I Pêtrôs 4:3-6
“Mă-lei ning-mônh lu sư gô dơ̆ng ‘bơ̆t anăp ‘Bok Sek Tơlang, wă sek tơlang lu bơngai lôch păng lu bơngai arih, lu sư gô roi kơdih kơdih dôm tơdrong yoch đêl pơm.” (I Pêtrôs 4:5)
Nơ̆r jet tơchĕng pơwao:
– Yua kơ kiơ bơngai tam mă lui sư hlĭch păng pơma che bơle?
– Tơdrong kiơ pơlung bơngai lui kơ Kră Yang oei kơjăp mă khan đe che bơle?
– Tơdrong roi pơdah kơdih hăm Kră Yang đei tơ’blŏk kơ bơ̆n tơdrong kiơ?
Lăm I Pêtrôs 4:1-2, ‘bok Pêtrôs sư bơtho, ‘Bok Krist chu pơmat yua kơ tơdrong yoch lu bơ̆n, thoi noh lu bơ̆n ‘nĕ pă arih kiơ̆ kơ jơhngơ̆m hưch ham kơdih wă mălei athei adrin pơm kiơ̆ ‘Bok Kei-Dei wă. Wă mă hơđăl hloh dơ̆ng, sư tơ’blŏk ming dơ̆ng minh pôm rup pơma kơ chăl arih adrol kơ jing bơngai lui: “Kơplah iĕm tam mă lui sơ̆, iĕm pơm lơ boih tơdrong kơnê̆. Na dang ei ‘nĕ pă pơm thoi lu bơngai sơmăt lăp đon; lu sư hưch-hanh pơm tôm tơdrong kơnê̆ kư̆ kă, et sik suai, sa dư, pơm kư̆ kă lăm năr sư sa et tih kơkuh kơ rup yang sư.” (trong 3). Lăm chăl arih noh đei tơplih kiơ̆ trong ‘lơ̆ng đơ̆ng rŏng kơ lui sơng iŏk Kră Yang Yêsu, wă khan hŭt tŭk tơdrong arih kiơ̆ kơ sĕch akar, hưch ham pơm lơ tơdrong kơnê̆ kư̆ kă, et tơdrô suai, sa dư, pơm kư̆ kă lăm năr sa et tih kơkuh kơ rup yang. Kơlih kơ thoi noh lu bơngai ưh kơ lui kơ Kră Yang gô lăng hlĭch tơpă yua kơ lu sư ‘bôh bơngai lui ưh pă et sa hơdai lu sư bơih, et sik suai păng hŭt tŭk lu rup yang, thoi noh na lu sư che bơle păng pơm kơnê̆ kơ lu bơngai lui (trong 4).
Tơdrong pơlung lu kon pơlei Kră Yang athei mă kơjăp mă lu sư che bơle yua kơ đĭ đăng bơngai gô dơ̆ng ‘bơ̆t anăp ‘bok sek tơlang, Sư gô sek tơlang bơngai lôch păng bơngai arih (trong 5). Thoi noh, na lu bơngai lui tơnăp huay kơ hli ôh. Yua kơ Kră Yang Yêsu ‘Bok sek tơlang tơpăt tơpă “Iĕm pơm kiơ̆ rok thoi nhôn boih, noh thoi nhôn pơm kiơ̆ rok Kră Yang Yêsu Krist ki mơ̆n. Iĕm đei lơ tơdrong pơmat-tat mă-lei khŏm lui kơ tơdrong nhôn bơtho, Yang Bơhngol ‘Lơ̆ng ăn kơ iĕm jơhngơ̆m hiôk hơiă tơpă.” (I Têsalônik 1:6). Đơ̆ng noh dơ̆ng, tơdrong mă bơ̆n wă roi pơdah kơdih dôm tơdrong đêl bơ̆n pơm kơplah bơ̆n oei arih noh kư̆m nơ̆r tơbăt wă kơ lu bơ̆n kơchăng păng ưh kơ đe bu arih mă ataih đơ̆ng Kră Yang, oei pơm yoch hơnơ̆ng. “Thoi noh na iĕm athei kơchăng păng krao khan ling lang wă kơ iĕm kĕ ĕnh dôm tơdrong noh na dơ̆ng ‘bơ̆t anăp Inh Kon Bơngai ning-mônh.” (Luka 21:36).
‘Bok Pêtrôs bơtho wă tơ’blŏk kơ lu bơ̆n Kră Yang Yêsu Krist chu pơmat ăn kơ lu bơ̆n, thoi noh athei arih yua kơ Kră Yang, dôm nơ̆r pơma, dôm tơdrong jang wă kơ Kră Yang lăp đon. Wă kơ pơ̆n nuih roi kơdih dôm tơdrong đêl bơ̆n pơm ‘bơ̆t anăp ‘Bok sek tơlang, na lăm năr ‘nâu lu bơ̆n gô lăng lăng tơdrong arih bơ̆n kơdih, dah lu bơ̆n oei “Kơplah iĕm tam mă lui sơ̆, iĕm pơm lơ boih tơdrong kơnê̆. Na dang ei ‘nĕ pă pơm thoi lu bơngai sơmăt lăp đon; lu sư hưch-hanh pơm tôm tơdrong kơnê̆ kư̆ kă, et sik suai, sa dư, pơm kư̆ kă lăm năr sư sa et tih kơkuh kơ rup yang sư” (trong 3). Lei lu bơ̆n athei tơbral apinh ‘Bok Kei-Dei mơnat. Tơplơ̆ dơ̆ng, dah lu bơ̆n oei pŭ iŏk tơdrong đe che bơle, đe pơm kơnê̆ yua kơ anăn Kră Yang, mălei oei bơwei jơhngơ̆m tơnăp hăm Kră Yang, lei na pơtrơp dơ̆ng, jơhngơ̆m pơ̆n nuih yak năm trong rơgoh. Kơtrơ̆m chu pơmat păng lôch yua kơ Kră Yang kơplah arih tơ ala teh âu, na đei arih ling lang pŭn hiôk hăm ‘Bok Kei-Dei (trong 6).
Ơ Kră Yang mă ‘mêm kơeng, apinh Ih tơgŭm inh băt kơnăl inh rơdu pơm yoch na wă kơ inh băt tơbral păng năm tơ Ih. Apinh Ih pơm kơ inh jing ‘nao dơ̆ng wă kơ Yang Bơhngol ‘Lơ̆ng oei hơdai wă kơ inh pơ̆n nuih roi dôm tơdrong yoch đêl inh pơm ‘bơ̆t anăp Kra Yang lăm năr Ih jur ning mônh. Krao khan yua anăn Kră Yang Yêsu Krist, Amen.
Lu bơ̆n kăl kơ tơplih tơdrong kiơ wă pơ̆n nuih roi dôm tơdrong ‘bơ̆t anăp Kră Yang lăm năr Kră Yang jur?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 17
Kênh Youtube BHKTHN:
