I Timôthê 4:6-10
“Ih ‘nĕ mơ̆ng tơdrong đe roi hơ’mon kư̆ kă. Đe roi tơdrong ‘noh ưh kơ đei lĕch kiơ. Pơhrăm tơdrong ‘Bok Kei-Dei đĕch kăl hloh.” (I Timôthê 4:7)
Nơ̆r jet tơchĕng pơwao:
– ‘Bok Pôl bơtho gah tơdrong pơhrăm iŏk tơdrong lui yom thoi yơ?
– Pơhrăm pơjuăt akâu jăn păng pơhrăm gah tơdrong lui yom lei lăi păng phara bal thoi yơ?
– Lu bơ̆n kăl kơ pơm kiơ wă kơ pơhrăm iŏk tơdrong lui yom?
Yua iŏk rup mă lăm chăl ‘noh sơ̆ juăt ‘noh pơma kơ lu bơngai pơthi pơjei, ‘bok Pôl pơma ‘bơm tơdrong gĭt kăl ‘noh tơdrong arih Bơngai Lui kơ Yêsu athei đei tơdrong lui yom mă sư đei pơma lăm I Timôthê 3:14-16. Ưh kơ bu gơh arih lui yom tôm tơdrong hăm jơhngơ̆m sư kơdih, thoi ‘bok Pôl đei bơtho, dôm tơdrong đei lui yom ‘noh đơ̆ng “tơdrong mơsêh ‘Bok Kei-Dei” (II Pêtrôs 1:3), mălei lăm tơdrong lui yom Kră Yang wă kơ bơ̆n đei lăm ei, noh gah lu bơ̆n athei kăl kơ “đĭ jơhngơ̆m adrin”, pơtơ̆p pơhrăm (II Pêtrôs 1:5). Chư tơm sư “pơtơ̆p pơhrăm” đei ‘bơm truh tơ đei pơ̆k iung, gleh lap, dôm lu tơdrong adrin, chu pŭ iŏk păng druh kiơ̆. Păng yua kơ lui yom ‘noh ‘net ‘net khŏm khŏm, na lu bơ̆n kăl kơ chơ̆n hơđơ̆ng hăm bơ̆n kơdih.
‘Bok Pôl ưh kơ đei pơma ngôi lăng hơi kơ tơdrong pơhrăm pơjuăt gah tơdrong pơthi pơjei băl ôh. Sư khan tơpăt akâu lu bơ̆n ‘noh hnam Yang Bơhngol ‘Lơ̆ng (I Kôrintô 6:19-20), jơ̆ tơmam soi arih păng ‘lơ̆ng rơgoh wă kơkuh kơ Kră Yang (Rôm 12:1-2). Mălei, pơhrăm pơtơ̆p gah tơdrong pơthi pơjei sư “yua lăp minh pah đĕch” păng yua lăp dang ei đĕch, na pơhrăm pơtơ̆p tơdrong lui yom na đei yua “tôm tơdrong”, đei yua kơ dang ei păng chăl arih đơ̆ng rŏng hloi” (trong 8).
Kơplah bơ̆n pơthi pơjei, lu bơngai pơhrăm pơtơ̆p sư pơtơ̆p pơjuăt akâu sư kơdih hŭt lê̆ dôm tơdrong juăt pơrăm jơhngơ̆m pran. Kư̆m thoi noh mơ̆n, Bơngai Lui kơ Kră Yang kơplah bơ̆n pơhrăm pơtơ̆p gah tơdrong lui yom kơ Kră Yang kư̆m athei hŭt lê̆ dôm tơdrong kiơ ưh kơ đei pơyua kơ lăm tơdrong lui yom. Lăm trong 7, ‘bok Pôl bơtho bơngai đei đon lui sư khan wă kơ đei tơdrong arih lui yom, kăl kơ hŭt lê̆ “dôm
tơdrong đe roi hơ’mon kư̆ kă. Đe roi tơdrong ‘noh ưh kơ đei lĕch kiơ. Pơhrăm tơdrong ‘Bok Kei-Dei đĕch kăl hloh”. Nơ̆r pơma ‘nâu ưh kơ đei pơma kơ lu đe yă kră ôh, yua kơ lu sư oei hnam juăt kơ roi ‘mon. mălei ‘nâu nơ̆r pơma chăl ‘noh sơ̆ juăt kơ pơma, đơ̆ng bơngai drŏkăn ưh kơ đei tơdrong kiơ lăm teh đak na lu sư ngăl pơma bâu roi sa kư̆ kă kơ kon sâu sư. ‘Bok Pôl bơtho athei hŭt lê̆ dôm tơdrong ưh kơ ‘lơ̆ng, kư̆ kă ưh kơ trŏ kơ Nơ̆r Kră Yang bơtho. Athei yua iŏk jơ năr wă pơtơ̆p pơhrăm tơdrong arih lui yom kơ Kră Yang.
Dang ei, internet, lu mang lăm teh đak, YouTube… ‘bĕnh ‘bang jơ̆p jang pơm kơ Bơngai Lui kơ Kră Yang anat kơ kơnăl kơ tơdrong ayơ trŏ ayơ glăi, ayơ ‘noh tơdrong ưh kơ ‘lơ̆ng, dôm tơdrong lui glăi. Dah lu bơ̆n huach jơ năr kơ lu tơdrong ưh kơ đei yua noh gô pơrăm truh tơ tơdrong jang bơ̆n lui yom kơ Kră Yang. Wă kơ gơh pơtơ̆p pơhrăm tơdrong arih lui yom, lu bơ̆n athei ‘măn jơ adrol hloh ‘noh tơ’bưh hăm Kră Yang, đŏk, tơchĕng pơwao Nơ̆r Kră Yang. Đơ̆ng noh, lu bơ̆n gơh yua Nơ̆r Kră Yang wă pơlen lăng dôm tơdrong kơ lăm mang lăm teh đak dah mă dôm nơ̆r bơtho bơngai ‘nâu, bơngai nai hăm trŏ hăm Nơ̆r Kră Yang bơtho dah ưh. Apinh Kră Yang ăn kơ lu bơ̆n chơ̆n hơđơ̆ng pơtơ̆p pơhrăm tơdrong lui yom.
Ơ Kră Yang, apinh Ih tơgŭm inh hŭt lê̆ đĭ dôm lu tơdrong pơrăm lăm đon tơchĕng, akâu jăn, jơhngơ̆m păng gah bơhngol inh. Apinh Ih ăn kơ inh ‘măn jơ năr, jơhngơ̆m pran ăn kơ dôm tơdrong wă kơ Kră Yang lăp đon. Krao khan yua anăn Kră Yang Yêsu Krist, Amen.
Lu bơ̆n ‘măn jơ adrol hloh lăm tơdrong pơhrăm pơtơ̆p pơhrăm hăm tơdrong kiơ?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 29
Kênh Youtube BHKTHN:
