Klei Aê Diê Blŭ: I Y-Timôthê 4:6-10
Êlan kliăng: “Brei ih hngah klei yăl dliê đưm amâo sĭt ôh leh anăn mluk mgu. Brei ih mjuăt ih pô thâo mpŭ kơ Aê Diê” (I Y-Timôthê 4:7)
Klei êmuh ksiêm mĭn: Si klei Khua ƀĭng kna Y-Pôl mtô kơ klei thâo mpŭ? Si klei msĕ leh anăn mdê kơ klei hriăm mjuăt asei mlei leh anăn hriăm mjuăt klei thâo mpŭ? Ya klei drei ngă čiăng hriăm klei thâo mpŭ?
Yua rup mưng hŏng phung dlăng hră ênuk anăn jing phung bi lông mjuăt asei mlei, Khua ƀĭng kna Y-Pôl lač kơ bruă yuôm bhăn mơ̆ng knuih hdĭp phung đăo jing klei huĭ mpŭ ñu lač leh hlăm I Y-Timôthê 3:14-16. Amâo mâo ôh hlei pô dưi hdĭp huĭ mpŭ kluôm dhuôm hŏng klei gĭr pô, msĕ si Khua ƀĭng kna Y-Pêtrôs mtô leh, jih jang klei hlăm klei huĭ mpŭ dưi mâo kyua “klei myang Aê Diê” (II Y-Pêtrôs 1:3), ƀiădah hlăm klei thâo mpŭ mâo kdrêč kơ drei, anăn jing klei brei drei “gĭr jih ai tiê”, brei hriăm mjuăt (II Y-Pêtrôs 1:5). Boh blŭ “hriăm” mâo wăt klei ngă soh, êgah êmăn, klei gĭr, tla ênoh leh anăn bi mlih. Leh anăn kyua klei mpŭ jing hdră kluôm jih klei hdĭp, kyua anăn brei drei thâo gĭr hŏng drei pô.
Khua ƀĭng kna Y-Pôl amâo dlăng hơăi mang ôh klei mjuăt bi hriăm asei mlei. Ñu bi mklă asei mlei drei jing sang yang kơ Yang Mngăt Jăk (I Kôrantô 6:19-20), jing mnơ̆ng myơr hdĭp leh anăn doh čiăng kơ kkuh mpŭ kơ Aê Diê (Rôm 12:1-2). Khădah snăn, hriăm mjuăt asei mlei knŏng “yuôm ƀơ ƀiă” leh anăn knŏng kơ klei hdĭp anei, bi hriăm klei thâo mpŭ snăn tŭ dưn “ djăp mta klei”, “kơ klei hdĭp ênuk anei wăt kơ klei hdĭp ênuk êdei msĕ mơh” (êlan 8).
Tơdah nao bi lông mjuăt asei mlei, phung bi lông hriăm mjuăt lăm lui klei mưng amâo jăk kơ asei mlei. Ăt msĕ snăn mơh, phung đăo tơdah hriăm klei thâo mpŭ ăt lui mơh ya klei amâo tŭ dưn kơ knuih hdĭp thâo mpŭ. Hlăm êlan 7, Khua ƀĭng kna Y-Pôl mtă kơ anak hlăm klei đăo pô čiăng mâo knuih hdĭp thâo mpŭ, brei lăm lui “Brei ih hngah klei yăl dliê đưm amâo sĭt ôh leh anăn mluk mgu.” Êlan anei amâo čiăng blŭ jhat kơ phung khua thŭn ôh, ƀiădah anei jing êlan lač kơ klei mưng ênuk anăn, kyua phung mniê amâo mâo bruă klam ôh hlăm ala ƀuôn kyua anăn diñu dôk ti sang khăng yăl dliê klei mčeh kơ anak čô. Khua ƀĭng kna Y-Pôl mtô brei lui hĕ klei yăl dliê amâo sĭt amâo năng ôh hŏng Klei Aê Diê Blŭ mtô. Brei yua hruê mmông čiăng hriăm knuih hdĭp thâo mpŭ.
Hruê anei, internet, hla pŏk web ala ƀuôn, YouTube…mâo lu ngă kơ phung đăo dleh thâo kral klei djŏ, ya klei hơăi mang, klei mtô soh. Tơdah drei luč hruê mmông kơ klei hơăi mang snăn srăng hmăi kơ bruă hriăm klei thâo mpŭ. Čiăng dưi hriăm knuih thâo mpŭ, brei drei mđing pioh mnĭt mmông bi mguôp hŏng Khua Yang, dlăng, ksiêm mĭn Klei Aê Diê Blŭ. Mơ̆ng anăn, drei yua Klei Aê Diê Blŭ čiăng ksiêm dlăng klei hâo hưn hlăm hla pŏk web ala ƀuôn amâodah klei mtô mơ̆ng pô anei, pô adih djŏ guôp hŏng Klei Aê Diê Blŭ mtô mơ̆. Akâo kơ Khua Yang đru drei thâo gĭr hriăm klei thâo mpŭ.
Drei mđing pioh mnĭt mmông êlâo hĭn hriăm klei thâo mpŭ hŏng ya hdră?
Wah lač: Ơ Khua Yang, akâo kơ Ih đru kâo lăm lui klei amâo jăk kơ ai tiê, klei mĭn, asei mlei leh anăn mngăt kâo. Akâo kơ Ih đru kâo pioh mnĭt mmông ai ktang kơ klei ngă bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
