob kom peb paub tseeb ob yam: qhov xubthawj yog qhov tseeb ntawm txojkev ntseeg, thiab qhov thib ob yog qhov tseeb ntawm peb lubneej sab ntsujplig. Cia li muab yus tso rau hauv qhov kaj ci ntsa iab ntawm Yam Koobmoov thib tsib no thiab teb rau yus tus kheej hais tias: Kuv txojkev cawmdim puas yog txoj tseeb? Kuv puas muaj nplooj siab hlub tshua? Kuv puas zam txim? Lossis kuv tseem khaws kev sib ntxub zoo li yam khoom uas tso tsis tau tseg li?
Nyeem Vajluskub hauv peb lub xyoos: Exekees 42
Kênh Youtube BHKTHN:
