Mathais 5:7
Nqe cim:
“Cov uas muaj lub siab hlub lwm tus, cov ntawd tau koob hmoov; Vajtswv yuav hlub lawv!” (Mathais 5:7)
Lus nug xav:
– Kev hlub lub ntsiab lus yog dabtsi?
– Vim licas Tswv Yexus ho saib kev hlub zoo li ib qhov tseemceeb uas cov pejxeem hauv Tebchaws Ceeb Tsheej yuav tsum muaj?
– Peb tabtom ua raws li tus mojyam no li cas lawm?
Yam koobmoov thib 5 nyob hauv Yim Yam Koobmoov uas hais qhib thawj ntawm Tswv Yexus “Zaj Lus Qhia Saum Roob” yog “hlub lwm tus”, hauv lus Kilis muaj lub ntsiab lus hais tias “pab cov neeg uas tsis muaj hmoov, cawm cov neeg uas tsimnyog hlub tshua”. Xibhwb William Barclay tau sau tseg hauv phau ntawv txhais Mathais hais tias: “Kev hlub tshua tsis yog tsuas muaj kev kho siab lossis khuvleej cov neeg txomnyem raws li qhov ibtxwm ua xwb. Kev hlub tshua raws li lus Henplais thiab Alamais yog ‘Chesedh’, ntawd yog qhov uas muab yus tus kheej tso rau hauv lwm tus neeg lub chaw sawv mus txog thaum peb pom txhua yam li tus neeg ntawd lub qhov muag pom, xav li tus neeg ntawd lub hlwb xav, thiab hnov li tus neeg ntawd hnov”.
Tswv Yexus qhia meej txog “kev hlub” nyob hauv zaj lus pivtxwv txog Tus Xamalis siab zoo. Tomqab uas piav zaj lus pivtxwv, tus Tswv thiaj nug tus xibhwb qhia Vajtswv txoj kevcai hais tias: “Koj sim xav saib, lawv peb tug no, tus twg yog tus uas tubsab ntaus ntawd tus kwvtij? Tus xibhwb uas qhia Vajtswv Kevcai teb hais tias: Twb yog tus uas hlub tus tubsab ntaus ntawd ntag. Yexus hais rau nws tias: Koj cia li mus ua ib yam li ntawd” (Lukas 10:36-37). Tus neeg Xamalis tsis yog tsuas muaj nplooj siab hlub xwb, tiamsis nws tseem muab nws tso rau hauv tus neeg raug mob ntawd lub tsamthawj, paub txog tus ntawd kev cheem tsum, thiab pab raws li nws muaj peevxwm ua tau.
Tswv Yexus hais hnyav txog kev hlub vim qhov no tsis yog tus mojyam uas sawvdaws saib hlob nyob tiam ntawd. Raws li cov neeg Loos, kev hlub tshua ces yog tsis muaj zog, thiab nyob hauv lawv tej kev ua rog tsis muaj lo lus kev hlub tshua li. Raws li cov neeg Yudais, lawv tsuas hlub cov neeg uas hlub lawv xwb. Tswv Yexus tau cem cov neeg coj tus mojyam li no thaum Nws qhia hais tias: “Nej twb hnov tej lus uas hais tias, ‘Hlub nej cov kwvtij thiab ntxub nej cov yeebncuab.’ Tiamsis nimno kuv qhia rau nej hais tias, ‘Hlub nej cov yeebncuab thiab thov Vajtswv pab rau cov uas tsimtxom nej” (Mathais 5:43-44).
Nyob hauv Vajluskub, koob hmoov hlub thiab kev hlub tshua feem ntau mus nrog nraim ua ke (I Timautes 1:2), tiamsis tseem muaj tej yam txawv me ntsis. Koob hmoov hlub yog qhov uas daws txojkev txhaum, hos kev hlub tshua yog qhov uas daws tej teebmeem tomqab uas ua txhaum. Koob hmoov hlub yog muab rau tus neeg tsis tsimnyog txais, hos kev hlub tshua yog txojkev hlub rau txhua tus neeg uas raug txomnyem.
Peb twb tau txais kev hlub tshua ntawm Vajtswv ntau zaus lawm yog thaum Nws zam txim thiab hloov peb kom rov zoo, thiab peb kuj tau txais kev hlub tshua ntawm cov kwvtij hauv Pawg Ntseeg (Filipis 2:1-2), vim li ntawd peb kuj yuav tsum muaj lub siab totaub thiab hlub tshua cov neeg txomnyem. Vajtswv yog Tus uas pom txhua leej nplooj siab thiab yam uas Nws xav pom tsis yog tsuas yog tes haujlwm hlub tshua xwb tiamsis yog tagnrho nplooj siab hlub tshua, rau qhov peb tus Tswv yog Tus uas muaj lub siab hlub (Lukas 6:36).
Thov Vajtswv,
Tus Tswv, nyuam yaus ua Koj tsaug vim Koj twb hlub tshua nyuam yaus thiab zam txhua yam kev txhaum rau nyuam yaus thaum nyuam yaus khiav los cuag Koj. Thov pub rau nyuam yaus niaj hnub muaj Koj txojkev hlub kom nyuam yaus qhia tau nplooj siab hlub tshua rau cov kwvtij uas txomnyem nyob ibncig. Nyuam yaus tuav Tswv Yexus Khetos lub npe thov, Amees.
Peb puas zeem paub tias tus Tswv tau hlub tshua peb thiab peb puas tau qhia tshwm nplooj siab hlub tshua rau lwm tus lawm tau?
Nyeem Vajluskub hauv peb lub xyoos: Exekees 41
Kênh Youtube BHKTHN:
