1 Timautes 4:6-10
Nqe cim:
“Koj tsis txhob mloog tej dabneeg uas sawvdaws niaj hnub hais, tej ntawd tsis muaj qabhau dabtsi thiab tsis yog Vajtswv zaj, koj tsis txhob mloog tej ntawd. Koj yuav tsum ua koj lub neej kom haum Vajtswv siab thiaj zoo.” (1 Timautes 4:7)
Lus nug xav:
– Timthawj Paulus qhia txog kev xyaum ua neej haum Vajtswv siab li cas?
– Xyaum khiav sab nqaij tawv thiab xyaum ua neej haum Vajtswv siab thooj thiab txawv li cas?
– Peb cheem tsum ua dabtsi cia xyaum ua neej haum Vajtswv siab?
Timthawj Paulus siv tus duab cov tub sib tw khiav ntawm cov nyeem tiam thaud paub zoo los piav txog lub neej ntseeg uas xyaum ua neej haum Vajtswv siab uas Paulus hais txog hauv 1 Timautes 3:14-16. Tsis muaj leejtwg yuav tau ua neej haum Vajtswv siab los ntawm yus kev siv zog, li timthawj Paulus tau qhia, txhua yam uas ua tau haum Vajtswv siab muaj los ntawm “Vajtswv tus uas muaj hwjchim, nws pub txhua yam zoo rau peb, kom peb ua tau peb lub neej haum nws siab” (2 Petus 1:3), tiamsis kev ua neej haum Vajtswv siab kuj muaj ib feem yog peb yuav tau “siv zog” xyaum kawm (2 Petus 1:5). Lub ntsiab “xyaum” nws txoj kev nyuaj khwv nyob hauv yuav siv zog, them nqi thiab caum kom tau. Thiab kev ua neej haum Vajtswv siab yog kauj ruam uas yuav tau mus tas sim neej, yog li ntawd peb yuav tsum ua siab ntev.
Timthawj Paulus saib taus qhov kev xyaum khiav sab nqaij tawv. Nws hais meej peb lub cev yog Vaj Ntsujplig lub tuamtsev (1 Kauleethaus 6:19-20), yog yam khoom ciaj sia thiab dawbhuv cia pehawm Vajtswv (Loos 12:1-2). Txawm li ntawd los kev xyaum khiav sab nqaij tawv tsuas muaj nqis “mentsis” thiab tsuas rau tiam no xwb, tiamsis yog xyaum ua neej haum Vajtswv siab ces muaj nqis rau txhua fab tiam no thiab yav tom ntej” (nqe 8).
Thaum uas sib tw khiav sab nqaijtawv, cov tub sib tw khiav yuav tsum tswj yus, tso tseg tej uas yuav txo yus lub dag zog tseg. Kuj ib yam li ntawd, cov ntseeg yuav xyaum ua neej haum Vajtswv siab tso tseg tej uas tsis muaj nqis rau lub neej ntseeg. Hauv nqe 7 timthawj Paulus txhawb nws tus tub ntawm sab ntsujplig hais tias cia kom muaj lub neej haum Vajtswv siab, yuav tsum “…tsis txhob mus mloog tej dabneeg thiab tej zaj uas cov pog laus nyiam mloo”. Lolus no tsis muaj lub ntsiab yog tawmtsam cov pog laus, tiamsis yog ib lolus hais swm rau tiam thaum ntawd, vim cov pojniam tsis muaj feem xyuam dabtsi rau lub tebchaws, cov pojniam nyob hauv tsev pheej cim civ xav tawm tej zaj dabneeg hais rau cov menyuam. Timthawj Paulus qhia cia li tso tseg tej dabneeg tsis muaj qabhau ntawd tseg, vim tsis raws li Vajtswv Txojlus qhia. Yuav tsum siv sijhawm xyaum ua neej haum Vajtswv siab.
Niaj hnub nimno, internet, tej xov xwm huabcua, YouTube… puv npo txhua qhov ua rau cov ntseeg feeb tsis tau yam twg yog, yam twg tsis muaj qabhau thiab yog tej yam yuam kev. Yog peb nkim sijhawm rau tej yam tsis muaj qab hau ntawd yuav cuamtshuam txog peb txoj kev xyaum ua neej haum Vajtswv siab. Cia kom peb yuav xyaum tau ua neej haum Vajtswv siab, peb yuav tsum tseg sijhawm thov Vajtswv, nyeem, xav Vajtswv Txojlus. Ua li ntawd, peb thiaj siv tau Vajtswv Txojlus los tshuaj xyuas tej yam uas nyob saum huab cua lossis tej lus qhuab qhia ntawm tus no tus tom puas raws li Vajtswv Txojlus qhia losssis tsis raws. Thov Vajtswv pab kom peb siv zog ua neej haum Vajtswv siab.
Thov Vajtswv,
Vajtswv, thov pab nyuamyaus paub tso tseg tej yam uas yuav rhuav tshem nyuam yaus lub hlwb, lub cev, lub siab thiab sab ntsujplig. Thov pab nyaum yaus siv sijahawm, lub dag zog ua txhua yam haum Koj siab. Nyuam tuav Tswv Yexus Khetos lub npe thov, Amees.
Peb siv sijhawm xyaum ua neej haum Vajtswv siab li cas?
Nyeem Vajluskub hauv peb lub xyoos: Exekees 29
Kênh Youtube BHKTHN:
