Jôsuê 1:1-5
“Dang ei kon pơlei pơla ih iung bĕ, năm tŏk găn kơ đak Krong Jôrđăn, truh tơ teh đak mă Inh gô ăn kơ lu adrĕch adrung Isơrael.” (Jôsuê 1:2b)
Nơ̆r jet tơchĕng pơwao:
– Kră Yang krao ‘bok Jôsuê pơm kiơ?
– Kon pơlei Kră Yang oei tơ’bơ̆p tơdrong gleh truh pơmat kiơ? Kră Yang pơlung lu sư liơ?
– ‘Bai pơhrăm ‘nâu tơgŭm bơ̆n kiơ kơplah Kră Yang krao pơyơ̆r akâu tơ lăm dôm tơdrong ‘bĕnh kơ tơdrong pơlong lăng?
Kon pơlei Isơrael oei pơm bơsŭn to Sitim đơ̆ng rŏng kơplah ‘blŏk kơ ‘bok Môis lôch, bơngai mă pơgơ̆r lu sư. Pêng jĭt tơsĭn sơnăm adrol, bơngai Isơrael đei jơ năr trŏ kơ mơ̆t lăm Dêh Char pơkă mălei sư ưh kơ lu ngeh kơ nơ̆r Kră Yang pơkă gô kĕ jeo. Thoi noh, Kră Yang lê̆ lu sư klah klang lăm char glă ding truh tơ jơhnơr ‘nâu hlôi hloh. Lăm khei ‘năr noh, bơngai Isơrael đei tơbral, ưh kơ trŏ kơ thoi ei đĕch, lu sư kư̆m bơtho tơ’bôh kơ kon sâu chu yom kiơ̆ kơ khôi juăt Kră Yang wă kơ gơh mơ̆t tơ Dêh Char Kră Yang pơkă. Truh tơ jơhnơr ‘nâu wơ̆ ‘lŏ, lu sư oei tơ’blŏk dih băl hơnơ̆ng thoi âu đon lui păng chu yom nơ̆r Kră Yang gô đei tơdrong pŭn hiôk păng kĕ jei, na mưh ưh lei gô răm rai. Ding truh tơ bơngai tuch luch kơ chăl arih so noh lôch, ưh kơ jô̆ ‘bok Jôsuê păng ‘bok Kalep, kơplah ‘noh lu jơhnơr ‘nao ‘nâu gơh tơ’bôh đon lui păng chu nơ̆r Kră Yang wă kơ gơh mơ̆t tơ Dêh Char pơkă.
Kră Yang krao ‘bok Jôsuê tơplih kơ ‘bok Môis wă chông anhăk lu jơhnơr ‘nâu mơ̆t lăm anih teh Kră Yang đei pơkă kơ lu sư. Kră Yang pơkă dah anih ayơ tơpang jơ̆ng lu sư năm truh hăm đon lui păng chu yom nơ̆r Kră Yang lei Kră Yang gô ăn kơ lu sư anih teh să noh, lei lăi thoi Kră Yang đei pơkă bơih hăm ‘bok Môis. ‘Nâu jơ̆ minh tơdrong pơlong lăng tih hăm ‘bok Jôsuê păng dôm lu bơngai lăm jơhnơr ‘nao ‘nâu. ‘Bok Jôsuê tam đei layơ jing bơngai pơgơ̆r teh đak, păng sư kư̆m băt rơđah dêh adrol sơ̆ lu sư arăng kơ̆l, ling lang jô̆ jŏk kơ Kră Yang. Kon pơlei juăt bơih kơ ‘bok Môis pơgơ̆r, kơplah ‘nâu ‘bok Môis pă đei bơih. Anih teh mă lu sư wă mơ̆t oei ‘noh ‘bĕnh ‘bang kơ bơngai tơmoi ayăt. Lu sư ưh kơ đei tơmam kiơ wă yak hlôi kơ Krong Jôrđăn kơplah bơyan đak oei tih lơ̆p ‘bĕnh tơ bơnơ̆, oei ro lah (Jôsuê 3:15). Mălei Kră Yang pơkă oei hơdai hăm ‘bok Jôsuê, ưh kơ tơklah, ưh kơ achăng sư, ăn kơ sư kĕ jei dah sư lui păng yak kiơ̆ chông kon pơlei ‘nâu mơ̆t lăm dêh char mă Kră Yang đei pơkă kơ adrĕch adrung sư (trong 5-6).
Năr ‘nâu, Kră Yang kư̆m oei krao lu bơ̆n wă kơ bơ̆jang tơdrong jang Sư pơjao, tơdrong jang ‘nao, năm truh tơ anih teh ‘nao,… wă bơ̆jang kơ kơ Sư, dah mă Kră Yang kư̆m wă kơ bơ̆n lê̆ tơdrong yoch so, tơdrong juăt kơnê̆ so. Phŏ lu bơ̆n kư̆m dai mơn ‘bôh lu bơ̆n oei lăm tŏk bŏk lơ tơdrong anat anot. Apinh lu bơ̆n athei ‘blŏk kơ nơ̆r Kră Yang pơkă hăm ‘bok Jôsuê Kră Yang gô oei hơdai hăm sư ling lang păng ăn kơ sư kĕ jei. Kră Yang kư̆m pơkă ling lang oei hơdai bơ̆n tơdah bơ̆n yak năm hăm đon lui, chu kiơ̆ nơ̆r Kră Yang krao (Mathiơ 28:20). Keh jing păng kĕ jei ưh kơ trŏ yua kơ tơdrong hơgei bơ̆n mălei yua kơ đei Kră Yang oei hơdai.
Ơ Kră Yang, apinh Ih tơgŭm inh gơh iung dơ̆ng păng pơ̆n nuih yak tơ anăp wă pơyơ̆r akâu lăm tơdrong jang Kră Yang pơjao hăm jơhngơ̆m lui gơnang kơ nơ̆r Kră Yang pơkă đei Kră Yang oei hơdai păng gơh kĕ jei. Apinh Ih tơgŭm inh chĕp kơjăp nơ̆r Kră Yang đei pơkă wă kơ inh pơ̆n nuih yak tơ anăp. Krao khan yua anăn Kră Yang Yêsu Krist, Amen.
Jơhngơ̆m bơ̆n thoi yơ dah Kră Yang krao bơ̆n athei pơyơ̆r akâu lăm tơdrong jang ‘nao mălei ‘bĕnh hăm tơdrong pơlong lăng?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 20
Kênh Youtube BHKTHN:
