Klei Aê Diê Blŭ: Y-Yôsuê 1:1-5
Êlan kliăng: “Snăn ară anei ih leh anăn jih jang phung ƀuôn sang anei, kgŭ bĕ găn êa krông Yurdan anei, mŭt hlăm čar Kâo brei kơ diñu, kơ phung ƀuôn sang Israel” (Y-Yôsuê 1:2b)
Klei êmuh ksiêm mĭn: Ya klei Aê Diê mtă brei Y-Yôsuê ngă? Hŏng ya klei dleh dlan phung ƀuôn sang Aê Diê tuôm? Si ngă Aê Diê bi mđĭ ai digơ̆? Ya klei – klei hriăm anei bi hriăm drei tơdah Aê Diê iêo drei kơ bruă bŏ hŏng klei dleh dlan?
Phung Israel mdơ̆ng sang čhiăm jưh ti Sitim leh Y-Môis djiê, pô atăt gai digơ̆ hđăp. Tlâo pluh duapăn thŭn êgao, phung Israel mâo mmông myun dưi mŭt hlăm anôk Lăn Aê Diê Ƀuăn ƀiădah diñu amâo đăo ôh kơ klei Aê Diê ƀuăn srăng brei klei dưi kơ diñu. Kyuanăn, Aê Diê lui diñu hiu rưng hlăm kdrăn tač hlŏng kơ ênuk phung amâo mâo đăo anei êgao. Hlăm mmông anăn, phung Israel kmhal kơ klei soh, amâo djŏ knŏng dŭm anăn ôh, diñu bi hriăm mơh phung anak čô diñu gưt kơ klei bhiăn Aê Diê čiăng dưi mŭt hlăm Čar Aê Diê Ƀuăn. Tơdah phung gưl anei hriê kơ prŏng, mâo klei bi hdơr nanao kơ digơ̆ klei đăo leh anăn klei gưt asăp srăng ba hriê klei jăk jĭn leh anăn klei dưi, bi tơdah digơ̆ amâo mâo ôh klei đăo leh anăn amâo gưt asăp digơ̆ srăng tŭ klei bi rai. Tơdah pô knhal tuč mơ̆ng phung gưl êlâo djiê leh, knŏng Y-Yôsuê leh anăn Y-Kalep dôk hdĭp, ară anei jing mmông phung gưl anei srăng bi êdah klei đăo leh anăn klei gưt asăp čiăng dưi mă tŭ Lăn Aê Diê Ƀuăn.
Aê Diê ruah Y-Yôsuê brei hrô kơ Y-Môis atăt phung gưl mrâo anei nao kơ lăn Ñu ƀuăn brei leh kơ digơ̆. Aê Diê ƀuăn grăp anôk plă jơ̆ng digơ̆ srăng juă hŏng klei đăo leh anăn klei gưt asăp Ñu srăng brei anôk lăn prŏng snăk anăn kơ digơ̆ msĕ si Ñu ƀuăn leh kơ Y-Môis. Sĭt nik anei jing sa klei dleh snăk kơ Y-Yôsuê leh anăn kơ phung gưl mrâo anei. Y-Yôsuê ka tuôm mă tŭ bruă gĭt gai ala čar ôh, leh anăn ñu thâo klă snăk kơ klei phung ƀuôn sang Aê Diê khăng kŏ leh anăn khăng blŭ dŭñ dŭñ. Bi phung ƀuôn sang mưng leh hŏng klei Y-Môis kiă kriê, ară anei Y-Môis djiê leh. Čar digơ̆ srăng mŭt bŏ hŏng phung roh jing phung tue. Digơ̆ amâo mâo ôh mnơ̆ng pioh găn êa krông Yurdan hlăm yan êa đĭ dlai hang leh anăn đoh êtăng (Y-Yôsuê 3:15). Ƀiădah Aê Diê ƀuăn srăng dôk mbĭt hŏng Y-Yôsuê, amâo srăng lui amâodah hngah kơ gơ̆ ôh, brei gơ̆ dưi hŏng phung roh tơdah gơ̆ đăo leh anăn êbat tui hlue klei ƀuăn, atăt gai phung ƀuôn sang mŭt hlăm čar Ñu ƀuăn leh srăng brei kơ phung aê digơ̆ (êlan 5-6).
Hruê anei, năng ai Aê Diê ruah drei msĕ mơh kơ sa bruă klam mrâo, sa bruă mă mrâo, nao kơ sa anôk mrâo…čiăng mă bruă kơ Ñu, amâodah brei lui hĕ klei soh hđăp, klei mưng hđăp. Sĭt nik drei msĕ mơh ƀuh kơ drei dôk ti krah lu klei dleh dlan. Hdơr bĕ kơ klei Aê Diê ƀuăn leh kơ Y-Yôsuê Ñu srăng dôk mbĭt leh anăn đru gơ̆ klei dưi. Khua Yang ƀuăn srăng dôk mbĭt hŏng drei mơh tơdah drei êbat hŏng klei đăo leh anăn gưt asăp kơ Ñu (Y-Mathiơ 28:20). Klei jing hlăm bruă leh anăn klei dưi amâo kbiă hriê mơ̆ng klei thâo drei pô ôh, ƀiădah knŏng mâo mơ̆ng klei Aê Diê dôk mbĭt.
Si knuih drei bi êdah tơdah Aê Diê ruah drei kơ sa bruă mrâo bŏ hŏng klei dleh dlan?
Wah lač: Ơ Khua Yang, đru kâo jhŏng kgŭ leh anăn êbat nao čiăng ngă bi leh bruă Ih jao hŏng klei đăo kơ klei Ih ƀuăn leh srăng dôk mbĭt leh anăn brei kâo dưi. Đru kâo knang kjăp kơ klei Ih ƀuăn čiăng kơ kâo jhŏng êbat nao phă anăp. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
