Yausuas 1:1-5
Nqe cim:
“Nimno koj thiab cov Yixalayees cia li sawbsim hla tus Dej Yauladees mus rau lub tebchaws uas kuv yuav muab rau lawv” (Yausuas 1:2b)
Lus nug xav:
– Tus Tswv nqua hu Yausuas ua dabtsi?
– Tus Tswv haivneeg tabtom ntsib tej kev txomnyem twg? Tus Tswv txhawb lawv zog zoo li cas?
– Zaj kawm no pab rau peb thaum tau tus Tswv hu fij tus kheej mus taug Nws txojkev li cas?
Cov neeg Yixalayees tabtom tsa tsevntaub ntawm tiaj ntoo Akaxias tom qab uas lawv quaj nyiav Mauxes tus uas yog lawv tus thawjcoj. Peb caug cuaj xyoos ua ntej, cov neeg Yixalayees twb yuav tau mus hauv lub tebchaws Vajtswv coglus tseg tiamsis lawv tsis mloog Vajtswv lus. Yog li ntawd, tus Tswv cia lawv ncig mus ncig los tom tiaj suabpuam mus txog thaum uas cov neeg tsis ntseeg tuag tas. Lub sijhawm ntawd, cov neeg Yixalayees tau lees txim, tsis yog li ntawd xwb, lawv kuj qhia rau tej menyuam, xeebntxwv ua raws li Vajtswv txoj kevcai kom tau mus nyob hauv lub tebchaws coglus tseg. Thaum cov menyuam no loj hlob, lawv tau qhia hais txog kev ntseeg thiab kev mloog yuav tau koob hmoov thiab kovyeej, yog tsis ua li yuav raug puastsuaj. Tus neeg kawg ntawm tiam laus tuag tas, tshwj Yausuas thiab Kalej, nimno yog lub sijhawm uas cov menyuam yuav tau qhia tshwm txojkev ntseeg thiab kev mloog lus kom tau mus nyob hauv lub tebchaws coglus tseg.
Yausuas tau tus Tswv hu los hloov Mauxes chaw coj tiam menyuam mus rau lub tebchaws uas Nws coglus muab pub rau lawv. Tus Tswv coglus tias qhov chaw twg lawv txhais taw mus tsuj txog, vim lawv ntseeg thiab mloog lus ces nws yuav pub qhov ntawd rau lawv, ib yam li tej lus uas Nws tau hais rau Mauxes. Nov yog ib qhov kev sim siab rau Yausuas thiab cov tiam menyuam no. Yausuas tsis tau ua dua tes haujlwm tswj kav ib pab neeg, thiab nws kuj paub meej txog tiam neeg ntawd yog cov tawvncauj, yws taus. Tej pejxeem los kuj swm Mauxes tes hạulwm ntawm kev coj, nimno Mauxes tuag lawm. Thaj av uas lawv yuav mus nyob puv npho yeebncuab. Lawv tsis muaj cuabyeej yuav hla tau tus Dej Yauladees uas tabtom txog lub caij loj puv ntug tas (Yausuas 3:15). Tiamsis tus Tswv coglus yuav nrog nraim Yausuas, tsis nrug, tsis muab nws tso tseg, tus Tswv yuav pub kom Yausuas kovyeej thaum ntseeg thiab mus raws li tej lus uas tus Tswv cog tseg, yuav coj haivneeg no mus nyob rau lub tebchaws uas cogtseg pub rau cov yawgkoob (nqe 5-6).
Nimno, peb kuj tabtom tau tus Tswv hu los txais ib tes haujlwm tshiab, qib haujlwm tshiab, ib qhov chaw tshiab… ua tus Tswv haujlwm, lossis tso lub neej qub tseg. Qee zaus peb kuj pom tias yus tabtom ntsib tej kev txomyem. Cia li nco ntsoov tus Tswv tej lus cog tseg rau Yausuas hais tias Nws yuav nrog nraim thiab pub kom muaj yeej. Tus Tswv coglus yuav nrog nraim peb nyob yog hais tias peb kam rhais kaujruam mus raws txojkev ntseeg, mloog Nws lus (Mathais 28:20). Ua tau thiab muaj yeej tsis yog vamkhom peb txojkev txawj ntse tiamsis yog vamkhom tus Tswv nrog nraim.
Thov Vajtswv,
Vajtswv, thov Koj pub kom nyuam yaus txaus siab hlo nyob tos thiab ua siab tawv qhawv rhais ruam mus ua Koj tes haujlwm, los ntawm txojkev ntseeg siab rau Koj tej lus cog tseg nrog nraim thiab kovyeej. Thov Koj ua rau nyuam yaus ntseeg tej lus uas Koj hais thiab ua siab tawv qhawv mus. Nyuam yaus tuav Tswv Yexus lub npe thov, Amees.
Peb muaj tus cwjpwm twg thaum hnov tus Tswv hu peb fij tus kheej mus uas tes haujlwm nyuaj?
Nyeem Vajluskub hauv peb lub xyoos: Exekees 20
Kênh Youtube BHKTHN:
