Mathiơ 5:20
“Lu thây bơtho tơdrong juăt đe Juđê păng lu bơngai Juđê mă lui kơ ‘Bok Kei-Dei kiơ̆ kơ tơdrong Pharisi, lu sư ưh kơ kiơ̆ tơdrong juăt tơpă ôh. Na Inh khan kơ iĕm tơpă, dah iĕm ưh kơ adrin kiơ̆ tơdrong juăt hloh kơ lu đe noh, lei iĕm ưh kơ gơh mơ̆t tơ dêh char ‘Bok Kei-Dei ôh.” (Mathiơ 5:20)
Nơ̆r jet tơchĕng pơwao:
– Tơdrong juăt lu bơngai Pharisi păng thây bơtho tơdrong juăt đe Juđê glăi ‘bơ̆t anih hơyơ?
– Kră Yang bơtho dah iĕm ưh kơ adrin kiơ̆ tơdrong juăt hloh kơ lu đe noh wă khan kiơ?
– Lu bơ̆n pơm thoi yơ wă kơ Kră Yang jô̆ bơ̆n bơngai tơpăt?
Mathiơ chăl 5 pơih blŭng gah “Tơdrong Yêsu bơtho đe tơ kơpal kông” Kră Yang bơtho lu jơ̆ng ‘bang Sư, jơ̆ kon pơlei pơla ‘nao ‘Bok Kei-Dei, Kră Yang khan pơm kiơ̆ gah tơdrong juăt lei lu sư gơh mơ̆t tơ dêh char ‘Bok Kei-Dei. Tơdrong juăt lu bơngai Pharisi păng thây bơtho tơdrong juăt đe Juđê ‘bôh na pôk pơư lu sư ưh kơ trŏ wă pơư anăn ‘Bok Kei-Dei. Lu sư pơyơ̆r tơmam, ơ̆t kơ sŏng sa, krao khan. Ôp ti, pơyơ̆r minh lăm mơjĭt, mălei tă kơ “dôm tơdrong juăt ‘Bok Kei-Dei mă kăl hloh thoi lĕ kơ pơm ‘lơ̆ng kơ đe athei ‘mêm kơ ‘Bok Kei-Dei hăm bôl buăl, tơdrong lui kơ ‘Bok Kei-Dei, dôm tơdrong noh iĕm pơhơi ưh kơ wă pơm…” (Mathiơ 23:23). Kon pơlei chăl noh sơ̆ tơchĕng khan arih pơm kiơ̆ tơdrong juăt thoi lu thây bơtho tơdrong juăt đe Juđê păng lu bơngai Pharisi noh tơdrong hơgăt gơh mơ̆t tơ dêh char ‘Bok Kei-Dei, mălei Kră Yang Yêsu khan kơ lu sư gah tơdrong chă pơ pơm đĕch (lăng lăm Mathiơ 23:1-39). Thoi noh, Kră Yang bơtho lu jơ̆ng ‘bang: “Lu thây bơtho tơdrong juăt đe Juđê păng lu bơngai Juđê mă lui kơ ‘Bok Kei-Dei kiơ̆ kơ tơdrong Pharisi, lu sư ưh kơ kiơ̆ tơdrong juăt tơpă ôh. Na Inh khan kơ iĕm tơpă, dah iĕm ưh kơ adrin kiơ̆ tơdrong juăt hloh kơ lu đe noh, lei iĕm ưh kơ gơh mơ̆t tơ dêh char ‘Bok Kei-Dei ôh.” (trong 20).
Kră Yang Yêsu bơtho adrin kiơ̆ tơdrong juăt “hloh kơ” wă khan hlôi hloh ‘biơ̆, ‘nâu bơih tơdrong juăt lĕch đơ̆ng lăm jơhngơ̆m. Lu thây bơtho tơdrong juăt đe Juđê păng bơngai Pharisi wei răk tơdrong juăt yă ‘bok kơjăp dêh, mălei nơ̆r Kră Yang bơtho ưh kơ sĭ lui kiơ̆ tơdrong juăt na jô̆ bơngai ‘lơ̆ng tơpăt, dah pơm kiơ̆ lu tơdrong pơm phĕt, dah pơm gah ‘nguaih đĕch… “Lu bơngai đe pôk pơm tih pơgơ̆r bơngai lui, inh băt mơ̆n lu sư oei hơdai Yêsu sơ̆, mă-lei ‘Bok Kei-Dei pơgơ̆p jơhngơ̆m đon lu nhôn lei-lăi đĕch, lu sư ưh kơ đei wă ming tơplih tơdrong inh bơtho ôh.” (Galati 2:16). Tơ’ngla Kră Yang Yêsu Krist pŭ tang tơdrong yoch lu bơ̆n, na đơ̆ng noh đĭ đăng lui gơnang kơ Kră Yang na jô̆ ‘lơ̆ng tơpăt (II Kôrintô 5:21) păng gơh mơ̆t tơ dêh char ‘Bok Kei-Dei.
Ahrei âu, lơ bơngai hơwơ̆l khan jang tơdrong jang ‘nâu, tơdrong jang to, athei đei tơdrong jang tih, athei bơwei gah ‘nguaih mă tơpă, athei… păng athei… wă bơ̆jang jing ‘lơ̆ng tơpăt. Lu bơ̆n oei rok kiơ̆ tơdrong ưh kơ ‘lơ̆ng đơ̆ng lu bơngai Pharisi păng thây bơtho tơdrong juăt đe Juđê adrol sơ̆. Apinh Kră Yang tơgŭm bơ̆n đŏk, pơhrăm sơ̆p hla bơar jơ̆ Nơ̆r Kră Yang ‘Bok Kei-Dei mă arih wă băt kiơ̆ Kră Yang wă păng arih pơm kiơ̆ Nơ̆r Kră Yang bơtho. Kră Yang gô ăn kơ lu bơ̆n jing ‘lơ̆ng tơpăt kơplah lu bơ̆n lui păng arih kiơ̆ Kră Yang wă.
Ơ Kră Yang ‘lơ̆ng tơpăt! Bơnê kơ Ih đei ăn kơ inh jing ‘lơ̆ng tơpăt yua kơ đơ̆ng pham gĭt kăl Ih. Apinh Ih tơplih păng ôp rơgoh jơhngơ̆m đon tơchĕng rim năr đơ̆ng nơ̆r Arih Ih wă kơ chăl arih inh rai jing ‘lơ̆ng kiơ̆ thoi Ih wă, krao khan yua anăn Kră Yang Yêsu Krist, Amen.
Lu bơ̆n hiơ̆k lu tơdrong pơm gah ‘nguaih dah đơ̆ng lăm jơhngơ̆m ih hăm Kră Yang?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 39
Kênh Youtube BHKTHN:
